મહાભારત · અધ્યાય 16.32

ભગવઞ્શ્વશુરો મેઽસિ દૈવતસ્યાપિ દૈવતમ્ ।
સ મે દેવાતિદેવસ્ત્વં શૃણુ સત્યાં ગિરં મમ ॥

તપસ્વી કોપનો વિપ્રો દુર્વાસા નામ મે પિતુઃ ।
ભિક્ષામુપાગતો ભોક્તું તમહં પર્યતોષયમ્ ॥

શૌચને ત્વાગસસ્ત્યાગૈઃ શુદ્ધેન મનસા તથા ।
કોપસ્થાનેષ્વપિ મહત્સ્વકુપ્યન્ન કદાચન ॥

સ પ્રીતો વરદો મેઽભૂત્કૃતકૃત્યો મહામુનિઃ ।
અવશ્યં તે ગ્રહીતવ્યમિતિ માં સોબ્રવીદ્વચઃ ॥

તતઃ શાપભયાદ્વિપ્રમવોચં પુનરેવ તમ્ ।
એવમસ્ત્વિતિ ચ પ્રાહ પુનરેવ સ મે દ્વિજઃ ॥

ધર્મસ્ય જનની ભદ્રે ભવિત્રી ત્વં શુભાનને ।
વશે સ્થાસ્યન્તિ તે દેવા યાંસ્ત્વમાવાહયિષ્યસિ ॥

ઇત્યુક્ત્વાઽન્તર્હિતો વિપ્રસ્તતોઽહં વિસ્મિતાઽભવમ્ ।
ન ચ સર્વાસ્વવસ્થાસુ સ્મૃતિર્મે વિપ્રણશ્યતિ ॥

અથ હર્મ્યતલસ્થાઽહં રવિમુદ્યન્તમીક્ષતી ।
સંસ્મૃત્ય તદૃષેર્વાક્યં સ્પૃહયન્તી દિવાકરમ્ ॥

સ્થિતાઽહં બાલભાવેન તત્ર દોષમબુદ્ધ્યતી ।
અથ દેવઃ સહસ્રાંશુર્મત્સમીપગતોઽભવત્ ॥

દ્વિધા કૃત્વાઽત્મનો દેહં ભૂમૌ ચ ગગનેઽપિ ચ ।
તતાપ લોકાનેકેન દ્વિતીયેનાગમત્સ મામ્ ॥

સ મામુવાચ વેપન્તીં વરં મત્તો વૃણીષ્વ હ ।
ગમ્યતામિતિ તં ચાહં પ્રણમ્ય સિરસાઽવદમ્ ॥

સ મામુવાચ તિગ્માંશુર્વૃથાઽહ્વાનં ન મે ક્ષમમ્ ।
ધક્ષ્યામિ ત્વાં ચ વિપ્રં ચ યેન દત્તો વરસ્તવ ॥

તમહં રક્ષતી વિપ્રં શાપાદનપકારિણમ્ ।
પુત્રો મે ત્વત્સમો દેવ ભવેદિતિ તતોઽબ્રવમ્ ॥

તતો માં તેજસાઽવિશ્ય મોહયિત્વા ચ ભાનુમાન્ ।
ઉવાચ ભવિતા પુત્રસ્તવેત્યભ્યગમદ્દિવમ્ ॥

તતોઽહમન્તર્ભવને પિતુશ્ચિત્તાનુરક્ષિણી ।
ગૂઢોત્પન્નં સુતં બાલં જલે કર્ણમવાસૃજમ્ ॥

નૂનં તસ્યૈવ દેવસ્ય પ્રસાદાત્પુનરેવ તુ ।
કન્યાઽહમભવં વિપ્ર યથા પ્રાહ સ મામૃષિઃ ॥

સ મયા સૂઢયા પુત્રો જ્ઞાયમાનોઽપ્યુપેક્ષિતઃ ।
તન્માં દહતિ વિપ્રર્ષે યથા સુવિદિતં તવ ॥

યદિ પાપમપાપં વા યદેતદ્વિવૃતં મયા ।
તં દ્રષ્ટુમિચ્છામિ ભગવન્વ્યપનેતું ત્વમર્હસિ ॥

યચ્ચાસ્ય રાજ્ઞો વિદિતં હૃદિસ્થં ભવતોઽનઘ ।
તં ચાયં લભતાં કામમદ્યૈવ મુનિસત્તમ ॥

ઇત્યુક્તઃ પ્રત્યુવાચેદં વ્યાસો વેદવિદાંવરઃ ।
સાધુ સર્વમિદં ભાવ્યમેવમેતદ્યથાઽત્થ મામ્ ॥

અપરાધશ્ચ તે નાસ્તિ કન્યાભાવં ગતા હ્યસિ ।
દેવાશ્ચૈશ્વર્યવન્તો વૈ શરીરાણ્યાવિશન્તિ વૈ ॥

સન્તિ દેવનિકાયાશ્ચ સન્કલ્પાજ્જનયન્તિ યે ।
વાચા દૃષ્ટ્યા તથા સ્પર્શાત્સન્ઘર્ષેણેતિ પઞ્ચધા ॥

મનુષ્યધર્મો દૈવેન ધર્મેણ હિ ન દુષ્યતિ ।
ઇતિ કુન્તિ વિજાનીહિ વ્યેતુ તે માનસો જ્વરઃ ॥

સર્વં બલવતાં પથ્યં સર્વં બલવતાં શુચિ ।
સર્વં બલવતાં ધર્મઃ સર્વં બલવતાં સ્વકમ્ ॥