Mahabharata · Chapter 16.30

tataḥ samupaviṣṭeṣu pāṇḍaveṣu mahātmasu /
vyāsaḥ satyavatīputraḥ provācāmantrya pārthivam //

dhṛtarāṣṭra mahābāho kaccitte vartate tapaḥ /
kaccinmanaste prīṇāti vanavāse narādhipa //

kacciddhṛdi na te śoko rājanputravināśajaḥ /
kaccijjñānāni sarvāṇi suprasannāni te'nagha //

kaccidbuddhiṃ dṛḍhāṃ kṛtvā carasyāraṇyakaṃ vidhim /
kaccidvadhūśca gāndhārī na śokenābhibhūyate //

mahāprajñā buddhimatī devī dharmārthadarśinī /
āgamāpāyatattvajñā kaccideṣā na śocati //

kaccitkuntī ca rājaṃstvāṃ śuśrūṣatyanahaṅkṛtā /
yā parityajya svaṃ putraṃ guruśuśrūṣaṇe ratā //

kacciddharmasuto rājā tvayā pratyabhinanditaḥ /
bhīmārjunayamāścaiva kaccidete'pi sāntitāḥ //

kaccinnandasi dṛṣṭraitānkaccite nirmalaṃ manaḥ /
kaccicca śuddhabhāvosi jātajñāno narādhipa //

etaddhi tritayaṃ śreṣṭhaṃ sarvabhūteṣu bhārata /
nirvairatā mahārāja satyamakrodha eva ca //

kaccitte na ca mohosti vanavāsena bhārata /
svadatte vanyamannaṃ vā upavāsopi vā bhavet //

viditaṃ cāpi rājendra vidurasya mahātmanaḥ /
gamanaṃ vidhinā'nena dharmasya sumahātmanaḥ //

māṇḍavyaśāpāddhi sa vai dharmo viduratāṃ gataḥ /
mahābuddhirmahāyogī mahātmā sumahāmanāḥ //

bṛhaspatirvā deveṣu śukro vā'pyasureṣu ca /
na tathā buddhisampanno yathā sa puruṣarṣabhaḥ //

tapobalavyayaṃ kṛtvā sucirātsambhṛtaṃ tadā /
māṇḍavyenarṣiṇā dharmo hyabhibhūtaḥ sanātanaḥ //

niyogādbrahmaṇaḥ pūrvaṃ mayā svena balena ca /
vaicitravīryake kṣetre jātaḥ sa sumahāmatiḥ //

bhrātā tava mahārāja devadevaḥ sanātanaḥ /
dhāraṇānmanasā dhyānādya dharma kavayo viduḥ //

satyena saṃvardhayati yo damena śamena ca /
ahiṃsayā ca dānena tapasā ca sanātanaḥ //

yena yogabalājjātaḥ kururājo yudhiṣṭhiraḥ /
dharma ityeṣa nṛpate prājñenāmitabuddhinā //

yathā vahniryathā vāyuryathā'paḥ pṛthivī yathā /
yathā'kāśaṃ tathā dharma iha cāmutra ca sthitaḥ //

sarvagaścaiva rājendra sarvaṃ vyāpya carācaram /
dṛśyate devadevaiḥ sa siddhairnirmuktakalmaṣaiḥ //

yo hi dharmaḥ sa viduro viduro yaḥ sa pāṇḍavaḥ /
sa eṣa rājandṛśyaste māṇḍavaḥ preṣyavatsthitaḥ //

praviṣṭaḥ sa mahātmānaṃ bhrātā te buddhisammataḥ /
dṛṣṭvā mahātmā kaunteyaṃ mahāyogabalānvitaḥ //

tvāṃ cāpi śreyasā yokṣye nacirādbharatarṣabha /
saṃśayacchedanārthāya prāptaṃ māṃ viddhi putraka //

na kṛtaṃ yaiḥ purā kaiścitkarma loke maharṣibhiḥ /
āścaryabhūtaṃ tapasaḥ phalaṃ taddarśayāmi vaḥ //

kimicchasi mahīpāla mattaḥ prāptumabhīpsitam /
draṣṭruṃ spraṣṭumatha śrotuṃ tatkartāsmi tavānagha //