Mahabharata · Chapter 16.29

tatastu rājanneteṣāmāśrame puṇyakarmaṇām /
śivā nakṣatrasampannā sā vyatīyāya śarvarī //

tatastatra kathāścāsaṃsteṣāṃ dharmārthalakṣaṇāḥ /
vicitrapadasañcārā nānāśrutibhiranvitāḥ //

pāṇḍavāstvabhito māturdharaṇyāṃ suṣupustadā /
utsṛjya tu mahārhāṇi śayanāni narādhipa //

yadāhāro'bhakavadrājā dhṛtarāṣṭro mahāmanāḥ /
tadāhārā nṛvīṃrāste nyavasaṃstāṃ niśāṃ tadā //

vyatītāyāṃ tu śarvaryāṃ kṛtapaurvāhṇikakriyaḥ /
bhrātṛbhiḥ sahito rājā dadarśāśramamaṇḍalam //

sāntaḥ puraparīvāraḥ sabhṛtyaḥ sapurohitaḥ /
yathāsukhaṃ yathoddeśaṃ dhṛtarāṣṭrābhyanujñayā //

dadarśa tatra vedīśca samprajvalitapāvakāḥ /
kṛtābhiṣekairmunibhirhutāgnibhirupasthitāḥ //

vāneyapuṣpanikarairājyadhūmodgamairapi /
brāhmeṇa vapuṣā yuktā yuktā munigaṇasya tāḥ //

mṛgayūthairanudvignaistatratatra samāśritaiḥ /
aśaṅkitaiḥ pakṣigaṇaiḥ pragītairiva ca prabho //

kekābhirnīlakaṇṭhānāṃ dātyūhānāṃ ca kūjitaiḥ /
kokilānāṃ kuhuravaiḥ sukhaiḥ śrutimanoharaiḥ //

prādhītadvijaghoṣaiśca kvacitkvacidalaṅkṛtam /
phalamūlasamāhārairmahadbhiścopaśobhitam //

tataḥ sa rājā pradadau tāpasārthamupāhṛtān /
kalaśānkāñcanānrājaṃstathaivaudumbarānapi //

ajināni praveṇīśca sruksruvaṃ ca mahīpatiḥ /
kamaṇḍalūṃści sthālīśca piṭharāṇi ca bhārata //

bhājanāni ca lauhāni pātrīśca vividhā nṛpa /
yadyadicchati yāvacca yadanyadapi kāṅkṣitam //

evaṃ sa rājā dharmātmā parītyāśramamaṇḍalam /
vasu viśrāṇya tatsarvaṃ punarāyānmahīpatiḥ //

kṛtāhnikaṃ ca rājānaṃ dhṛtarāṣṭraṃ mahīpatim /
dadarśāsīnamavyagraṃ gāndhārīsahitaṃ tadā //

mātaraṃ cāvidūrasthāṃ śiṣyavatpraṇatāṃ sthitām /
kuntīṃ dadarśa dharmātmā śiṣṭācārasamanvitām //

sa tamabhyarcya rājānaṃ nāma saṃśrāvya cātmanaḥ /
niṣīdetyabhyanujñāto vṛsyāmupaviveśa ha //

bhīmasenādayaścaiva pāṇḍava bharatarṣabha /
abhivādyopasaṅgṛhya niṣeduḥ pārthivājñayā //

sa taiḥ parivṛto rājā śuśubhe'tīva kauravaḥ /
bibhradbrāhmīṃ śriyaṃ dīptāṃ devairiva bṛhaspatiḥ //

tathā teṣūpaviṣṭeṣu samājagmurmaharṣayaḥ /
śatayūpaprabhṛtayaḥ kurukṣetranivāsinaḥ //

vyāsaśca bhagavānvipro devarṣigaṇasevitaḥ /
vṛtaḥ śiṣyairmahātejā darśayāmāsa pārthivam //

tataḥ sa rājā kauravyaḥ kuntīputraśca dharmarāṭ /
bhīmasenādayaścaiva pratyutthāyābhyavādayan //

samāgatastato vyāsaḥ śatayūpādibhirvṛtaḥ /
dhṛtarāṣṭraṃ mahīpālamāsyatāmityabhāṣata //

varaṃ tu viṣṭaraṃ kauśyaṃ kṛṣṇājinakuśottaram /
pratipede tadā vyāsastadarthamupakalpitam //

te ca sarve dvijaśreṣṭhā viṣṭareṣu samantataḥ /
dvaipāyanābhyanujñātā niṣedurvipulaujasaḥ //