Mahabharata · Chapter 16.27

sa taiḥ saha naravyādhrairbhrātṛbhirbharatarṣabha /
rājā rucirapadmākṣairāsāñcakre tadāśrame //

tāpasaiśca mahābhāgairnānādeśasamāgataiḥ /
draṣṭuṃ kurupateḥ putrānpāṇḍavānpṛthuvakṣasaḥ //

te bruvañjñātumicchāmaḥ katamo'tra yudhiṣṭhiraḥ /
bhīmārjunau yamau caiva draupadī ca yaśasvinī //

tānācakhyau tadā sūtasteṣāṃ nāma pradhānataḥ /
sañjayo draupadīṃ caiva sarvāścānyā kurustriyaḥ //
sañjaya uvāca /

ya eṣa jāmbūnadaśuddhagaura- stanurmahāsiṃha iva pravṛddhaḥ /
pracaṇḍaghoṇaḥ pṛthudīrghanetra- stāmrāyatākṣaḥ kururāja eṣaḥ //

ayaṃ punarmattagajendragāmī prataptacāmīkaraśuddhagauraḥ /
pṛthvāyatāṃsaḥ pṛthudīrghabāhu- rvṛkodaraḥ paśyata paśyatemam //

yastveṣa pārśve'sya mahādhanuṣmā- ñśyāmo yuvā vāraṇayūthapābhaḥ /
siṃhonnatāṃso gajakhelagāmī padmāyatākṣo'rjuna eṣa vīraḥ //

kuntīsamīpe puruṣottamau tu yamāvimau viṣṇumahendrakalpau /
manuṣyaloke sakale samosti yayorna rūpe na bale na śīle //

iyaṃ punaḥ padmadalāyatākṣī madhyaṃ vayaḥ kiñcidiva spaśantī /
nīlotpalābhā puradevateva kṛṣṇā sthitā mūrtimatīva lakṣmīḥ //

asyāstu pārśve kanakopamatva- geṣā sthitā mūrtimatīva gaurī /
satye sthitā sā bhaginī dvijāgryā- ścakrāyudhasyāpratimasya tasya //

iyaṃ ca jāmbūnadaśuddhagaurī pārthasya bhāryā bhujagendrakanyā /
citrāṅgadā caiva narendrakanyā yaiṣā savarṇārdramadhūkapuṣpaiḥ //

iyaṃ svasā rājacamūpateśca pravṛddhanīlotpaladāmavarṇā /
paspardha kṛṣṇena sadā nṛpo yo vṛkodarasyaiṣa parigraho'gryaḥ //

iyaṃ ca rājño magadhādhipasya sutā jarāsandha iti śrutasya /
yavīyaso mādravatīsutasya bhāryā matā campakadāmagaurī //

indīvaraśyāmatanuḥ sthitā tu yaiṣā parā'sannatarorlateva /
bhāryā matā mādravatīsutasya jyeṣṭhasya seyaṃ kamalāyatākṣī //

iyaṃ tu niṣṭaptasuvarṇagaurī rājño virāṭasya sutā saputrā /
bhāryā'bhimanyornihato raṇe yo droṇādibhistairviratho rathasthaiḥ //

etāstu sīmantaśiroruhā yāḥ śuklottarīyā nararājapatnyaḥ /
rājñosya vṛddhasya paraṃśatākhyāḥ snuṣā nṛvīrāhataputranāthāḥ //

ekatā yathāmukhyamudāhṛtā vo brāhmaṇyabhāvādṛjubuddhisatvāt /
sarvā bhavadbhiḥ paripṛcchyamānā narendrapatnyaḥ suviśuddhasatvāḥ / sarve bhavantopi tapobalāgryāḥ kṣāntāśca dāntāśca kulodbhavāśca //
vaiśampāyana uvāca /

evaṃ sa rājā kuruvṛddhavaryaḥ samāgatastairnaradevaputraiḥ /
papraccha sarvaṃ kuśalaṃ tadānīṃ gateṣu sarveṣvatha tāpaseṣu //

yodheṣu cāpyāśramamaṇḍalaṃ ta- nmatvā niviṣṭeṣu vimucya patram /
strīvṛddhabāle ca susanniviṣṭe yathārhatastānkuśalānyapṛcchat //