Mahabharata · Chapter 16.26

tataste pāṇḍavā dūrādavatīrya padātayaḥ /
abhijagmurnarapaterāśramaṃ vinayānatāḥ //

sa ca yodhajanaḥ sarvo ye ca rāṣṭranivāsinaḥ /
striyaśca kurumukhyānāṃ padbhirevānvayustadā //

āśramaṃ te tato jagmurdhṛtarāṣṭrasya pāṇḍavāḥ /
śūnyaṃ mṛgagaṇākīrṇaṃ kadalīvanaśobhitam //

tatastatra samājagmustāpasā niyatavratāḥ /
pāṇḍavānāgatāndraṣṭuṃ kautūhalasamanvitāḥ //

tānapṛcchattato rājā kvāsau kauravavaṃśabhṛt /
pitā jyeṣṭho gato'smākamiti bāṣpapariplutaḥ //

te tamūcustato vākyaṃ yamunāmavagāhitum /
puṣpāṇāmudakumbhasya cārthe gata iti prabho //

tairākhyātena mārgeṇa tataste jagmurañjasā /
dadṛśuścāvidūre tānsarvānatha padātayaḥ //

tataste satvarā jagmuḥ viturdarśanakāṅkṣiṇaḥ /
sahadevastu vegena prādhāvadyatra sā pṛthā //

susvaraṃ rurude dhīmānmātuḥ pādāvupaspṛśan /
sā ca bāṣpākulamukhī dadarśaka dayitaṃ sutam //

bāhubhyāṃ sampariṣvajya samunnāmya ca putrakam /
gāndhāryāḥ kathayāmāsa sahadrevamupasthitam //

anantaraṃ ca rājānaṃ bhīmasenamathārjunam /
nakulaṃ ca pṛthā dṛṣṭvā tvaramāṇopacakrame //

sā hyagre gacchati tayordapatyorhataputrayoḥ / karṣantī tau tataste tāṃ dṛṣṭvā sannyapatanbhuvi /
tayostu pādayo rājannyapatanhataputrayoḥ //

rājā tānsvarayogena sparśena ca mahāmanāḥ /
pratyabhijñāya medhāvī samāśvāsayata prabhuḥ //

tataste bāṣpamutsṛjya gāndhārīsahitaṃ nṛpam /
upatasthurmahātmāno mātaraṃ ca yathāvidhi //

sarveṣāṃ toyakalaśāñjagṛhuste svayaṃ tadā /
pāṇḍavā labdhasañjñāste mātrā cāśvāsitāḥ punaḥ //

tathā nāryo nṛsiṃhānāṃ so'varodhajanastadā /
paurajānapadāścaiva dadṛśustaṃ janādhipam //

nivedayāmāsa tadā janaṃ tannāmagotrataḥ /
yudhiṣṭhiro narapatiḥ sa cainaṃ pratyapūjayat //

sa taiḥ parivṛto mene harṣabāṣpāvilekṣaṇaḥ /
rājā'tmānaṃ gṛhagataṃ purevi gajasāhvaye //

abhivādito vadhūbhiśca kṛṣṇādyābhiḥ sa pārthivaḥ /
gāndhāryā sahito dhīmānkuntyā ca pratyanandata //

tataścāśramamāgacchatsiddhacāraṇasevitam /
didṛkṣubhiḥ samākīrṇaṃ nabhastārāgaṇairiva //