મહાભારત · અધ્યાય 16.27

સ તૈઃ સહ નરવ્યાધ્રૈર્ભ્રાતૃભિર્ભરતર્ષભ ।
રાજા રુચિરપદ્માક્ષૈરાસાઞ્ચક્રે તદાશ્રમે ॥

તાપસૈશ્ચ મહાભાગૈર્નાનાદેશસમાગતૈઃ ।
દ્રષ્ટું કુરુપતેઃ પુત્રાન્પાણ્ડવાન્પૃથુવક્ષસઃ ॥

તે બ્રુવઞ્જ્ઞાતુમિચ્છામઃ કતમોઽત્ર યુધિષ્ઠિરઃ ।
ભીમાર્જુનૌ યમૌ ચૈવ દ્રૌપદી ચ યશસ્વિની ॥

તાનાચખ્યૌ તદા સૂતસ્તેષાં નામ પ્રધાનતઃ ।
સઞ્જયો દ્રૌપદીં ચૈવ સર્વાશ્ચાન્યા કુરુસ્ત્રિયઃ ॥
સઞ્જય ઉવાચ ।

ય એષ જામ્બૂનદશુદ્ધગૌર- સ્તનુર્મહાસિંહ ઇવ પ્રવૃદ્ધઃ ।
પ્રચણ્ડઘોણઃ પૃથુદીર્ઘનેત્ર- સ્તામ્રાયતાક્ષઃ કુરુરાજ એષઃ ॥

અયં પુનર્મત્તગજેન્દ્રગામી પ્રતપ્તચામીકરશુદ્ધગૌરઃ ।
પૃથ્વાયતાંસઃ પૃથુદીર્ઘબાહુ- ર્વૃકોદરઃ પશ્યત પશ્યતેમમ્ ॥

યસ્ત્વેષ પાર્શ્વેઽસ્ય મહાધનુષ્મા- ઞ્શ્યામો યુવા વારણયૂથપાભઃ ।
સિંહોન્નતાંસો ગજખેલગામી પદ્માયતાક્ષોઽર્જુન એષ વીરઃ ॥

કુન્તીસમીપે પુરુષોત્તમૌ તુ યમાવિમૌ વિષ્ણુમહેન્દ્રકલ્પૌ ।
મનુષ્યલોકે સકલે સમોસ્તિ યયોર્ન રૂપે ન બલે ન શીલે ॥

ઇયં પુનઃ પદ્મદલાયતાક્ષી મધ્યં વયઃ કિઞ્ચિદિવ સ્પશન્તી ।
નીલોત્પલાભા પુરદેવતેવ કૃષ્ણા સ્થિતા મૂર્તિમતીવ લક્ષ્મીઃ ॥

અસ્યાસ્તુ પાર્શ્વે કનકોપમત્વ- ગેષા સ્થિતા મૂર્તિમતીવ ગૌરી ।
સત્યે સ્થિતા સા ભગિની દ્વિજાગ્ર્યા- શ્ચક્રાયુધસ્યાપ્રતિમસ્ય તસ્ય ॥

ઇયં ચ જામ્બૂનદશુદ્ધગૌરી પાર્થસ્ય ભાર્યા ભુજગેન્દ્રકન્યા ।
ચિત્રાઙ્ગદા ચૈવ નરેન્દ્રકન્યા યૈષા સવર્ણાર્દ્રમધૂકપુષ્પૈઃ ॥

ઇયં સ્વસા રાજચમૂપતેશ્ચ પ્રવૃદ્ધનીલોત્પલદામવર્ણા ।
પસ્પર્ધ કૃષ્ણેન સદા નૃપો યો વૃકોદરસ્યૈષ પરિગ્રહોઽગ્ર્યઃ ॥

ઇયં ચ રાજ્ઞો મગધાધિપસ્ય સુતા જરાસન્ધ ઇતિ શ્રુતસ્ય ।
યવીયસો માદ્રવતીસુતસ્ય ભાર્યા મતા ચમ્પકદામગૌરી ॥

ઇન્દીવરશ્યામતનુઃ સ્થિતા તુ યૈષા પરાઽસન્નતરોર્લતેવ ।
ભાર્યા મતા માદ્રવતીસુતસ્ય જ્યેષ્ઠસ્ય સેયં કમલાયતાક્ષી ॥

ઇયં તુ નિષ્ટપ્તસુવર્ણગૌરી રાજ્ઞો વિરાટસ્ય સુતા સપુત્રા ।
ભાર્યાઽભિમન્યોર્નિહતો રણે યો દ્રોણાદિભિસ્તૈર્વિરથો રથસ્થૈઃ ॥

એતાસ્તુ સીમન્તશિરોરુહા યાઃ શુક્લોત્તરીયા નરરાજપત્ન્યઃ ।
રાજ્ઞોસ્ય વૃદ્ધસ્ય પરંશતાખ્યાઃ સ્નુષા નૃવીરાહતપુત્રનાથાઃ ॥

એકતા યથામુખ્યમુદાહૃતા વો બ્રાહ્મણ્યભાવાદૃજુબુદ્ધિસત્વાત્ ।
સર્વા ભવદ્ભિઃ પરિપૃચ્છ્યમાના નરેન્દ્રપત્ન્યઃ સુવિશુદ્ધસત્વાઃ । સર્વે ભવન્તોપિ તપોબલાગ્ર્યાઃ ક્ષાન્તાશ્ચ દાન્તાશ્ચ કુલોદ્ભવાશ્ચ ॥
વૈશમ્પાયન ઉવાચ ।

એવં સ રાજા કુરુવૃદ્ધવર્યઃ સમાગતસ્તૈર્નરદેવપુત્રૈઃ ।
પપ્રચ્છ સર્વં કુશલં તદાનીં ગતેષુ સર્વેષ્વથ તાપસેષુ ॥

યોધેષુ ચાપ્યાશ્રમમણ્ડલં ત- ન્મત્વા નિવિષ્ટેષુ વિમુચ્ય પત્રમ્ ।
સ્ત્રીવૃદ્ધબાલે ચ સુસન્નિવિષ્ટે યથાર્હતસ્તાન્કુશલાન્યપૃચ્છત્ ॥