Mahabharata · Chapter 16.23

vanaṃ gate kauravendre duḥkhaśokasamanvitāḥ /
babhūvuḥ pāṇḍavā rājanmātṛśokeni cānvitāḥ //

tathā paurajanaḥ sarvaḥ śocannāste janādhipam /
kurvāṇāśca kathāstatra brāhmaṇā nṛpatiṃ prati //

kathaṃ na rājā vṛddhaḥ sa vane vasati nirjane /
gāndhārī ca mahābhāgā sā ca kuntī pṛthā katham //

sukhārhaḥ sa hi rājarṣirasukhī tadvanaṃ mahat /
kimavasthaḥ samāsādya prajñācakṣurmahāmanāḥ //

suduṣkaraṃ kṛtavatī kuntī putrānapāsya sā /
rājyaśriyaṃ parityajya vanaṃ sā samarocayat //

viduraḥ kimavasthaśca bhrātṛśuśrūṣurātmavān /
sa ca gāvalgaṇirdhīmānbhartṛpiṇḍānupālakaḥ //

ākumāraṃ ca paurāste cintāśokasamāhatāḥ /
tatratatra kathāścakruḥ samāsādya parasparam //

pāṇḍavāścaiva te sarve bhṛśaṃ śokaparāyaṇāḥ /
śocanto mātaraṃ vṛddhāmūṣurnāticiraṃ pure //

tathaiva vṛddhaṃ pitaraṃ hataputraṃ janeśvaram /
gāndhārīṃ ca mahābhāgāṃ viduraṃ ca mahāmatim //

naiṣāṃ babhūva samprītistānvicintayatāṃ tadā /
na rājye na ca nārīṣu na vedādhyayaneṣu ca //

paraṃ nirvedamagamaṃścintayantā narādhipam /
taṃ ca jñātivadhaṃ ghoraṃ saṃsmarantaḥ punaḥpunaḥ //

abhimanyośca bālasya vināśaṃ raṇamūrdhani /
karṇasya ca mahābāhoḥ saṅgrāmeṣvapalāyinaḥ //

tathaiva draupadeyānāmanyeṣāṃ suhṛdāmapi /
vadhaṃ saṃsmṛtya te vīrā nātipramanaso'bhavan //

hatapravīrāṃ pṛthivīṃ hṛtaratnāṃ ca bhārata /
sadaiva cintayantaste na śamaṃ copalebhire //

draupadī hataputrā ca subhadrā caiva bhāminī /
nātiprītiyute devyau tadāstāmaprahṛṣṭavat //

vairāṭyāstanayaṃ dṛṣṭvā pitaraṃ te parikṣitam /
dhārayanti sma te prāṇāṃstava pūrvapitāmahāḥ //