Mahabharata · Chapter 16.24

evaṃ te puruṣavyāghrāḥ pāṇḍavā mātṛnandanāḥ /
smaranto mātaraṃ vīrā babhūvurbhaśaduḥkhitāḥ //

ye rājakāryeṣu purā vyāsaktā nityaśo'bhavan /
te rājakāryāṇi tadā nākārṣuḥ sarvataḥ pure //

praviṣṭā iva śokena nābhyanandanta kiñcana /
sambhāṣyamāṇā api te na kiñcitpratyapūjayan //

te sma vīrā durādharṣā gāmbhīrye sāgaropamāḥ /
śokopahatavijñānā naṣṭasañjñā ivābhavan //

acintayaṃśca jananīṃ tataste pāṇḍunandanāḥ /
kathaṃ nu vṛddhamithunaṃ vahatyatikṛśā pṛthā //

kathaṃ ca sa mahīpālo hataputro nirāśrayaḥ /
patnyā saha vasatyeko vane śvāpadasevite //

sā ca devī mahābhāgā gāndhārī hatabāndhavā /
patimandhaṃ kathaṃ vṛddhamanveti vijane vane //

evaṃ teṣāṃ kathayatāmautsukyamabhavattadā /
gamane cābhavadbuddhirdhṛtarāṣṭradidṛkṣayā //

sahadevastu rājānaṃ praṇipatyedamabravīt / aho me bhavato dṛṣṭaṃ hṛdayaṃ gamanaṃ prati /

na hi tvāṃ gauraveṇāhamaśakaṃ vaktumañjasā /
gamanaṃ prati rājendra tadidaṃ samupasthitam //

diṣṭyā drakṣyāmi tāṃ kuntīṃ vartayantīṃ tapasvinīm /
jaṭilāṃ tāpasīṃ vṛddhāṃ kuśakāśaparikṣatām //

prāsādaharmyasaṃvṛddhāmatyantasukhabhāginīm /
kadānujananīṃ śrāntāṃ drakṣyāmi bhṛśaduḥkhitām //

anityāḥ khalu martyānāṃ gatayo bharatarṣabha /
kuntī rājasutā yatra vasatyasukhitā vane //

sahadevavacaḥ śrutvā draupadī yoṣitāṃ varā / uvāca devī rājānamabhipūjyābhinandya ca /

kadā drakṣyāmi tāṃ devīṃ yadi jīvati sā pṛthā /
jīvantyā hyadya me prītirbhaviṣyati janādhipa //

eṣā te'stu matirnityaṃ dharme te ramatāṃ manaḥ /
yo'dya tvamasmānrājendra śreyasā yojayiṣyasi //

agrapādasthitaṃ cemaṃ viddhi rājanvadhūjanam /
kāṅkṣantaṃ darśanaṃ kuntyā gāndhāryāḥ śvasurasca ca //

ityuktaḥ sa nṛpo devyā draupadyā bharatarṣabha /
senādhyakṣānsamānāyya sarvānidamuvāca ha //

niryātayata me senāṃ prabhūtarathakuñjarām /
drakṣyāmi vanasaṃsthaṃ ca dhṛtāṣṭraṃ mahīpatim //

stryadhyakṣāṃścābravīdrājā yānāni vividhāni me /
sajjīkriyantāṃ sarvāṇi śibikāśca sahasraśaḥ //

śakaṭāpaṇaveśāśca kośaḥ śilpina eva ca /
niryāntu kośapālāśca kurukṣetrāśramaṃ prati //

yaśca paurajanaḥ kaściddraṣṭumicchati pārthivam /
anāvṛtaḥ suvihitaḥ sa ca yātu surakṣitaḥ //

sūdāḥ paurogavāścaiva sarvaṃ caiva mahānasam /
vividhaṃ bhakṣyabhojyaṃ ca śakaṭairuhyatāṃ mama //

prayāṇaṃ ghuṣyatāṃ caiva śvobhūta iti māciram / kriyatāṃ pathi cāpyadya veśmāni vividhāni ca /

evamājñāpya rājā sa bhrātṛbhiḥ saha pāṇḍavaḥ /
śvobhūte niryayau rājansastrīvṛddhapuraḥsaraḥ //

sa bahirdivasāneva janaughaṃ paripālayan /
nyavasannṛpatiḥ pañca tato'gacchadvanaṃ prati //