Mahabharata · Chapter 16.20

tato bhāgīrathītīre medhye puṇyajanocite /
nivāsamakarodrājā vidurasya mate sthitaḥ //

tatrainaṃ paryupātiṣṭhanbrāhmaṇā vanavāsinaḥ /
kṣatraviṭśūdrasaṅkhāśca bahavo bharatarṣabha //

sa taiḥ parivṛto rājā kathābhiḥ parinandya tān /
anujajñe sa śiṣyānvai vidhivatpratipūjya ca //

sāyāhne sa mahīpālastato gaṅgāmupetya ca /
cakāra vidhivacchaucaṃ gāndhārī ca yaśasvinī //

te caivānye pṛthak sarve tīrtheṣvāplutya bhārata /
cakruḥ sarvāḥ kriyāstatra puruṣā vidurādayaḥ //

kṛtaśaucaṃ tato vṛddhaṃ śvaśuraṃ kuntibhojajā /
gāndhārīṃ ca pṛthā rājangaṅgātīrthamupānayat //

rājñastu yājakaistatra kṛto vedīparistaraḥ /
juhāva tatra vahniṃ sa nṛpatiḥ satyasaṅgaraḥ //

tato bhāgīrathītīrātkurukṣetraṃ jagāma saḥ /
sānugo nṛpatirvṛddho niyataḥ saṃyatendriyaḥ //

tatrāśramapadaṃ dhīmānabhigamya sa pārthivaḥ /
āsasādātha rājarṣiṃ śatayūpaṃ manīṣiṇam //

sa hi rājā mahānāsītkekayeṣu parampataḥ /
svaputraṃ manujaiśvarye niveśya vanamāviśat //

tenāsau sahito rājā yayau vyāsāśramaṃ prati /
tatrainaṃ vidhivadrājanpratyagṛhṇātkurūdvaham //

sa dīkṣāṃ tatra samprāpya rājā kauravanandanaḥ /
śatayūpāśrame tasminnivāsamakarottadā //

tasmai sarvaṃ vidhiṃ rājñe rājā'cakhyau mahāmatiḥ /
āraṇyakaṃ mahārāja vyāsasyānumate tadā //

evaṃ ca tapasā rājandhṛtarāṣṭro mahāmanāḥ /
yojayāmāsa cātmānaṃ tāṃścāpyanucarāṃstadā //

tathaiva devī gāndhārī valkalājinadhāriṇī /
kuntyā saha mahārāji samānavratacāriṇī //

karmaṇā manasā vācā cakṣuṣā caiva te nṛpa /
sanniyamyendriyagrāmamāsthitāḥ paramaṃ tapaḥ //

tvagasthibhūtaḥ pariśuṣkamāṃso jaṭājinī valkalasaṃvṛtāṅgaḥ /
sa pārtivastatra tapaścacāra maharṣivattīvramapetamohaḥ //

kṣattā ca dharmārthavidagryabuddhiḥ sasañjayastaṃ nṛpatiṃ sadāram /
upācaraddhorataporjitātmā tadā kṛśo valkalacīravāsāḥ //