Mahabharata · Chapter 16.21

tatastatra muniśreṣṭhā rājānaṃ draṣṭumabhyayuḥ /
nāradaḥ parvataścaiva devalaśca mahātapāḥ //

dvaipāyanaḥ saśiṣyaśca siddhāścānye manīṣiṇaḥ /
śatayūpaśca rājarṣirvṛddhaḥ paramadhārmikaḥ //

teṣāṃ kuntī mahārāja pūjāṃ cakre yathāvidhi /
te cāpi tutuṣustasyāstāpasāḥ paricaryayā //

tatra dharmyāḥ kathāstāta cakruste paramarṣayaḥ /
ramayanto mahātmānaṃ dhṛtarāṣṭraṃ janādhipam //

kathāntare tu kasmiṃściddevarṣirnāradastataḥ /
kathāmimāmakathayatsarvapratyakṣadarśivān //
nārada uvāca /

purā prajāpatisamo rājā'sīdakutobhayaḥ /
sahasracityi ityuktaḥ śatayūpapitāmahaḥ //

sa putre rājyamāsajjyi jyeṣṭhe paramadhārmike /
sahasracityo dharmātmā praviveśa vanaṃ nṛpaḥ //

sa gatvā tapasaḥ pāraṃ dīptasya vasudhādhipaḥ /
purandarasya saṃsthānaṃ pratipede mahādyutiḥ //

dṛṣṭapūrvaḥ sa bahuśo rājansampatatā mayā /
mahendrasadane rājā tapasā dagdhakilbiṣaḥ //

tathā śailālayo rājā bhagattapitāmahaḥ /
tapobalenaiva nṛpo mahendrasadanaṃ gataḥ //

tathā pṛṣadhro rājā'sīdrājanvajradharopamaḥ /
sa cāpi tapasā lebhe nākapṛṣṭhamito gataḥ //

asminnaraṇye nṛpate māndhāturapi cātmajaḥ /
purukutso nṛpaḥ siddhiṃ mahatīṃ samavāptavān //

bhāryā samabhavadyasya narmadā saritāṃ varā /
sosminnaraṇye nṛpatistapastaptvā divaṃ gataḥ //

śaśalomā ca rājā'sīdrājanparamadhārmikaḥ /
samyagasminvane taptvā tato divamavāptavān //

dvaipāyanaprasādācca tvamapīdaṃ tapovanam /
rājannavāpya duṣprāpāṃ siddhimagryāṃ gamiṣyasi //

tvaṃ cāpi rājaśārdūla tapasonte śriyā vṛtaḥ / gāndhārīsahito gantā gatiṃ teṣāṃ mahātmanāṃ

pāṇḍuḥ smarati te nityaṃ balahantuḥ samīpagaḥ /
tvāṃ sadaiva mahārāja śreyasā sa ca yokṣyati //

tava śuśrūṣayā caiva gāndhāryāśca yaśasvinī /
bhartuḥ salokatāṃ kuntī gamiṣyati vadhūstava //

yudhiṣṭhirasya jananī sa hi dharmaḥ sanātanaḥ /
vayametatprapaśyāmo nṛpate divyavakṣuṣāḥ //

pravekṣyati mahātmānaṃ viduraśca yudhiṣṭhiram /
sañjayastadanudhyānāditaḥ svargamavāpsyati //
vaiśampāyana uvāca /

etacchrutvā kauravendro mahātmā sārdhaṃ patnyā prītimānsambabhūva /
vidvānvākyaṃ nāradasya praśasya cakre pūjāṃ cātulāṃ nāradāya //

tataḥ sarve nāradaṃ viprasaṅghāḥ sampūjayāmāsuratīva rājan /
rājñaḥ prītyā dhṛtarāṣṭrasya te vai punaḥpunaḥ samprahṛṣṭāstadānīm //