મહાભારત · અધ્યાય 16.20

તતો ભાગીરથીતીરે મેધ્યે પુણ્યજનોચિતે ।
નિવાસમકરોદ્રાજા વિદુરસ્ય મતે સ્થિતઃ ॥

તત્રૈનં પર્યુપાતિષ્ઠન્બ્રાહ્મણા વનવાસિનઃ ।
ક્ષત્રવિટ્શૂદ્રસઙ્ખાશ્ચ બહવો ભરતર્ષભ ॥

સ તૈઃ પરિવૃતો રાજા કથાભિઃ પરિનન્દ્ય તાન્ ।
અનુજજ્ઞે સ શિષ્યાન્વૈ વિધિવત્પ્રતિપૂજ્ય ચ ॥

સાયાહ્ને સ મહીપાલસ્તતો ગઙ્ગામુપેત્ય ચ ।
ચકાર વિધિવચ્છૌચં ગાન્ધારી ચ યશસ્વિની ॥

તે ચૈવાન્યે પૃથક્ સર્વે તીર્થેષ્વાપ્લુત્ય ભારત ।
ચક્રુઃ સર્વાઃ ક્રિયાસ્તત્ર પુરુષા વિદુરાદયઃ ॥

કૃતશૌચં તતો વૃદ્ધં શ્વશુરં કુન્તિભોજજા ।
ગાન્ધારીં ચ પૃથા રાજન્ગઙ્ગાતીર્થમુપાનયત્ ॥

રાજ્ઞસ્તુ યાજકૈસ્તત્ર કૃતો વેદીપરિસ્તરઃ ।
જુહાવ તત્ર વહ્નિં સ નૃપતિઃ સત્યસઙ્ગરઃ ॥

તતો ભાગીરથીતીરાત્કુરુક્ષેત્રં જગામ સઃ ।
સાનુગો નૃપતિર્વૃદ્ધો નિયતઃ સંયતેન્દ્રિયઃ ॥

તત્રાશ્રમપદં ધીમાનભિગમ્ય સ પાર્થિવઃ ।
આસસાદાથ રાજર્ષિં શતયૂપં મનીષિણમ્ ॥

સ હિ રાજા મહાનાસીત્કેકયેષુ પરમ્પતઃ ।
સ્વપુત્રં મનુજૈશ્વર્યે નિવેશ્ય વનમાવિશત્ ॥

તેનાસૌ સહિતો રાજા યયૌ વ્યાસાશ્રમં પ્રતિ ।
તત્રૈનં વિધિવદ્રાજન્પ્રત્યગૃહ્ણાત્કુરૂદ્વહમ્ ॥

સ દીક્ષાં તત્ર સમ્પ્રાપ્ય રાજા કૌરવનન્દનઃ ।
શતયૂપાશ્રમે તસ્મિન્નિવાસમકરોત્તદા ॥

તસ્મૈ સર્વં વિધિં રાજ્ઞે રાજાઽચખ્યૌ મહામતિઃ ।
આરણ્યકં મહારાજ વ્યાસસ્યાનુમતે તદા ॥

એવં ચ તપસા રાજન્ધૃતરાષ્ટ્રો મહામનાઃ ।
યોજયામાસ ચાત્માનં તાંશ્ચાપ્યનુચરાંસ્તદા ॥

તથૈવ દેવી ગાન્ધારી વલ્કલાજિનધારિણી ।
કુન્ત્યા સહ મહારાજિ સમાનવ્રતચારિણી ॥

કર્મણા મનસા વાચા ચક્ષુષા ચૈવ તે નૃપ ।
સન્નિયમ્યેન્દ્રિયગ્રામમાસ્થિતાઃ પરમં તપઃ ॥

ત્વગસ્થિભૂતઃ પરિશુષ્કમાંસો જટાજિની વલ્કલસંવૃતાઙ્ગઃ ।
સ પાર્તિવસ્તત્ર તપશ્ચચાર મહર્ષિવત્તીવ્રમપેતમોહઃ ॥

ક્ષત્તા ચ ધર્માર્થવિદગ્ર્યબુદ્ધિઃ સસઞ્જયસ્તં નૃપતિં સદારમ્ ।
ઉપાચરદ્ધોરતપોર્જિતાત્મા તદા કૃશો વલ્કલચીરવાસાઃ ॥