Mahabharata · Chapter 16.19

kuntyāstu vacanaṃ śrutvā pāṇḍavā rājasattama /
vrīḍitāḥ sannyavartanta pāñcālyā saha bhārata //

tataḥ śabdo mahāneva sarveṣāmabhavattadā /
antaḥpurāṇāṃ rudatāṃ dṛṣṭvā kuntīṃ tathā gatām //

pradakṣiṇamathāvṛttya rājānaṃ pāṇḍavāstadā /
abhivādya nyavartanta pṛthāṃ tāmanivartya vai //

tato'bravīnmahātejā dhṛtarāṣṭroṃ'bikāsutaḥ /
gāndhārīṃ viduraṃ caiva samābhāṣyāvagṛhya ca //

yudhiṣṭhirasya jananī devī sādhu nivartyatām /
yathā yudhiṣṭhiraḥ prāha tatsarvaṃ satyameva hi //

putraiśvaryaṃ mahadidamapāsya ca mahāphalam /
kā'nugacchedvanaṃ durgaṃ putrānutsṛjya mūḍhavat //

rājyasthayā tapastaptuṃ kartuṃ dānavrataṃ mahat /
anayā śakyamevādya śrūyatāṃ ca vaco mama //

gāndhāri parituṣṭosmi vadhvāḥ śuśrūṣaṇena vai /
tasmāttvamenāṃ dharmajñe samanujñātumarhasi //

ityuktā saubaleyī tu rājñā kuntīmuvāca ha /
tatsarvaṃ rājavacanaṃ svaṃ ca vākyaṃ viśeṣavat //

na ca sā vanavāsāya devī kṛtamatiṃ tadā /
śaknotyupāvartayituṃ kuntīṃ dharmaparāṃ satīm //

tasyāstāṃ tu sthitiṃ jñātvā vyavasāyaṃ kurustriyaḥ /
nivṛttāṃśca kuruśreṣṭhāndṛṣṭvā prarurudustadā //

upāvṛtteṣu pārtheṣu sarvāsveva vadhūṣu ca /
yayau rājā mahāprājño dhṛtarāṣṭro vanaṃ tadā //

pāṇḍavāścātidīnāste duḥkhaśokaparāyaṇāḥ /
yānaiḥ strīsahitāḥ sarve puraṃ praviviśustadā //

tadahṛṣṭamanānandaṃ gatotsavamivābhavat /
nagaraṃ hāstinapuraṃ sastrīvṛddhakumārakam //

sarve cāsannirutsāhāḥ pāṇḍavā jātamanyavaḥ /
kuntyā hīnāḥ suduḥkhārtā vatsā iva vinākṛtāḥ //

dhṛtarāṣṭrastu tenāhnā gatvā sumahadantaram /
tato bhāgīrathītīre nivāsamakarotprabhuḥ //

prāduṣkṛtā yathānyāyamagnayo vedapāragaiḥ / vyarājanta dvijaśreṣṭhaistatratatra tapovane /
prāduṣkṛtāgnirabhavatsa ca vṛddho narādhipaḥ //

sa rājā'gnīnparyupāsya hutvā ca vidhivattadā /
sandhyāgataṃ sahasrāṃśumupātiṣṭhata bhārata //

viduraḥ sañjayaścaiva rājñaḥ śayyāṃ kuśaistataḥ /
cakratuḥ kuruvīrasya gāndhāryāścāvidūrataḥ //

gāndhāryāḥ sannikarṣe tu niṣasāda kuśe sukham /
yudhiṣṭhirasya jananī kuntī sādhuvrate sthitā //

teṣāṃ saṃśravaṇe cāpi niṣedurvidurādayaḥ /
yājakāśca yathoddeśaṃ dvijā ye cānuyāyinaḥ //

prādhītadvijamukhyā sā samprajvalitapāvakā /
babhūva teṣāṃ rajanī brāhmīva prītivardhinī //

tato rātryāṃ vyatītāyāṃ kṛtapūrvāhṇikakriyāḥ / hutvā'gniṃ vidhivatsarve prayayuste yathākramam /
udaṅmukhā nirīkṣanta upavāsaparāyaṇāḥ //

sa teṣāmatiduḥkho'bhūnnivāsaḥ prathame'hani /
śocatāṃ vadatāṃ cāpi paurajānapadairjanaiḥ //