Mahabharata · Chapter 16.2

evaṃ sampūjito rājā pāṇḍavairambikāsutaḥ /
vijahāra yathāpūrvamṛṣibhiḥ paryupasthitaḥ //

brahmadeyāgrahārāṃśca pradadau sa kurūdvahaḥ /
tacca kuntīsuto rājā sarvamevānvamodata //

ānṛśaṃsyaparo rājā prīyamāṇo yudhiṣṭhiraḥ / uvāca sa tadā bhrātṝnamātyāṃśca mahīpatiḥ /
mayā caiva bhavadbhiśca mānya eṣa narādhipaḥ //

nideśe dhṛtarāṣṭrasya yastiṣṭhati sa me suhṛt /
viparītaśca me śatrurniyamyaśca bhavennaraḥ //

parivṛtteṣu cāhaḥsu putrāṇāṃ śrāddhakarmaṇi /
dadau ca rājā vittāni yāvadasya cikīrṣitam //

tataḥ sa rājā kauravyo dhṛtarāṣṭro mahāmanāḥ /
brāhmaṇebhyo yathārhebhyo dadau vittānyanekaśaḥ //

dharmirājaśca bhīmaśca savyasācī yamāvapi /
tatsarvamanvavartanta dhṛtarāṣṭravyapekṣayā //

kathaṃ nu rājā vṛddhaḥ sa putrapautravadhārditaḥ /
śokamasmatkṛtaṃ prāpyi na mriyeteti cintya te //

yāvaddhi kuruvīrasya jīvatputrasya vai sukham /
tāvatsukhamavāpnoti bhogāṃścaiva vyavasthitān //

tataste sahitāḥ pañca bhrātaraḥ pāṇḍunandanāḥ /
tathāśīlāḥ samātasthurdhṛtarāṣṭrasya śāsane //

dhṛtarāṣṭraśca tānsarvānvinītānniyame sthitān /
śiṣyavṛttiṃ samāpannānguruvatpratyapadyata //

gāndhārī caiva putrāṇāṃ vividhaiḥ śrāddhakarmabhiḥ /
ānṛṇyamagamatkāmānviprebhyaḥ pratipādya sā //

evaṃ dharmabhṛtāṃśreṣṭho dharmarājo yudhiṣṭhiraḥ /
bhrātṛbhiḥ sahito dhīmānpūjayāmāsaṃ taṃ nṛpam //

sa rājā sumahātejā vṛddhaḥ kurukulodvahaḥ /
na dadarśa tadā kiñcidapriyaṃ pāṇḍunandane //

vartamāneṣu sadvṛttiṃ pāṇḍaveṣu mahātmasu /
prītimānabhavadrājā dhṛtarāṣṭroṃ'bikāsutiḥ //

saubaleyī ca gāndhārī putraśokamapāsya tam /
sadaiva prītimatyāsīttanayeṣu nijeṣviva //

priyāṇyeva tu kauravyo nāpriyāṇi kurūdvahaḥ /
vaicitravīrya nṛpatau samācarata sarvadā //

yadyadbrūte ca kiñcitsa dhṛtarāṣṭro janādhipaḥ /
guru vā laghu vā kāryaṃ gāndhārī ca tapasvinī //

taṃ sa rājā mahārāja pāṇḍavānāṃ dhurandharaḥ /
pūjayitvā vacastattadakārṣītparavīrahā //

tena tasyābhavatprīto vṛttena sa narādhipaḥ /
anvatapyata saṃsmṛtya putraṃ taṃ mandacetasam //

sadā ca prātarutthāya kṛtajapyaḥ śucirnṛpaḥ /
āśāste pāṇḍuputrāṇāṃ samareṣvaparājayam //

brāhmaṇānsvastivācyātha hutvā caiva hutāśanam /
āyūṃṣi pāṇḍuputrāṇāmāśaṃsata narādhipaḥ //

na tāṃ prītiṃ parāmāpa putrebhyaḥ sa tadā purā / yāṃ prītiṃ pāṇḍuputrebhyaḥ sadā'vāpa narādhipaḥ /

brāhmaṇānāṃ yathā vṛttaḥ kṣatriyāṇāṃ yathāvidhaḥ /
tathā viṭśūdrasaṅghānāmabhavatsa priyastadā //

yacca kiñcittadā pāpaṃ dhṛtarāṣṭrasutaiḥ kṛtam /
akṛtvā hṛdi tatpāpaṃ taṃ nṛpaṃ sonvavartata //

yaḥ kaścidapi yatkiñcitpramādādambikāsute /
kurute dveṣyatāmeti sa kaunteyasya dhīmataḥ //

na rājño dhṛtarāṣṭrasya na ca duryodhanasya vai /
uvāca duṣkṛtaṃ kaścidyudhiṣṭhirabhayānnaraḥ //

dhṛtyā tuṣṭo narendraḥ sa gāndhārī vidurastathā /
ajātaśatrorvṛttena na tu bhīmasya pārthivaḥ //

anvavartata bhīmopi niścito dharmajaṃ nṛpam /
dhṛtarāṣṭraṃ ca samprekṣya sadā bhavati durmanāḥ //

rājānamanuvartanta dharmaputramamitrahā /
anvavartata sankruddho hṛdayena parāṅmukhaḥ //