Mahabharata · Chapter 16.14
evamuktastu rājñā sa viduro buddhisattamaḥ /
dhṛtarāṣṭramupetyaiva vākyamāha mahārthavat //
ukto yudhiṣṭhiro rājā bhavadvacanamāditaḥ /
sa ca saṃśrutya vākyaṃ te praśaśaṃsa mahādyutiḥ //
bībhatsuśca mahātejā nivedayati te gṛhān /
vasu tasya gṛhe yacca prāṇānapi ca kevalān //
dharmarājaśca putraste rājyaṃ prāṇāndhanāni ca /
anujānāti rājarṣe yaccānyadapi kiñcana //
bhīmastu sarvaduḥkhāni saṃsmṛtya bahulānyuta /
kṛcchrādiva mahābāhuranujajñe viniḥśvasan //
ra rājandharmaśīlena rājñā bībhatsunā tathā /
anunīto mahābāhuḥ sauhṛde sthāpitopi ca //
na ca manyustvayā kārya iti tvāṃ prāha dharmarāṭ /
saṃsmṛtya bhīmastadvairaṃ yadanyāyavadācarat //
evamprāyo hi dharmo'yaṃ kṣatriyāṇāṃ narādhipa /
śuddhe kṣatriyadharme na nirato'yaṃ vṛkodaraḥ //
vṛkodarakṛte cāhamarjunaśca punaḥ punaḥ /
prasīda yāce nṛpate bhavānprabhurihāsti yat //
taddadātu bhavānvittaṃ yāvadicchasi pārthivaḥ /
tvamīśvaro no rājyasya prāṇānāmapi bhārata //
brahmadeyāgrahārāṃśca putrāṇāmaurdhvadehikam /
ito ratnāni gāścaiva dāsīdāsamajāvikam //
arcayitvā kuruśreṣṭho brāhmaṇebhyaḥ prayacchatu /
dīnāndhakṛpaṇebhyaśca tatratatra nṛpājñayā //
bahvannarasapānāḍhyāḥ sabhā vidura kāraya /
gavāṃ nipānānyanyacca vividhaṃ puṇyakaṃ kuru //
iti māmabravīdrājā pārthaścaiva dhanañjayaḥ /
yadatrānantaraṃ kāryaṃ tadbhavamvavaktumarhati //
ityukte vidureṇātha dhṛtarāṣṭro'bhinandya tān /
manaścakre mahādāne kārtikyāṃ janamejaya //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0