Mahabharata · Chapter 16.15

vidureṇaivamuktastu dhṛtarāṣṭro janādhipaḥ /
prītimānabhavadrājanrājño jiṣṇośca karmaṇā //

tato'bhirūpānbhīṣmāya brāhmaṇānṛṣisattamān /
putrārthe suhṛdāṃ caiva sa samīkṣya sahasraśaḥ //

kārayitvā'nnapānāni yānānyācchādanāni ca /
suvarṇamaṇiratnāni dāsīdāsaparicchadān //

kambalāni ca ratnāni grāmānkṣetraṃ tathā dhanam /
sālaṅkārāngajānaśvānkanyāścaiva varastriyaḥ //

ādiśyādiśya sarvebhyo dadau sa nṛpasattamaḥ /
droṇaṃ sankīrtya bhīṣmaṃ ca somadattaṃ ca bāhlikam //

duryodhanaṃ ca rājānaṃ putrāṃścaiva pṛthakpṛthak /
jayadrathapurogāṃśca suhṛdaścāpi sarvaśaḥ //

sa śrāddhayajño vavṛte bahugodhanadakṣiṇaḥ /
anekadhanaratnaugho yudhiṣṭhiramate tadā //

aniśaṃ yatra puruṣā gaṇakā lekhakāstadā /
yudhiṣṭhirasya vacanādapṛcchanta sma taṃ nṛpam //

ājñāpaya kimetebhyaḥ pradeyaṃ dīyatāmiti /
tadupasthitamevātra vacanānte dadustadā //

śate deye daśaśataṃ sahasraṃ cāyutaṃ tathā /
dīyate vacanādrājñaḥ kuntīputrasya dhīmataḥ //

evaṃ sa vasudhārābhirvarṣamāṇo nṛpāmbudaḥ /
taprayāmāsa viprāṃstānvarṣanbhūmimivāmbudaḥ //

tato'ntantaramevātra sarvavarṇānmahāmate /
annapānarasaugheṇa plāvayāmāsa pārthivaḥ //

savastradhanaratnaugho mṛdaṅganinadasvanaḥ /
gavāśvamakarāvarto nānāratnamahākaraḥ //

grāmāgrahāradvīpāḍhyo maṇihemajalārṇavaḥ /
jagatsamplāvayāmāsa dhṛtarāṣṭroḍupoddhataḥ //

evaṃ sa putrapautrāṇāṃ pitṝṇāmātmanastathā /
gāndhāryāśca mahārāja pradadāvaurdvadehikam //

pariśrānto yadāsītsa dadaddānānyanekaśaḥ /
nivartayāmāsa tadā dānayajñaṃ narādhipaḥ //

evaṃ sa rājā kauravyaścakre dānamahākratum /
naṭanartakalāsyāḍhyaṃ bahvannarasadakṣiṇam //

daśāhamevaṃ dānāni dattvā rājāṃ'bikāsutaḥ /
babhūva putrapautrāṇāmanṛṇo bharatarṣabha //