Mahabharata · Chapter 15.7

taṃ praviṣṭaṃ mahātmānaṃ vīramānakadundubhiḥ /
putraśokena santapto dadarśa kurupuṅgavam //

tasyāśruparipūrṇākṣo vyūḍhorasko mahābhujaḥ /
ārtasyārtataraḥ pārthaḥ pādau jagrāha bhārata //

tasya mūrdhānamāghrātumiyeṣānakadundubhiḥ /
svasrīyasya mahābāhurna śaśāka ca śatruhan //

samāliṅgyārjunaṃ vṛddhaḥ sa bhujābhyāṃ mahābhujaḥ / rurodātha smarañśauriṃ vilalāpa suvihvalaḥ /
bhrātṝnputrāṃśca pautrāṃśca dauhitrānsa sakhīnapi //
vasudeva uvāca /

yairjitā bhūmipālāśca daityāśca śataśo'rjuna /
tānsarvānneha paśyāmi jīvāmyarjuna durmaraḥ //

yo tāvarjunaśiṣyau te priyau bahumatau sadā /
tayorapanayātpārtha vṛṣṇayo nidhanaṃ gatāḥ //

yau tau vṛṣṇipravīrāṇāṃ dvāvevātirathau matau /
pradyumno yuyudhānaści kathanankatthase ca yau //

tau sadā kuruśārdūla kṛṣṇasya priyabhājanau /
tāvubhau vṛṣṇināśasya mukhamāstāṃ dhanañjaya //

na tu garhāmi śaineyaṃ hārdikyaṃ cāhamarjuna /
akrūraṃ raukmiṇeyaṃ ca śāpo hyevātra kāraṇam //

keśinaṃ yastu kaṃsaṃ ca vikramyi hatavānprabhuḥ /
videhamakarotpārthaṃ caidyaṃ ca balagarvitam //

naiṣādimekalavyaṃ ca cakre kāliṅgamāgadhān /
gāndhārānkāśirājaṃ ca marubhūmau ca pārthivān //

prācyāṃśca dākṣiṇātyāṃśca pārvatīyāṃstathā nṛpān /
sobhyupekṣitavānevamanayānmadhusūdanaḥ //

tvaṃ hi taṃ nāradaścaiva munayaśca sanātanam /
govindamanaghaṃ devamabhijānīdhvamacyutam //

pratyapaśyacca sa vibhurjñātikṣayamadhokṣajaḥ /
samupekṣitavānnityaṃ svayaṃ sa mama putrakaḥ //

gāndhāryā vacanaṃ yattadṛṣīṇāṃ ca parantapa /
tannūnamanyathā kartuṃ naicchatsa jagataḥ prabhuḥ //

pratyakṣaṃ bhavataścāpi tava pautraḥ parantapa / aśvatthāmnā hataścāpi jīvitastasya tejasā /
imāṃstu naicchatsvānjñātīnrakṣituṃ ca sakhā tava //

tataḥ putrāṃśca pautrāṃśca bhrātṝnatha sakhīṃstathā /
śayānānnihatāndṛṣṭvā kṛṣṇo māmabravīdidam //

samprāpto'dyāyamasyāntaḥ kulasya bharatarṣabha / āgamiṣyati bībhatsurimāṃ dvāravatīṃ purīm /
ākhyeyaṃ tasya yadvṛttaṃ vṛṣṇīnāṃ vaiśasaṃ mahat //

sa tu śrutvā mahātejā yadūnāṃ nidhanaṃ prabho /
āgantā kṣiprameveha na me'trāsti vicāraṇā //

yo'haṃ tamarjunaṃ viddhi yo'rjunaḥ sohameva tu /
yadbrūyāttattathā kāryamiti buddhyasva bhārata //

sa strīṣu prāptakālāsu pāṇḍavo bālakeṣu ca /
pratipatsyati bībhatsurbhavataścaurdhvadgehikam //

imāṃ ca nagarīṃ sadyaḥ pratiyāte dhanañjaye /
prākāraṭṭālakopetāṃ samudraḥ plāvayiṣyati //

ahaṃ deśe tu kasmiṃścitpuṇye niyamamāsthitaḥ /
kālaṃ kāṅkṣe sadya eva rāmeṇa sahito vane //

evamuktvā hṛṣīkeśo māmacintyaparākramaḥ /
hitvā māṃ bālakaiḥ sārdhaṃ diśaṃ kāmapyagātprabhuḥ //

sohaṃ tau ca mahātmānau cintayanrāmakeśavau /
ghoraṃ jñātivadhaṃ caiva na bhuñje śokakarśitaḥ //

na mokṣyena ca jīviṣye diṣṭyā prāptosi pāṇḍava /
yaduktaṃ pārthaṃ kṛṣṇena tatsarvamakhilaṃ kuru //

etatte pārtha rājyaṃ ca striyo ratnāni caiva hi /
iṣṭānprāṇānahaṃ hīmāṃstyakṣyāmi ripusūdana //