Mahabharata · Chapter 15.6

dārukopi kurūngatvā dṛṣṭvā pārthānmahārathān /
ācaṣṭa mausale vṛṣṇīnanyonyenopasaṃhṛtān //

śrutvā vinaṣṭānvārṣṇeyānsabhojāndhakakaukurān /
pāṇḍavāḥ śokasantaptā vitrastamanaso'bhavan //

tato'rjunastānāmantrya keśavasya priyaḥ sakhā /
prayayau mātulaṃ draṣṭuṃ nedamastīti cābravīt //

sa vṛṣṇinilayaṃ gatvā dārukeṇa saha prabho /
dadarśa dvārakāṃ vīro mṛtanāthāmiva striyam //

yāḥ sma tā lokanāthena nāthavatyaḥ purā'bhavan /
tāstvanāthāstadā nāthaṃ pārthaṃ dṛṣṭvā vicukruśuḥ //

ṣoḍaśa strīsahasrāṇi vāsudevaparigrahāḥ /
tāsāmāsīnmahānnādo dṛṣṭvaivārjunamāgatam //

tāstu dṛṣṭvaiva kauravyo bāṣpeṇāpihitekṣaṇaḥ /
hīnāḥ kṛṣṇena putraiśca nāśakatsobhivīkṣitum //

sa tāṃ vṛṣṇyandhakajalāṃ hayamīnāṃ rathoḍupām /
vāditrarathaghoṣaughāṃ veśmatīrthamahāgrahām //

ratnaśaivalasanghātāṃ vajraprākāramālinīm /
rathyāsrotojalāvartāṃ catvarastimitahradām //

rāmakṛṣṇamahāgrāhāṃ dvārakāṃ saritaṃ tadā /
kālapāśagrahāṃ bhīmāṃ nadīṃ vaitaraṇīmiva //

dadarśa vāsavirdhīmānvihīnāṃ vṛṣṇipuṅgavaiḥ / gataśriyaṃ virānandāṃ padminīṃ śiśire yathā /

tāṃ dṛṣṭvā dvārakāṃ pārthastāśca kṛṣṇasya yoṣitaḥ /
sasvanaṃ bāṣpamutsṛjya nipāta mahītale //

sātrājitī tataḥ satyā rukmiṇī ca viśāmpate /
abhipatya praruruduḥ parivārya dhanañjayam //

tatastaṃ kāñcane pīṭhe samuttāpyopaveśya ca /
abhinandya mahātmānaṃ parivāryopatasthire //

tataḥ saṃstūya govindaṃ kathayitvā ca pāṇḍavaḥ /
āśvāsya tāḥ striyaścāpi mātulaṃ draṣṭumabhyagāt //