મહાભારત · અધ્યાય 15.6

દારુકોપિ કુરૂન્ગત્વા દૃષ્ટ્વા પાર્થાન્મહારથાન્ ।
આચષ્ટ મૌસલે વૃષ્ણીનન્યોન્યેનોપસંહૃતાન્ ॥

શ્રુત્વા વિનષ્ટાન્વાર્ષ્ણેયાન્સભોજાન્ધકકૌકુરાન્ ।
પાણ્ડવાઃ શોકસન્તપ્તા વિત્રસ્તમનસોઽભવન્ ॥

તતોઽર્જુનસ્તાનામન્ત્ર્ય કેશવસ્ય પ્રિયઃ સખા ।
પ્રયયૌ માતુલં દ્રષ્ટું નેદમસ્તીતિ ચાબ્રવીત્ ॥

સ વૃષ્ણિનિલયં ગત્વા દારુકેણ સહ પ્રભો ।
દદર્શ દ્વારકાં વીરો મૃતનાથામિવ સ્ત્રિયમ્ ॥

યાઃ સ્મ તા લોકનાથેન નાથવત્યઃ પુરાઽભવન્ ।
તાસ્ત્વનાથાસ્તદા નાથં પાર્થં દૃષ્ટ્વા વિચુક્રુશુઃ ॥

ષોડશ સ્ત્રીસહસ્રાણિ વાસુદેવપરિગ્રહાઃ ।
તાસામાસીન્મહાન્નાદો દૃષ્ટ્વૈવાર્જુનમાગતમ્ ॥

તાસ્તુ દૃષ્ટ્વૈવ કૌરવ્યો બાષ્પેણાપિહિતેક્ષણઃ ।
હીનાઃ કૃષ્ણેન પુત્રૈશ્ચ નાશકત્સોભિવીક્ષિતુમ્ ॥

સ તાં વૃષ્ણ્યન્ધકજલાં હયમીનાં રથોડુપામ્ ।
વાદિત્રરથઘોષૌઘાં વેશ્મતીર્થમહાગ્રહામ્ ॥

રત્નશૈવલસન્ઘાતાં વજ્રપ્રાકારમાલિનીમ્ ।
રથ્યાસ્રોતોજલાવર્તાં ચત્વરસ્તિમિતહ્રદામ્ ॥

રામકૃષ્ણમહાગ્રાહાં દ્વારકાં સરિતં તદા ।
કાલપાશગ્રહાં ભીમાં નદીં વૈતરણીમિવ ॥

દદર્શ વાસવિર્ધીમાન્વિહીનાં વૃષ્ણિપુઙ્ગવૈઃ । ગતશ્રિયં વિરાનન્દાં પદ્મિનીં શિશિરે યથા ।

તાં દૃષ્ટ્વા દ્વારકાં પાર્થસ્તાશ્ચ કૃષ્ણસ્ય યોષિતઃ ।
સસ્વનં બાષ્પમુત્સૃજ્ય નિપાત મહીતલે ॥

સાત્રાજિતી તતઃ સત્યા રુક્મિણી ચ વિશામ્પતે ।
અભિપત્ય પ્રરુરુદુઃ પરિવાર્ય ધનઞ્જયમ્ ॥

તતસ્તં કાઞ્ચને પીઠે સમુત્તાપ્યોપવેશ્ય ચ ।
અભિનન્દ્ય મહાત્માનં પરિવાર્યોપતસ્થિરે ॥

તતઃ સંસ્તૂય ગોવિન્દં કથયિત્વા ચ પાણ્ડવઃ ।
આશ્વાસ્ય તાઃ સ્ત્રિયશ્ચાપિ માતુલં દ્રષ્ટુમભ્યગાત્ ॥