Mahabharata · Chapter 15.5

tato yayurdārukaḥ keśavaśca babhruśca rāmasya padaṃ patantaḥ /
athāpaśyanrāmamanantavīryaṃ vṛkṣāśritaṃ cintayānaṃ vivikte /

tataḥ samāsādya mahānubhāvaḥ kṛṣṇastadā dārukamanvaśāsat /
gatvā kurūnsarvamimaṃ mahāntaṃ pārthāya śaṃsasva vadhaṃ yadūnām //

tato'rjunaḥ kṣipramihopayātu śrutvā mṛtānyādavānbrahmaśāpāt /
ityevamuktaḥ sa yayau rathena kurūṃstadā dāruko naṣṭacetāḥ //

tato gate dāruke keśavotha dṛṣṭvāntike babhrumuvāca vākyam /
striyo bhavānrakṣituṃ yātu śīghraṃ naitā hiṃsyurdasyavo vittalobhāt //

sa prasthitaḥ keśavenānuśiṣṭo madāturo jñātivadhārditaśca /
taṃ vai yātaṃ sannidhau keśavasya tvarantamekaṃ sahasaiva babhrūm / brahmānuśaptamavadhīnmahadvai kūṭe yuktaṃ musalaṃ lubdhakasya //

tato dṛṣṭvā nihataṃ babhrumāha kṛṣṇe'grajaṃ bhrātaramugratejāḥ /
hahaiva tvaṃ māṃ pratīkṣasva rāma yāvatstriyo jñātivaśāḥ karomi //

tataḥ purīṃ dvāravatīṃ paviśya janārdanaḥ pitaraṃ prāha vākyam /
sarvaṃ bhavānrakṣatu naḥ samagraṃ dhanañjayasyāgamanaṃ pratīkṣan //

rāmo vanānte pratipālayanmā- māste'dyāhaṃ tena samānamiṣye /
dṛṣṭaṃ mayedaṃ nidhanaṃ yadūnāṃ rājñāṃ ca pūrvaṃ kurupuṅgavānām //

nāhaṃ vinā yadubhiryādavānāṃ purīmimāmaśakaṃ draṣṭumadya /
tapaścariṣyāmi nibodha tanme rāmeṇi sārdhaṃ vanamabhyupetya //

itīdamuktvā śirasā ca pādau saṃspṛśya kṛṣṇastvarito jagāma /
tato mahānninadaḥ prādurāsī- tsastrīkumārasya purasya tasya //

athābravītkeśavaḥ sannivartya śabdaṃ śrutvā yoṣitāṃ krośatīnām /
purīmimāmeṣyati savyasācī sa vo duḥkhānmocayitā narāgryaḥ //

tato gatvā keśavastaṃ dadarśa rāmaṃ vane sthitamekaṃ vivikte //

athāpaśyadyogayuktasya tasya nāgaṃ mukhānnissarantaṃ mahāntam /
śvetaṃ yayau satataḥ prekṣamāṇo mahārṇavo yena mahānubhāvaḥ /
sahasraśīrṣaḥ parvatābhogavarṣmā raktānanaḥ svāṃ tanuṃ tāṃ vimucya //

sandṛśyantaṃ sāgarāntaṃ viśantaṃ samyaktadā sāgaraḥ pratyagṛhṇāt /
nāgā divyāḥ saritaścaiva puṇyāḥ karkoṭako vāsukistakṣakaśca //

pṛthuśravā aruṇaḥ kuñjaraśca miśrī śaṅkhaḥ kumudaḥ puṇḍarīkaḥ /
tathā nāgo dhṛtarāṣṭro mahātmā hrādaḥ krāthaḥ śitipṛṣṭho niketuḥ //

tathā nāgau cakramandātiṣaṇḍau nāgaśreṣṭho durmakhaścāmbarīṣaḥ /
svayaṃ rājā varuṇaścāpi rāja- npratyudgamya svāgatenābhyanandan /
te'pūjayaṃścārghyapādyakriyābhiḥ saṅkarṣaṇaṃ bhūdharaṃ śuddhabuddhim //

tato gate bhrātari vāsudevo jānansarvā gatayo divyadṛṣṭiḥ /
vane śūnye vicaraṃścintayāno bhūmau cātha saṃviveśāgryatejāḥ //

sarvaṃ tena prāktadā vittamāsī- dgāndhāryā yadvākyamuktaṃ svadharmāt /
durvāsasā pārasocchiṣṭalipte yaccāpyuktaṃ tacca sasmāra kṛṣṇaḥ //

kulastrīṇāṃ saṃvṛtānāṃ gavāṃ ca dvijendrāṇāṃ balamādāya dharme /
yonirdevānāṃ varado brahmadevo govindākhyo vāsudevo'tha nityaḥ //

sañcintayannandhakavṛṣṇināśaṃ kurukṣayaṃ caiva mahānubhāvaḥ /
mene tataḥ sankramaṇasya kālaṃ tataścakārendriyasannirodham //

yathā ca lokatrayapālanārthaṃ durvāsavākyapratipālanāya /
devopi sandehavimokṣaheto- rnimittamaicchatsakalārthatattvavit //

sa sanniruddhendriyavāṅmanāstu śiśye mahāyogamupetya kṛṣṇaḥ /
jarotha taṃ deśamupājagāma lubdhastadānīṃ mṛgalipsurugraḥ //

sa keśavaṃ yogayuktaṃ śayānaṃ mṛgāsakto lubdhakaḥ sāyakena /
jaro'vidhyatpādatale tvarāvāṃ- staṃ cābhitastajjighṛkṣurjagāma //

athāpaśyatpuruṣaṃ yogayuktaṃ pītāmbaraṃ lubdhako'nekabāhum /
matvā'tmānaṃ tvaparāddhaṃ sa tasya pādau jaro jagṛhe śaṅkitātmā //

āśvāsitaḥ puṇyaphalena bhaktayā tathā'nutāpātkarmaṇo janmanaśca /
dṛṣṭvā tathā devamanantavīryaṃ devaissvargaṃ prātitastyaktadehaḥ //

gaṇairmunīnāṃ pūjitasyatra kṛṣṇo gacchannūrddhvaṃ vyāpya lokānsa lakṣmyā //

divaṃ prāptaṃ vāsavo'thāśvinau ca rudrādityā vasavaścātha viśve /
pratyudyayurmunayaścāpi siddhā gandharvamukhyāśca sahāpsarobhiḥ //

tato rājanbhagavānugratejā nārāyaṇaḥ prabhavaścāvyayaśca /
yogācāryo rodasī vyāpya lakṣmyā sthānaṃ prāpa svaṃ mahātmā'prameyam //

tato devairṛṣibhiścāpi kṛṣṇaḥ samāgataścāraṇaiścaiva rājan /
gandharvāgryairapsarobhirvarābhiḥ siddhaiḥ sādhyaiścānataiḥ pūjyamānaḥ //

taṃ vai devāḥ pratyanandanta rāja- nmuniśreṣṭhā ṛgbhirānarcurīśam /
taṃ gandharvāścāpi tasthuḥ stuvantaḥ prītya cainaṃ puruhūto'bhyanandat //

namonamaste bhagavañśārṅgadhanva- ndharmasthityā prādurāsīrdharāyām /
kaṃsākhyādīndevaśatrūṃśca sarvā- nhatvā bhūmiḥ sthāpitā bhārataptā //

divyaṃ sthānamajaraṃ cāprameyaṃ durvijñeyaṃ cāgamairgamyamagryam /
gaccha prabho rakṣa cārtiṃ prapannā- nkalpekalpe jāyamānāṃśca martyān //

ityevamuktvā devasangho'nugamya śriyā yuktaṃ puṣpavṛṣṭyā vavarṣa /
vāṇī cāsītsaṃśritā rūpiṇī sā bhānormadhye praviśa tvaṃ tu rājan //

bhujaiścaturbhiḥ samupetaṃ mamedaṃ rūpaṃ viśiṣṭaṃ jīvitaṃ saṃsthitaṃ ca /
bhūmau gataṃ pūjayatāprameyaṃ sadā hi tasminnivasāmīti devāḥ //

devā nivṛttāstatpadaṃ nāpnuvanto buddhyā devaṃ saṃsmarantaḥ pratītāḥ /
brahmādyāste tadguṇānkīrtayantaḥ śubhām̐llokānsvānprapeduḥ surendrāḥ //