Mahabharata · Chapter 15.4

kālī strī pāṇḍurairdantaiḥ praviśya hasatī niśi /
striyaḥ svapneṣu muṣṇantī dvārakāṃ paridhāvati //

agnihotraniketeṣu vāstumadhyeṣu veśmasu /
vṛṣṇyandhakānakhādanta svapne gṛdhrā bhayānakāḥ //

alaṅkārāśca cchatraṃ ca dhvajāśca kavacāni ca /
hriyamāṇānyadṛśyanta rakṣobhiḥ subhayānakaiḥ //

taccāgnidattaṃ kṛṣṇasya vajranābhamayomayam /
divamācakrame cakraṃ vṛṣṇīnāṃ paśyatāṃ tadā //

yuktaṃ rathaṃ divyamādityavarṇaṃ hayā'haranpaśyato dārukasya /
te sāgarasyopariṣṭādagaccha- nmanojavāścaturo vājimukhyāḥ //

tālaḥ suparṇaśca mahādhvajau tau supūjitau rāmajanārdhanābhyām /
uccairjahrurapsarasaśca divyā devā ūcurgamyatāṃ tīrthayātrāḥ //

bhagavaddarśanasparśasnehairvitatabhoginaḥ / divaḥ praveśānārthaṃ te vimānairdivamāyayuḥ //

tato jigamiṣantaste vṛṣṇyandhakamahārathāḥ /
sāntaḥpurāstadā tīrthayātrāmaicchannararṣabhāḥ //

tato manoharā hṛṣṭāḥka peyaṃ māṃsaṃ madhūni ca /
bahu nānāvidhaṃ cakrustvaritāḥ kālacoditāḥ //

tataḥ sīdhuṣu saktāśca niryayurnagarādbahiḥ /
yānairaśvairgajaiścaiva śrīmantastigmatejasaḥ //

tataḥ prabhāse nyavasanyathoddiṣṭaṃ yathāgṛham /
prabhūtabhakṣyapeyāste sadārā yādavāstadā //

niviṣṭāṃstānniśāmyātha samudrānte sa yogavit /
jagāmāmantrya tānvīrānuddhavo'rthaviśāradaḥ //

taṃ prasthitaṃ mahātmānamabhivādya kṛtāñjalim /
jānanvināśaṃ vṛṣṇīnāṃ naicchadvārayituṃ hariḥ //

tataḥ kālaparītāste vṛṣṇyandhakamahārathāḥ /
apaśyannuddhavaṃ yāntaṃ tejasā'vṛtya rodasī //

brāhmaṇārtheṣu yatsiddhamannaṃ teṣāṃ mahātmanām /
tadvānarebhyaḥ pradaduḥ surāgandhasamanvitam //

tatastūryaśatākīrṇaṃ naṭanartakasankulam /
avartata mahāpānaṃ prabhāse tigmatejasām //

kṛṣṇasya sannidhau rāmaḥ sahitaḥ kṛtavarmaṇā /
apibadyuyudhānaśca gado babhrustathaiva ca //

tataḥ pariṣado madhye yuyudhāno madotkaṭaḥ /
abravītkṛtavarmāṇamavahāsyāvamatya ca //

kaḥ kṣatriyo hanyamānaḥ suptānhanyānmṛtāniva /
tanna mṛṣyanti hārdikya yādavā yattvayā kṛtam //

ityukte yuyudhānena pūjayāmāsa tadvacaḥ /
pradyumno rathināṃśreṣṭho hārdikyamavamatya va //

tataḥ paramasankruddhaḥ kṛtavarmā tamabravīt /
nirdiśanniva sāvajñaṃ tadā savyena pāṇinā //

bhūriśravāśchinnabāhuryurddhe prāyagatastvayā /
vadhena sunṛśaṃsena kathaṃ vīreṇa pātitaḥ //

iti tasya vacaḥ śrutvā keśavaḥ paravīrahā /
tiryaksaroṣayā dṛṣṭyā vīkṣāñcakre sa manyumān //

maṇiḥ syamantakaścaiva yaḥ sa satrājito'bhavat /
tāṃ kathāṃ śrāvayāmāsa sātyakirmadhusūdanam //

tacchrutvā keśavasyāṅkamagamadrudatī tadā /
satyabhāmā prakupitā kopayantī janārdanam //

tata utthāya sakrodhaḥ sātyakirvākyamabravīt /

pañcānāṃ draupadeyānāṃ dhṛṣṭadyumnaśikhaṇḍinoḥ /
eṣa gacchāmi padavīṃ satyena ca tathā śape //

sauptike ye ca nihatāḥ suptā yena durātmanā /
droṇaputrasahāyena pāpena kṛtavarmaṇā //

samāptamāyurasyādya yaśaścaiva sumadhyate / ityevamuktvā khaṅgena keśavasya samīpataḥ /
abhidrutya śiraḥ kruddhaściccheda kṛtavarmaṇaḥ //

tathā'nyānapi nighnantaṃ yuyudhānaṃ samantataḥ /
abhyadhāvaddhṛṣīkeśo vinivārayituṃ tadā //

ekībhūtāstataḥ sarve kālaparyāyacoditāḥ /
bhojāndhakā mahārāja śaineyaṃ paryavārayan //

tāndṛṣṭvā patatastūrṇamabhikruddhāñjanārdanaḥ /
na cukrodha mahātejā jānankālasya paryayam //

te tu pānamadāviṣṭāścoditāḥ kāladharmaṇā /
yuyudhānamathābhyaghnannucchiṣṭairbhājanaistadā //

hanyamāne tu śaineye kruddho rukmiṇinandanaḥ /
tadanantaramāgacchanmocayiṣyañśineḥ sutam //

sa bhojaiḥ saha saṃyuktaḥ sātyakiścāndhakaiḥ saha / vyāyacchamānau tau vīrau bāhudraviṇaśālinau /
bahutvānnihatau tatra ubhau kuṣṇasya paśyataḥ //

hataṃ dṛṣṭvā ca śaineyaṃ putraṃ ca yadunandanaḥ /
erakāṇāṃ tato muṣṭiṃ kopājjagrāha keśavaḥ //

tadabhūnmusalaṃ ghoraṃ vajrakalpamayomayam /
jaghāna kuṣṇastāṃsteni yeye pramukhato'bhavan //

tato'ndhakāśca bhojāśca śaineyā vṛṣṇayastathā /
jaghnuranyonyamākrande musalaiḥ kālacoditāḥ //

yasteṣāmerakāṃ kaścijjagrāha kupito nṛpaḥ /
vajrabhūteva sā rājannadṛśyata tadā vibho //

tṛṇaṃ ca musalībhūtamapi tatra vyadṛśyata /
brahmadaṇḍakṛtaṃ sarvamiti tadvidvi pārthiva //

āvidhyāvidhya te rājanpraharanti sma taistṛṇaiḥ /
tadvajrabhūtaṃ musalaṃ vyadṛśyata tadā dṛḍham //

avadhītpitaraṃ putraḥ pitā putraṃ ca bhārata /
mattāḥ paripatanti sma yodhayantaḥ parasparam //

pataṅgā iva cāgnau te nipetuḥ kukurāndhakāḥ /
nāsītpalāyane buddhirvadhaayamānasya kasyacit //

tatrāpaśyanmahābāhurjānankālasya paryayam /
musalaṃ samavaṣṭabhya tasthau sa madhusūdanaḥ //

sāmbaṃ ca nihataṃ dṛṣṭvā cārudeṣṇaṃ ca mādhavaḥ /
pradyumnaṃ cāniruddhaṃ ca tataścukrodha bhārata //

gadaṃ vīkṣya śayānaṃ ca bhṛśaṃ kopasamanvitaḥ /
sa niḥśeṣaṃ tadā cakre śārṅgacakragandādharaḥ //

taṃ nighnantaṃ mahātejā babhruḥ parapurañjayaḥ /
dārukaścaiva dāśārhamūvaturyannibodha tat //

bhagavannihatāḥ sarve tvayā bhūyiṣṭhaśo narāḥ /
rāmasya padamanviccha tatra gacchāma yatra saḥ //