Mahabharata · Chapter 15.3

evaṃ prayatamānānāṃ vṛṣṇīnāmandhakaiḥ saha /
kālo gṛhāṇi sarveṣāṃ paricakrāma nityaśaḥ //

karālo vikaṭo muṇḍaḥ puruṣaḥ kṛṣṇapiṅgalaḥ /
gṛhāṇyāvekṣya vṛṣṇīnāṃ nādṛśyataṃ punaḥ kvacit //

tamaghnanta maheṣvāsāḥ śaraiḥ śatasahasraśaḥ /
na cāśakyata veddhuṃ sa sarvabhūtātyayastadā //

utpedire mahāvātā dāruṇāśca dinedine /
vṛṣṇyandhakavināśāya bahavo romaharṣaṇāḥ //

vivṛddhamūṣikā rathyā vibhinnamaṇikāstathā /
keśā nakhāśca suptānāmadyante mūṣikairniśi //

cīcīkūcīti vāśanti śārikā vṛṣṇiveśmasu /
nopaśāmyati śabdasya sadivārātrameva hi //

anvakurvannulūkānāṃ sārasā virutaṃ tathā /
ajāḥ śivānāṃ virutamanvakurvata bhārata //

pāṇḍurā raktapādāśca vihagāḥ kālacoditāḥ /
vṛṣṇyandhakānāṃ geheṣu kapotā vyacaraṃstadā //

vyajāyanta kharā goṣu karabhāśvatarīṣu ca /
śunīṣvapi biḍālāśca mūṣikā nakulīṣu ca //

nāpatrapanta pāpāni kurvanto vṛṣṇayastadā /
prārdayanbrāhmaṇāṃścāpi pitṝndevāṃstathaiva ca //

gurūṃścāpyavamanyante na tu rāmajanārdanau /
patnyaḥ patīnuccaranti patnīścaka patayastathā //

vibhāvasuḥ prajvalito vāmaṃ viparivartate /
nīlalohitamañjiṣṭhā visṛjannarciṣaḥ pṛthak //

udayāstamaye nityaṃ puryāṃ tasyāṃ divākaraḥ /
vyadṛśyatāsakṛtpumbhiḥ kabandhaiḥ parivāritaḥ //

mahānaseṣu siddheṣu saṃskṛte'tīvi bhārata /
āhāryamāṇe kṛmayo vyadṛśyanta sahasraśaḥ //

puṇyāhe vācyamāne tu japatsu ca mahātmasu /
abhidhāvantaḥ śrūyante na cādṛśyata kaścana //

parasparaṃ ca nakṣatraṃ hanyamānaṃ punaḥpunaḥ //
grahairapaśyansarve te nātmanastu kathañcana //

nadantaṃ pāñcijanyaṃ ca vṛṣṇandhakaniveśane /
samantātparyavāśanta rāsabhā dāruṇasvarāḥ //

evaṃ paśyanhṛṣikeśaḥ samprāptaṃ kālaparyayam /
trayodaśyāmamāvāsyāṃ tāndṛṣṭvā prābravīdidam //

caturdaśī pañcadaśī kṛteyaṃ rāhuṇā punaḥ /
prāpte vai bhārate yuddhe prāptā cādya kṣaṃyāya naḥ //

vimṛśanneva kālaṃ taṃ paricintya janārdanaḥ /
mene prāptaṃ sa ṣaṭtriṃśaṃ varṣaṃ vai keśisūdanaḥ //

putraśokābhisantaptā gāndhārī hatabāndhavā /
yadanuvyājahārārtā tadidaṃ samupāgamat //

idaṃ ca tadanuprāptamabravīdyadyudhiṣṭhiraḥ /
purā vyūḍheṣvanīkeṣu dṛṣṭvetpātānsudāruṇān //

ityuktvā vāsudevastu cikīrṣuḥ satyameva tat /
ājñāpayāmāsa tadā tīrthayātrāmarindamaḥ //

aghoṣayanta puruṣāstatra keśavaśāsanāt /
tīrthayātrā samudre vaḥ kāryeti puruṣarṣabhāḥ //