Mahabharata · Chapter 15.2

kathaṃ vinaṣṭā bhagavannandhakā vṛṣṇibhiḥ saha /
paśyato vāsudevasya bhojaścaivaka mahārathāḥ //
vaiśampāyana uvāca /

ṣaṭtriṃśe'tha tato varṣe vṛṣṇīnāmanayo mahān /
anyonyaṃ musalaiste tu nijaghnuḥ kālacoditāḥ //
janamejaya uvāca /

kenānuśaptāste vīrāḥ kṣayaṃ vṛṣṇyandhakā gatāḥ /
bhojāśca dvijavarya tvaṃ vistareṇa vadasva me //
vaiśampāyana uvāca /

viśvāmitraṃ ca kaṇvaṃ ca nāradaṃ ca tapodhanam /
sāraṇapramukhā vīrā dadṛśurdvārakāṃ gatān //

te vai sāmbaṃ puraskṛtya bhūṣayitvā striyaṃ yathā /
abruvannupasaṅgamy daivadaṇḍinipīḍitāḥ //

iyaṃ strī putrakāmasya babhroramitatejasaḥ /
ṛṣayaḥ sādhu jānīta kimiyaṃ janayiṣyati //

ityuktāste tadā rājanvipralambhapradharṣitāḥ /
pratyabuvaṃstānmunayo yattacchṛṇu narādhipa //

vṛṣṇyandhakavināśāya musalaṃ ghoramāyasam /
vāsudevasya dāyādaḥ sāmbo'yaṃ janayiṣyati //

yena yūyaṃ sudurvṛttā nṛśaṃsā jātamanyavaḥ /
ucchettāraḥ kulaṃ kṛtsnamṛte rāmajanārdanau //

samudraṃ yāsyati śrīmāṃstyaktvā dehaṃ halāyudhaḥ /
jaraḥkṛṣṇaṃ mahātmānaṃ śayānaṃ bhuvi bhetsyati //

ityabruvaṃstato rājanpralabdhāstairdurātmabhiḥ / munayaḥ krodharaktākṣāḥ samīkṣyātha parasparam /
tathoktvā munayaste tu yathāgatamatho yayuḥ //

athābravīttadā vṛṣṇīñśrutvaitanmadhusūdanaḥ /
antajño matimāṃstasya bhavitavyaṃ tatheti tān //

evamuktvā hṛṣīkeśaḥ praviveśa puraṃ tadā /
kṛtāntamanyathā naicchatkartuṃ sa jagataḥ prabhuḥ //

śvobhūte'tha tataḥ sāmbo musalaṃ tadasūkata vai /
yena vṛṣṇandhakakule puruṣā bhasmasātkṛtāḥ //

vṛṣṇyandhakavināśāya kinkarapratimaṃ mahat /
asūta sāpajaṃ ghoraṃ tacca rājñe nyavedayan //

viṣaṇṇarūpastadrājā sūkṣmaṃ cūrṇamakārayat /
taccūrṇaṃ sāgare cāpi prākṣipanpuruṣā nṛpa //

aghoṣayaṃśca nagare vacanādāhukasya te /
janārdanasya rāmasya babhroścaiva mahātmanaḥ //

adyaprabhṛti sarveṣu vṛṣṇyandhakakuleṣviha /
surāsavo na kartavyaḥ, sarvairnagaravāsibhiḥ //

yaśca no viditaṃ kuryātpeyaṃ kaścinnaraḥ kvacit /
jīvansa śūlamārohetsvayaṃ kṛtvā sabāndhavaḥ //

tato rājabhayātsarve niyamaṃ cakrire tadā /
narāḥ sāsanamājñāya tasya rājño mahātmanaḥ //