Mahabharata · Chapter 14.95

kosau nakularūpeṇa śirasā kāñcanena vai /
prāha mānuṣavadvācametatpṛṣṭo vadasva me //
vaiśampāyana uvāca /

etatpūrvaṃ na pṛṣṭo'haṃ na cāsmābhiḥ prabhāṣitam /
śrūyatāṃ nakulo yosau yathā vāktasya mānuṣī //

śrāddhaṃ sankalpayāmāsa jamadagniḥ purā kila /
homadhenustamāgācca svayameva dudoha tām //

tatpayaḥ sthapayāmāsa nave bhāṇḍe dṛḍhe śucau /
krodho nakularūpeṇa piṭharaṃ paryakarṣayat //

jijñāsustamṛṣiśreṣṭaṃ kiṃ kuryādvipriye kṛte /
iti sañcintya durmedhā dharṣayāmāsa tatpayaḥ //

tamājñāya muniḥ krodhaṃ naivāsya sa cukopa ha /
sa tu krodhastato rājanbrāhmaṇīṃ mūrtimāsthitaḥ //

jitosmīti bhṛguśreṣṭha bhṛgavo hyatiroṣaṇāḥ /
loke mithyāpravādoyaṃ yattvayā'smi vinirjitaḥ //

vaśe sthito'haṃ tvayyahya kṣamāvati mahātmani /
bibhemi tapasaḥ sādho prasādaṃ kuru me prabho //
jamadagniruvāca /

sākṣāddṛṣṭosi me kradha gaccha tvaṃ vigatajvaraḥ /
na tvayāpakṛtaṃ me'dya na ca me manyurasti vai //

yānsamuddiśya sankalpaḥ payasosya kṛto mayā /
pitaraste mahābhāgāstebhyo buddhyasva gamyatām //

ityukto jātasantrāsastatraivāntaradhīyata /
pitṝṇāmabhiṣaṅgācca nakulatvamupāgataḥ //

sa tānprasādayāmāsa śāpasyānto bhavediti /
taiścāpyuktaḥ kṣipandharmaṃ sāpasyāntamavāpsyati //

taiścokto yajñiyāndeśāndharmāraṇyaṃ tathaiva ca /
jugupsamāno dhāvansa taṃ yajñaṃ samupāsadat //

dharmaputramathākṣipya saktuprasthena tena saḥ /
muktaḥ sāpāttataḥ krodho dharmo hyāsīdyudhiṣṭhiraḥ //

evametattadā vṛttaṃ yajñe tasya mahātmanaḥ / paśyatāṃ cāpi nastatra nakulo'ntarhitastadā / //