Mahabharata · Chapter 14.94

dharmāgatena tyāgena bhagavansarvamasti cet /
etanme sarvamācakṣva kuśalo hyasi bhāṣitum //

tasyoñchavṛtteryadvṛttaṃ saktudāne phalaṃ mahat /
kathitaṃ tu mama brahmaṃstathyametadasaṃśayam //

kathaṃ hi sarvayajñeṣu niścayaḥ paramo bhavet /
etadarhasi me vaktuṃ nikhilena dvijarṣabha //
vaiśampāyana uvāca /

atrāpyudāharantīmamitihāsaṃ purātanam /
agastyasya mahāyajñe purāvṛttamarindama //

purā'gastyo mahātejā dīkṣāṃ dvādaśavārṣikīm /
praviveśa mahārāja sarvabhūtahite rataḥ //

tatrāgnikalpā hotāra āsansatre mahātmanaḥ /
mūlāhārāḥ phalāhārāścāśmakuṭṭā marīcipāḥ //

paripṛṣṭikā vaighasikāḥ prasaṅkhyānāstathaiva ca /
yatayo bhikṣavaścātra babhūvuḥ paryavasthitāḥ //

sarve pratyakṣadharmāṇo jitakrodhā jitendriyāḥ /
dame sthitāśca sarve te hiṃsādambhavivarjitāḥ //

vṛtte śuddhe sthitā nityamindriyaiścāpyabādhitāḥ /
upātiṣṭhanta taṃ yajñaṃ yajantaste maharṣayaḥ //

yathāśaktyā bhagavatā tadannaṃ samupārjitam /
tasminsatre tu yadvṛttaṃ yadyogyaṃ ca tadā'bhavat //

tathā hyanekairmunibhirmahāntaḥ kratavaḥ kṛtāḥ / evaṃvidhe tvagastyasya vartamāne tathā'dhvare /
na vavarṣa sahasrākṣastadā bharatasattama //

tataḥ karmāntare rājannagastyasya mahātmanaḥ /
katheyamabhinirvṛttā munīnāṃ bhāvitātmanām //

agastyo yajamānosau dadātyannaṃ vimatsaraḥ /
na ca varṣati parjanyaḥ kathamannaṃ bhaviṣyati //

satraṃ cedaṃ mahadviprā munerdvādaśavārṣikam /
na varṣiṣyati devaśca varṣāṇyetāni dvādaśa //

etadbhavantaḥ sañcintya maharṣerasya dhīmataḥ /
agastyasyātitapasaḥ kartumarhantyanugraham //

ityevamukte vacane tato'gastyaḥ pratāpavān /
provāca vākyaṃ sa tadā prasādya śirasā munīn //

yadi dvādaśavarṣāṇi na varṣiṣyati vāsavaḥ /
cintāyajñaṃ kariṣyāmi vidhireṣa sanātanaḥ //

yadi dvādaśavarṣāṇi na varṣiṣyati vāsavaḥ /
sparśayajñaṃ kariṣyāmi vidhireṣa sanātanaḥ //

yadi dvādaśavarṣāṇi na varṣiṣyati vāsavaḥ /
vyāyāmenāhariṣyāmi yajñānetānyatavrataḥ //

bījayajño mayā'yaṃ vai bahuvarṣasamācitaḥ /
bījairhitaṃ kariṣyāmi nātra vighno bhaviṣyati //

nedaṃ śakyaṃ vṛthā kartuṃ mama satraṃ kathañcana /
varṣiṣyatīha vā devo navā varṣaṃ bhaviṣyati //

athavā'bhyarthanāmindro na kariṣyati kāmataḥ /
svayamindro bhaviṣyāmi jīvayiṣyāmi ca prajāḥ //

yo yadāhārajātaśca sa tathaiva bhaviṣyati /
viśeṣaṃ caiva kartāsmi punaḥ punaratīva hi //

adyeha svarṇamabhyetu yaccānyadvasu durlabham /
triṣu lokeṣu yaccāsti tadihāgamyatāṃ svayam //

divyāścāpsarasāṃ saṅghā gandharvāśca sakinnarāḥ /
viśvāvasuśca ye cānye te'pyupāsantu me makham //

uttarebhyaḥ kurubhyaśca yatkiñcidvasu vidyate /
sarvaṃ tadiha yajñeṣu svayamevopatiṣṭhatu //

svargaḥ svargasadaścaivaka dharmaśca svayameva tu / ityukte sarvamevaitadabhavattapasā muneḥ /
tasya dīptāgnimahasastvagastyasyātitejasaḥ //

tataste munayo hṛṣṭā dadṛśustapaso balam /
vismitā vacanaṃ prāhuridaṃ sarve mahārthavat //

prītāḥ sma tava vākyena na tvicchāmastapovanam /
taireva yajñaistuṣṭāḥ sya nyāyenecchāmahe vayam //

yajñaṃ dīkṣāṃ tathā homānyaccānyanmṛgayāmahe / tayossandharṣitairyajñairnānyato mṛgayāmahe //

nyāyenopārjitāhārāḥ svakarmābhiratā vayam /
vedāṃśca brahmacaryeṇa nyāyataḥ prārthayāmahe //

nyāyenottarakālaṃ ca gṛhebhyo niḥsṛtā vayam /
dharmadṛṣṭairvidhidvāraistapastapsyāmahe vayam //

bhavataḥ samyagiṣṭā tu buddhirhisāvivarjitā /
etāmahiṃsā yajñeṣu brūyāstvaṃ satataṃ prabho //

prītāstato bhaviṣyāmo vayaṃ tu dvijasattama /
visarjitāḥ samāptau ca satrādasmādvrajāmahe //

tathā kathayatāṃ teṣāṃ devarājaḥ purandaraḥ /
vavarṣa sumahātejā dṛṣṭvā tasya tapobalam //

āsamāpteśca yajñasya tasyāmitaparākramaḥ /
nikāmavarṣī parjanyo babhūva janamejaya //

prasādayāmāsa ca tamagastyaṃ tridaśeśvaraḥ /
svayamabhyetya rājarṣe puraskṛtya bṛhaspatim //

tato yajñasamāptau tānvisasarja mahāmunīn /
agastyaḥ paramaprītaḥ pūjayitvā yathāvidhi //