Mahabharata · Chapter 14.90

śrapayitvā paśūnanyānvidhivaddvijasattamāḥ /
taṃ turaṅgaṃ yathāśāstramālabhanta dvijātayaḥ //

tataḥ sañjñapya turaganka vidhivadyājakarṣabhāḥ / upasaṃveśayāñcakrustatastāṃ drupadātmajām /
kalābhistisṛbhī rājanyathāvidhi manasvinīm //

uddhṛtya tu vapāṃ tasya yathāśāstraṃ dvijātayaḥ /
śrapayāmāsuravyagrā vidhivadbharatarṣabha //

taṃ vapādhūmagandhaṃ tu dharmarājaḥ sahānujaiḥ /
upājighradyathāsāstraṃ sarvapāpāpahaṃ tadā //

śiṣṭānyaṅgāni yānyāsaṃstasyāśvasya narādhipa /
tānyagrau juhuvurdhīrāḥ samastāḥ ṣoḍaśartvijaḥ //

saṃsthāpyaivaṃ tasya rājñastaṃ yajñaṃ śakratejasaḥ /
vyāsaḥ saśiṣyo bhagavānvardhayāmāsa taṃ nṛpam //

tato yudhiṣṭhiraḥ prādātsadasyebhyo yathāvidhi /
koṭīḥ sahasraṃ niṣkāṇāṃ vyāsāya tu vasundharām //

pratigṛhya dharāṃ rājanvyāsaḥ satyavatīsutaḥ /
abravīdbharataśreṣṭhaṃ dharmarājaṃ yudhiṣṭhiram //

vasudhā bhavatastveṣāṃ sannyastā rājasattama /
niṣkrayo dīyatāṃ mahyaṃ brāhmaṇā hi dhanārthinā //

yudhiṣṭhirastu tānviprānpratyuvāca mahāmanāḥ /
bhrātṛbhiḥ sahito dhīmānmadhye rājñāṃ mahātmanām //

aśvamedhe mahāyajñe pṛthivī dakṣiṇā smṛtā /
arjunena jitā ceyamṛtvigbhyaḥ prāpitā mayā //

vanaṃ pravekṣye viprāgryā vibhajadhvaṃ mahīmimām /
caturdhā pṛthivīṃ kṛtvā cāturhotrapramāṇataḥ //

nāhamādātumicchāmi brahmasvaṃ dvijasattamāḥ //
idaṃ nityaṃ mano viprā bhrātṝṇāṃ caiva me sadā //

ityuktavati tasmiṃstu bhrātaro draupadī ca sā /
evametaditi prāhustadabhūdromaharṣaṇam //

tato'ntarikṣe vāgāsītsādhusādhviti bhārata /
tathaiva dvijasaṅghānāṃ śaṃsatāṃ vibabhau svanaḥ //

dvaipāyanastathā kṛṣṇaḥ punareva yudhiṣṭhiram /
provāca madhye viprāṇāmidaṃ sampūjayanmuniḥ //

dattaiṣā bhavatā mahyaṃ tāṃ te pratidadāmyaham /
hiraṇyaṃ dīyatāmebhyo brāhmaṇebhyo dharā'stu te //

tato'bravīdvāsudevo dharmarājaṃ yudhiṣṭhiram /
yathā'ha bhagavānvyāsastathā tvaṃ kartumarhasi //

ityuktaḥ sa kuruśreṣṭhaḥ prītātmā bhrātṛbhiḥ saha /
koṭiṃ koṭiṃ gavāṃ prādāddakṣiṇāṃ triguṇīkṛtām //

na kariṣyati talloke kaścidanyo narādhipaḥ /
yatkṛtaṃ kururājena maruttasyānukurvatā //

pratigṛhya tu taddravyaṃ kṛṣṇadvaipāyano muniḥ /
ṛtvigbhyaḥ pradadau vidvāṃścaturdhā vyabhajaṃśca te //

dharaṇyā niṣkrayaṃ dattvā taddhiraṇyaṃ yudhiṣṭhiraḥ /
dūtapāpo jitasvargo mumude bhrātṛbhiḥ saha //

ṛtvijastamaparyantaṃ suvarṇanicayaṃ tathā /
vyabhajanta dvijātibhyo yathotsāhaṃ yathāsukham //

yajñavāṭe ca yatkiñciddhiraṇyaṃ savi bhūṣaṇam / toraṇāni ca yūpāṃśca ghaṭānpātrīstatheṣṭakāḥ /
yudhiṣṭhirābhyanujñātāḥ sarvaṃ tadvyabhajandvijāḥ //

anantaraṃ dvijātibhyaḥ kṣatriyā jahrire vasu / tathā viṭśūdrasaṅghāśca tathā'nye mlecchajātayaḥ /
kālena mahatā jahrustatsuvarṇaṃ tatastataḥ //

tataste brāhmaṇāḥ sarve muditā jagmurālayān /
tarpitā vasunā tena dharmirājena dhīmitā //

svamaṃśaṃ bhagavānvyāsaḥ kuntyai pādābhivāditaḥ /
pradadau tasya mahato hiraṇyasya mahādyutiḥ //

śvaśurātprītidāyaṃ taṃ prāpya sā prītamānasā /
cakāra puṇyakaṃ tena sumahatsaṅghaśaḥ pṛthā //

gatvā tvavabhṛthaṃ rājā vipāpmā bhrātṛbhiḥ saha /
sabhājyamānaḥ śuśubhe mahendrastridaśairiva //

pāṇ़ḍavāśca mahīpālaiḥ sametairabhisaṃvṛtāḥ /
aśobhanta mahārāja grahastārāgaṇairiva //

rājabhyopi tataḥ prādādratnāni vividhāni ca /
gajānaśvānalaṅkārāntriyo vāsāṃsi kāñcanam //

taddhanaughamaparyantaṃ pārthaḥ pārthivamaṇḍale /
visṛjañśuśubhe rājanyathā vaiśravaṇastathā //

ānīya ca tathā vīraṃ rājānaṃ babhruvāhanam /
pradāya vipulaṃ vittaṃ gṛhātprāsthāpayanattadā //

duḥśalāyāśca taṃ pautraṃ bālakaṃ bharatarṣabha /
svarājye'tha piturdhāmānsvasuḥ prītyā nvayeśayat //

nṛpatīṃścaiva tānsarvānsuvibhaktānsupūjitān /
prasthāpayāmāsa vaśī kururājo yudhiṣṭhiraḥ //

govindaṃ ca mahātmānaṃ baladevaṃ mahābalam /
tathā'nyānvṛṣṇivīrāṃśca pradyumnādyānsahasraśaḥ //

pūjayitvā mahārāja yathāvidhi mahādyutiḥ /
bhrātṛbhiḥ sahito rājā prāsthāparayadarindamaḥ //

evaṃ babhūva yajñaḥ sa dharmirājasya dhīmataḥ /
bahvannadhanaratnaughaḥ surāmaireyasāgaraḥ //

sarpiḥpaṅkā hradā yatra babhūvuścānnaparvatāḥ /
rasālakardamā nadyo babhūvurbharatarṣabha //

bhakṣyakhāṇḍavarāgāṇāṃ kriyatāṃ bhujyatāṃ tathā /
paśūnāṃ vadhyatāṃ caiva nāntaṃ dadṛśire janāḥ //

mattapramattamuditaṃ suprītayuvatījanam / mṛdaṅgaśaṅkhanādaisca manoramamabhūttadā /

dīyatāṃ bhujyatāṃ cāpi tatra śabdo mahānabhūt /
dīyatāṃ dīyatāṃ ceti divārātramavāritam //

taṃ mahotsavasankāśaṃ hṛṣṭapuṣṭajanākulam /
kathayanti sma puruṣā nānādeśanivāsinaḥ //

varṣitvā dhanadhārābhiḥ kāmai ratnai rasaistathā /
vipāpmā bharataśreṣṭhaḥ kṛtārthaḥ prāviśatpuram //