Mahabharata · Chapter 14.91
pitāmahasya me yajñe dharmarājasya dhīmataḥ /
yadāścaryamabhūtkiñcittadbhavānvaktumarhati //
vaiśampāyana uvāca /
śrūyatāṃ rājaśārdūla mahadāścaryamuttamam /
aśvamedhe mahāyajñe nivṛtte yadabhūtprabho //
tarpiteṣu dvijāgryeṣu jñātisambandhibandhuṣu /
dīnāndhakṛpaṇe vā'pi tadā bharatasattama //
ghuṣyamāṇe mahādāne dikṣu sarvāsu bhārata /
patatsu puṣpavarṣeṣu dharmarājasya mūrdhani //
bilānnissṛtya nakulo rukmapārśvastadā'naghaḥ /
vajrāśanisamaṃ nādamamuñcadvasudhādhipa //
sakṛdutsṛjya tannādaṃ trāsayāno mṛgadvijān /
mānupaṃ vacanaṃ prāha puṣpopariśayo mahān //
saktuprasthena vo nāyaṃ yajñastulyo narādhipāḥ /
ucchavṛttervadānyasya kurukṣetranivāsinaḥ //
tasya tadvacanaṃ śrutvā nakulasya viśāmpate /
vismayaṃ paramaṃ jagmuḥ sarve te brāhmaṇarṣabhāḥ //
tataḥ sametya nakulaṃ paryapṛcchanta te dvijāḥ //
kutastvaṃ samanuprāpto yajñaṃ sādhusamāgamam //
kiṃ balaṃ paramaṃ tubhyaṃ śrutaṃ kiṃ parāyaṇam /
kathaṃ bhavantaṃ vidyāma yo no yajñaṃ vigarhase //
avilupyāgamaṃ kṛtsnaṃ vividhairyajñiyaiḥ kṛtam /
yathāgamaṃ yathānyāyaṃ kartavyaṃ ca tathā kṛtam //
pūjārhāḥ pūjitāścātra vidhivacchāstradarśāt /
mantrāhutihutaścāgnirdattaṃ deyamamatsaram //
tuṣṭā dvijātayaścātra dānairbahuvidhairapi /
kṣatriyāści suyuddhena śrāddhaiścāpi pitāmahāḥ //
pālanena viśastuṣṭāḥ kāmaistuṣṭā varastriyaḥ /
anukrośaistatā śūdrā dānaśeṣaiḥ pṛthagjanāḥ //
jñātisambandhinastuṣṭāḥ śaucena ca nṛpasya naḥ /
devā havirbhiḥ puṇyaisca rakṣaṇaiḥ śaraṇāgatāḥ //
yadatra tathyaṃ tadbrūhi satyaṃsatyaṃ dvijātiṣu /
yathāśrutaṃ yathādṛṣṭaṃ pṛṣṭo brāhmaṇakāmyayā //
śraddheyavākyaḥ prājñastvaṃ divyaṃ rūpaṃ bibharṣi ca /
samāgataśca vipraistvaṃ tadbhavānvaktumarhati //
iti pṛṣṭo dvijaistaiḥ sa prahasannakulo'bravīt /
naiṣā mṛṣāmayā vāṇī proktā darpeṇa vā dvijāḥ //
yanmayoktamidaṃ vākyaṃ yuṣmābhiścāpyupaśrutam /
saktuprasthena vo nāyaṃ yajñastulyo dvijarṣabhāḥ //
ityavaśyaṃ mayaitadvo vaktavyaṃ dvijasattamāḥ /
śṛṇutāvyagramanasaḥ śaṃsato me yathātatham //
anubhūtaṃ ca dṛṣṭaṃ ca yanmayā'dbhutamuttamam /
uñchavṛttervadānyasya kurukṣetranivāsinaḥ //
svargaṃ yena dvijāḥ prāptaḥ sabhāryaḥ sasutasnuṣaḥ /
yathā cārdhaṃ śarīrasya mamedaṃ kāñcanīkṛtam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0