Mahabharata · Chapter 14.88

śrutaṃ priyamidaṃ kṛṣṇa yattvamarhasi bhāṣitum /
tanme'mṛtarasaṃ puṇyaṃ mano hlādayati prabho //

bahūni kila yuddhāni vijayasya narādhipaiḥ /
punarāsanhṛṣīkeśa tatratatreti na śrutam //

kinnimittaṃ sa nityaṃ hi pārthaḥ sukhavivarjitaḥ /
atīva vijayo dhīmāniti me dūyate manaḥ //

sañcintayāmi kaunteyaṃ raho jiṣṇuṃ janārdana /
atīva duḥkhabhāgī sa satataṃ pāṇḍunandanaḥ //

kinnu tasya śarīre'sti sarvalakṣaṇapūjite /
aniṣṭaṃ lakṣaṇaṃ kṛṣṇa yena duḥkhānyupāśnute //

atīvāsukhabhogī sa satataṃ kuntinandanaḥ / na hi paśyāmi bībhatsornindyaṃ gātreṣu kiñcana /
śrotavyaṃ cenmayaitadvai tanme vyākhyātumarhasi //

ityuktaḥ sa hṛṣīkeśo dhyātvā sumahadantaram /
rājānaṃ bhojarājanyavardhano viṣṇurabravīt //

na hyasya nṛpate kiñcidaniṣṭamupalakṣaye /
ṛte puruṣasiṃhasya piṇḍike'syādhike yataḥ //

sa tābhyāṃ puruṣavyāghro nityamadhvasu vartate /
na cānyadanupaśyāmi yenāsau duḥkhabhājanam //

ityuktaḥ puruṣaśreṣṭhastadā kṛṣṇena dhīmatā /
provāca vṛṣṇiśārdūlamevametaditi prabho //

kṛṣṇā tu draupdī kṛṣṇaṃ tiryaksāsūyamaikṣata pratijagrāha tasyāstaṃ praṇayaṃ cāpi keśihā /
prakhyuḥ sakhā hṛṣīkeśaḥ sākṣādiva dhanañjayaḥ //

tatra bhīmādayaste tu karavo yājakāśca ye /
remuḥ śrutvā vicitrāṃ tāṃ dhanañjayakathāṃ śubhām //

teṣāṃ kathayatāmeva puruṣo'rjunasankathāḥ /
upāyādvacanāddūto vijayasya mahātmanaḥ //

sobhigamya kuruśreṣṭhaṃ namaskṛtya ca buddhimān /
upāyātaṃ naravyāghraṃ phalgunaṃ pratyavedayat //

tacchrutvā nṛpatistasya harṣabāṣpākulekṣaṇaḥ /
priyākhyānanimittaṃ vai dadau bahudhanaṃ tadā //

tato dvitīye divase mahāñśabdo vyavardhata /
āgacchati naravyāghre kauravāṇāṃ dhurandhare //

tato reṇuḥ samudbhuto vibabhau tasya vājinaḥ /
abhito vartamānasya yathoccaiḥśravasastathā //

tatra harṣakarīrvāco narāṇāṃ śuśruve'rjunaḥ /
diṣṭyā'si pārtha kuśalī dhanyo rājā yudhiṣṭhiraḥ //

konyohi pṛthivīṃ kṛtsnāṃ jitvāhi yudhi pārthivān cārayitvā hayaśreṣṭhamupāgacchedṛte'rjunāt //

ye vyatītā mahātmāno rājānaḥ sagarādayaḥ /
teṣāmapīdṛśaṃ karma na kadācana śuśruma //

naitadanye kariṣyanti bhaviṣyā vasudhādhipāḥ /
yattvaṃ kurukulaśreṣṭha duṣkaraṃ kṛtavānasi //

ityevaṃ vadatāṃ teṣāṃ puṃsāṃ karṇasukhā giraḥ /
śṛṇvanviveśa dharmātmā phalguno yajñasaṃstaram //

tato rājā sahāmātyaḥ kṛṣṇaśca yadunandanaḥ /
dhṛtarāṣṭraṃ puraskṛtya taṃ pratyudyayatustadā //

so'bhivādya pituḥ pādau dharmarājasya dhīmataḥ /
bhīmādīṃścāpi sampūjya paryaṣvajata keśavam //

taiḥ sametyārcitastāṃśca pratyarcyātha yathāvidhi /
viśaśrāma mahābāhustīraṃ labdhveva pāragaḥ //