મહાભારત · અધ્યાય 14.88

શ્રુતં પ્રિયમિદં કૃષ્ણ યત્ત્વમર્હસિ ભાષિતુમ્ ।
તન્મેઽમૃતરસં પુણ્યં મનો હ્લાદયતિ પ્રભો ॥

બહૂનિ કિલ યુદ્ધાનિ વિજયસ્ય નરાધિપૈઃ ।
પુનરાસન્હૃષીકેશ તત્રતત્રેતિ ન શ્રુતમ્ ॥

કિન્નિમિત્તં સ નિત્યં હિ પાર્થઃ સુખવિવર્જિતઃ ।
અતીવ વિજયો ધીમાનિતિ મે દૂયતે મનઃ ॥

સઞ્ચિન્તયામિ કૌન્તેયં રહો જિષ્ણું જનાર્દન ।
અતીવ દુઃખભાગી સ સતતં પાણ્ડુનન્દનઃ ॥

કિન્નુ તસ્ય શરીરેઽસ્તિ સર્વલક્ષણપૂજિતે ।
અનિષ્ટં લક્ષણં કૃષ્ણ યેન દુઃખાન્યુપાશ્નુતે ॥

અતીવાસુખભોગી સ સતતં કુન્તિનન્દનઃ । ન હિ પશ્યામિ બીભત્સોર્નિન્દ્યં ગાત્રેષુ કિઞ્ચન ।
શ્રોતવ્યં ચેન્મયૈતદ્વૈ તન્મે વ્યાખ્યાતુમર્હસિ ॥

ઇત્યુક્તઃ સ હૃષીકેશો ધ્યાત્વા સુમહદન્તરમ્ ।
રાજાનં ભોજરાજન્યવર્ધનો વિષ્ણુરબ્રવીત્ ॥

ન હ્યસ્ય નૃપતે કિઞ્ચિદનિષ્ટમુપલક્ષયે ।
ઋતે પુરુષસિંહસ્ય પિણ્ડિકેઽસ્યાધિકે યતઃ ॥

સ તાભ્યાં પુરુષવ્યાઘ્રો નિત્યમધ્વસુ વર્તતે ।
ન ચાન્યદનુપશ્યામિ યેનાસૌ દુઃખભાજનમ્ ॥

ઇત્યુક્તઃ પુરુષશ્રેષ્ઠસ્તદા કૃષ્ણેન ધીમતા ।
પ્રોવાચ વૃષ્ણિશાર્દૂલમેવમેતદિતિ પ્રભો ॥

કૃષ્ણા તુ દ્રૌપ્દી કૃષ્ણં તિર્યક્સાસૂયમૈક્ષત પ્રતિજગ્રાહ તસ્યાસ્તં પ્રણયં ચાપિ કેશિહા ।
પ્રખ્યુઃ સખા હૃષીકેશઃ સાક્ષાદિવ ધનઞ્જયઃ ॥

તત્ર ભીમાદયસ્તે તુ કરવો યાજકાશ્ચ યે ।
રેમુઃ શ્રુત્વા વિચિત્રાં તાં ધનઞ્જયકથાં શુભામ્ ॥

તેષાં કથયતામેવ પુરુષોઽર્જુનસન્કથાઃ ।
ઉપાયાદ્વચનાદ્દૂતો વિજયસ્ય મહાત્મનઃ ॥

સોભિગમ્ય કુરુશ્રેષ્ઠં નમસ્કૃત્ય ચ બુદ્ધિમાન્ ।
ઉપાયાતં નરવ્યાઘ્રં ફલ્ગુનં પ્રત્યવેદયત્ ॥

તચ્છ્રુત્વા નૃપતિસ્તસ્ય હર્ષબાષ્પાકુલેક્ષણઃ ।
પ્રિયાખ્યાનનિમિત્તં વૈ દદૌ બહુધનં તદા ॥

તતો દ્વિતીયે દિવસે મહાઞ્શબ્દો વ્યવર્ધત ।
આગચ્છતિ નરવ્યાઘ્રે કૌરવાણાં ધુરન્ધરે ॥

તતો રેણુઃ સમુદ્ભુતો વિબભૌ તસ્ય વાજિનઃ ।
અભિતો વર્તમાનસ્ય યથોચ્ચૈઃશ્રવસસ્તથા ॥

તત્ર હર્ષકરીર્વાચો નરાણાં શુશ્રુવેઽર્જુનઃ ।
દિષ્ટ્યાઽસિ પાર્થ કુશલી ધન્યો રાજા યુધિષ્ઠિરઃ ॥

કોન્યોહિ પૃથિવીં કૃત્સ્નાં જિત્વાહિ યુધિ પાર્થિવાન્ ચારયિત્વા હયશ્રેષ્ઠમુપાગચ્છેદૃતેઽર્જુનાત્ ॥

યે વ્યતીતા મહાત્માનો રાજાનઃ સગરાદયઃ ।
તેષામપીદૃશં કર્મ ન કદાચન શુશ્રુમ ॥

નૈતદન્યે કરિષ્યન્તિ ભવિષ્યા વસુધાધિપાઃ ।
યત્ત્વં કુરુકુલશ્રેષ્ઠ દુષ્કરં કૃતવાનસિ ॥

ઇત્યેવં વદતાં તેષાં પુંસાં કર્ણસુખા ગિરઃ ।
શૃણ્વન્વિવેશ ધર્માત્મા ફલ્ગુનો યજ્ઞસંસ્તરમ્ ॥

તતો રાજા સહામાત્યઃ કૃષ્ણશ્ચ યદુનન્દનઃ ।
ધૃતરાષ્ટ્રં પુરસ્કૃત્ય તં પ્રત્યુદ્યયતુસ્તદા ॥

સોઽભિવાદ્ય પિતુઃ પાદૌ ધર્મરાજસ્ય ધીમતઃ ।
ભીમાદીંશ્ચાપિ સમ્પૂજ્ય પર્યષ્વજત કેશવમ્ ॥

તૈઃ સમેત્યાર્ચિતસ્તાંશ્ચ પ્રત્યર્ચ્યાથ યથાવિધિ ।
વિશશ્રામ મહાબાહુસ્તીરં લબ્ધ્વેવ પારગઃ ॥