Mahabharata · Chapter 14.87

samāgatānvedavido rājñaśca pṛthivīśvarān /
dṛṣṭvā yudhiṣṭhiro rājā bhīmasenamabhāṣata //

upayātā naravyāghrā ya ete pṛthivīśvarāḥ /
eteṣāṃ kriyatāṃ pūjā pūjārhā hi narādhipāḥ //

ityuktaḥ sa tathā cakre narendreṇa yaśasvinā /
bhīmaseno mahātejā yamābhyāṃ saha pāṇḍavaḥ //

athābhyagacchadgovindo vṛṣṇibhiḥ saha dharmajam /
baladevaṃ puraskṛtya sarvaprāṇabhūtāṃ varaḥ //

yuyudhānena sahitaḥ pradyumnena gadena ca /
niśaṭhenātha sāmbena tathaiva kṛtavarmaṇā //

teṣāmapi parāṃ pūjāṃ cakre bhīmo mahārathaḥ /
viviśuste ca veśmāni ratnavanti ca sarvaśaḥ //

yudhiṣṭhirasamīpe tu kathānte madhusūdanaḥ /
arjunaṃ kathayāmāsa bahusaṅgrāmakarśitam //

sa taṃ prapaccha kaunteyaḥ punaḥpunararindamam /
dharmajaḥ śakrajaṃ jiṣṇuṃ samācaṣṭa jagatpatiḥ //

āgamaddvārakāvāsī samāptaḥ puruṣo nṛpa /
yo'drākṣītpāṇḍavaśreṣṭha bahusaṅgrāmakarśitam //

samīpe ca mahābāhumācaṣṭa ca mama prabho /
kuru kāryāṇi kaunteya hayamedhārthasiddhaye //

ityuktaḥ pratyuvācainaṃ dharmarājo yudhiṣṭhiraḥ /
diṣṭyā sa kuśalī jiṣṇurupāyāti ca mādhava //

yadidaṃ sandideśāsminpāṇḍavānāṃ balāgraṇīḥ /
tadākhyātamihecchāmi bhavatā yadunandana //

ityukto dharmarājena vṛṣṇyandhakapatistadā /
provācedaṃ vaco vāgmī dharmātmānaṃ yudhiṣṭhiram //

idamāha mahārāja pārthavākyaṃ nareśvaraḥ /
vācyo yudhiṣṭhiraḥ kṛṣṇa kāle vākyamidaṃ mama //

āgamiṣyanti rājānaḥ sarve vai kauravarṣabha /
prāptānāṃ mahatāṃ pūjā kāryā hyetatkṣamaṃ hi naḥ //

ityetadvacanādrājā vijñāpyo mama mānada /
tathā cātyayikaṃ na syādyadarghāharaṇe'bhavat //

kartumarhati tadrājā bhavāṃścāpyanumanyatām /
rājadveṣānna naśyeyurimā rājanpunaḥ prajāḥ //

idamanyacca kaunteya vacaḥ sa puruṣo'bravīt /
dhanañjayasya nṛpate tanme nigadataḥ śṛṇu //

upayāsyati yajñaṃ no maṇalūrapatirnṛpaḥ /
putro mama mahātejā dayito babhruvāhanaḥ //

taṃ bhavānmadapekṣārthaṃ vidhivatpratipūjayet /
sa tu bhakto'nuraktaśca mama nityamiti prabho //

ityetadvacanaṃ śrutvā dharmarājo yudhiṣṭhiraḥ /
abhinandyāsya tadvākyamidaṃ vacanamabravīt //