Mahabharata · Chapter 14.86

nyavartata tato vājī yena nāgāhvayaṃ puram / taṃ nivṛttaṃ tu śuśrāva cāreṇaiva yudhiṣṭhiraḥ /
śrutvā'rjunaṃ kuśalinaṃ sa ca hṛṣṭamanā'bhavat //

vijayasya ca tatkarma gāndhāraviṣaye tadā /
śrutvā cānyeṣu deśeṣu sa suprīto'bhavattadā //

etasminneva kāle tu dvādaśīṃ māghamāsikīm /
iṣṭaṃ gṛhītvā nakṣatraṃ dharmarājo yudhiṣṭhiraḥ //

samānīya mahātejāḥ sarvānbhrātṝnmahīpatiḥ /
bhīmaṃ ca nakulaṃ caiva sahadevaṃ ca kaurava //

provācedaṃ vacaḥ kāle tadā dharmabhṛtāṃvaraḥ /
āmantrya vadatāṃ śreṣṭho bhīmaṃ praharatāṃ varam //

āyāti bhīmasenāsau sahāśvena tavānujaḥ /
yathā me puruṣāḥ prāhurye dhanañjayasāriṇaḥ //

upasthitaśca kālo'yamabhito vartate hayaḥ /
māghī ca paurṇamāsīyaṃ māsaḥ śeṣo vṛkodara //

tatprasthāpyantu vidvāṃso brāhmaṇā vedapāragāḥ /
vājimedhārthasiddhyarthaṃ deśaṃ paśyantu yajñiyam //

ityuktaḥ sa tu taccakre bhīmo nṛpatiśāsanam /
hṛṣṭaḥ śrutvā guḍokeśamāyāntaṃ puruṣarṣabham //

tato yayau bhīmasenaḥ prājñaiḥ sthapatibhiḥ saha /
brāhmaṇānagrataḥ kṛtvā kuśalānyajñakarmaṇi //

taṃ sasālacayaṃ śrīmatsapratolīsughaṭṭitam /
māpayāmāsa kauravyo yajñavāṭaṃ yatāvidhi //

prāsādaśatasambandhaṃ maṇipravarakuṭṭimam / sadaḥ sa patnīsadanaṃ sāgnīdhramapi cottaram /
kārayāmāsa vidivaddhemaratnavibhūṣitam //

stambhānkanakacitrāṃśca toraṇāni bṛhanti ca /
yajñāyatanadeśeśu dattvā śuddhaṃ ca kāñcanam //

antaḥpurāṇāṃ rājñāṃ ca nānādeśasamīyuṣām /
kārayāmāsa dharmātmā tatratatra yathāvidhi //

brāhmaṇānāṃ na veśmāni nānādeśasamīyuṣām /
kārayāmāsa kaunteyo vidhivattānyanekaśaḥ //

tathā sampreṣayāmāsa dūtānnṛpatiśāsanāt /
bhīmaseno mahābāho rājñāmakliṣṭakarmaṇām //

te priyārthaṃ kurupaterāyayurnṛpasattama /
ratnānyanekānyādāya striyo'śvānāyudhāni ca //

teṣāṃ nirviśatāṃ teṣu śibireṣu mahātmanām /
nardataḥ sāgarasyeva divaspṛgabhavatsvanaḥ //

pratyudgamya namaskṛtya brāhmaṇāṃśca nyavedayat //

teṣāmabhyāgatānāṃ ca sa rājā kuruvardhanaḥ /
vyādideśānnapānāni śayyāścāpyatimānuṣāḥ //

vāhanānāṃ ca vividhāḥ śālāḥ śālīkṣugorasaiḥ /
upetā bharataśreṣṭho vyādideśa sa dharmarāṭ //

varṇāḥ pṛthaksanniviṣṭā hyuttarottarapūjitāḥ / tathā tasminmahāyajñe dharmarājasya dhīmataḥ /
samājagmurmunigaṇā bahavo brahmavādinaḥ //

ye ca dvijātipravarāstatrāsanpṛthivīpate /
samājagmuḥ saśiṣyāṃstānpratijagrāha kauravaḥ //

sarvāṃśca tānanuyayau yāvadāvasathānprati /
svayameva mahātejā dambhaṃ tyaktvā yudhiṣṭhiraḥ //

tataḥ kṛtvā sthapatayaḥ śilpino'nye ca ye tadā /
kṛtsnaṃ yajñavidhiṃ rājandharmarāje nyavedayana //

tacchrutvā dharmarājastu kṛtaṃ sarvamatandritaḥ /
hṛṣṭarūpo'bhavadrājansaha bhrātṛbhirādṛtaḥ //

tasminyajñe pravṛtte tu vāgmino hetuvādinaḥ /
hetuvādānbahūnāhuḥ parasparajigīṣavaḥ //

dadṛśustaṃ nṛpatayo yajñasya vidhimuttamam /
devendrasyeva vihitaṃ bhīmasenena bhārata //

dadṛśustoraṇānyatra śātakumbhamayāni te /
śayyāsanavihārāṃśca subahūnratnasañcayān //

ghaṭānpātrīḥ kaṭāhāni kalaśānvardhamānakān /
na hi kiñcidasauvarṇamapaśyanvasudhādhipāḥ //

yūpāṃśca śāstrapaṭhitāndāravānhemabhūṣitān /
upaklṛptānyathākālaṃ vidhivadbhūrivarcasaḥ //

sthalajāka jalajā ye ca paśavaḥ kecana prabho /
sarvāneva samānītānapaśyaṃstatra te nṛpāḥ //

gāścaiva mahiṣīścaiva tathā vṛddhastriyopi ca /
audakāni ca satvāni śvāpadāni vayāṃsi ca //

jarāyujāṇḍajātāni svedajānyudbhidāni ca /
parvatānūpajātāni bhūtāni dadṛśuśca te //

evaṃ pramuditaṃ sarvaṃ paśugodhanadhānyataḥ /
yajñavāṭaṃ nṛpā dṛṣṭvā paraṃ vismayamāgatāḥ //

aniśaṃ dīyate ca sma tatra bhojyaṃ pṛthagvidham // brāhmaṇānāṃ viśāṃ caiva bahumṛṣṭānnamṛddhimat //

pūrṇe śatasahasre tu viprāṇāṃ tatri bhuñjatām / dundubhirmeghanirghoṣo muhurmuhuratāḍyata /
vinanādāsakṛccāpi divasedivase gate //

evaṃ sa vavṛte yajño dharmarājasya dhīmataḥ / annasya subahūnrājannutsargānparvatopamān /
dadhikulyāśaaca dadṛśuḥ sarpiṣaśca hradāñjanāḥ //

jambūdvīpo hi sakalo nānajanapadāyutaḥ /
rājannadṛsyataikastho rājñastasya mahāmakhe //

tatra jātisahasrāṇi puruṣāṇāṃ tatastataḥ /
gṛhītvā dhamājagmurbahūni bharatarṣabha //

sragviṇaśtāpi te sarve sumuṣṭamaṇikuṇḍalāḥ /
paryaveṣandvijātīṃstāñśataśo'tha sahasraśaḥ //

vividhānyannapānāni puruṣā ye'nuyāyinaḥ /
te vai nṛpopabhojyāni brāhmaṇānāṃ daduśca ha //