Mahabharata · Chapter 14.85

śakunastanayo vīro gāndhārāṇāṃ mahārathaḥ / pratyudyayau guḍākeśaṃ sainyena mahatā vṛtaḥ /
hastyaśvarathayuktena patākādhvajamālinā //

amṛṣyamāṇāste yodhā nṛpasya śakunervadham /
abhyayuḥ sahitāḥ pārthaṃ pragṛhītaśarāsanāḥ //

sa tānuvāca dharmātmā bībhatsuraparājitaḥ /
yudhiṣṭirasya vacanaṃ na ca te jagṛhurhitam //

vāryamāṇāstu pārthena sāntvapūrvamamarṣitāḥ /
parivārya hayaṃ jagmustataścukrodha pāṇḍavaḥ //

tataḥ śirāṃsi dīptāgraisteṣāṃ ciccheda pāṇḍavaḥ /
kṣurairgāṇḍīvanirmuktairnātiyatnādivārjunaḥ //

te vadhyamānāḥ pārtheni hayamutsṛjya sampramāt /
nyavartanta mahārāja śaravarṣārditā bhṛśam //

vitudyamānastaiścāpi gāndhāraiḥ pāṇḍunandanaḥ /
ādisyādiśya tejasvī parānetānavārayat //

vadhyamāneṣu teṣvājau gāndhāreṣu samantataḥ /
sa rājā śakuneḥ putraḥ pāṇḍavaṃ pratyavārayat //

taṃ yudhyamānaṃ rājānaṃ kṣatradharme vyavasthitam /
pārtho'bravīnna me vadhyā rājāno rājasāsanāt //

alaṃ yuddhena te vīra na te'stvadya parājayaḥ / ityuktastadanādṛtya vākyamajñānamohitaḥ /
sa śakrasamakarmāṇaṃ samāvākiradāśugaiḥ //

tasy pārthaḥ śirastrāṇamardhacandreṇa patriṇā /
apāharadameyātmā jayadrathaśiro yathā //

taṃ dṛṣṭvā vismayaṃ jagmurgāndhārāḥ sarva eva te /
icchatā tena na hato rājetyapi ca te viduḥ //

gāndhārarājaputrastu palāyanakṛtakṣaṇaḥ / yayau taireva sahitastrastaiḥ kṣudramṛgairiva /

teṣāṃ tu tarasā pārthastatraiva paridāvatām /
prajahārottamāṅgāni bhallaiḥ sannataparvabhiḥ //

ucchritāṃstu bhujānkecinnābudhyanta śarairhṛtān /
śarairgāṇḍīvanirmuktaiḥ pṛthubhiḥ pārthacoditaiḥ //

sambhrāntanaranāgāśvamapatadvidrutaṃ balam /
hatavidrutabhūyiṣṭhamāvartata muhurmuhuḥ //

nābhyadṛsyanta vīrasya kecidagre'gryakarmaṇaḥ /
ripavaḥ pātyamānā vai ye saheranmahāśarān //

tato gāndhārarājasya mantrivṛddhapuraḥsarā /
jananī niryayau bhītā puraskṛtyārghyamuttamam //

sā nyavārayadavyagrā taṃ putraṃ yuddhadurmadam /
prasādayāmāsa ca taṃ jiṣṇumakliṣṭakāriṇam //

tāṃ pūjayitvā bībhatsuḥ prasādamakarotprabhuḥ /
śakuneścāpi tanayaṃ sāntvayannidamabravīt //

na me priyaṃ mahābāho yatte buddhiriyaṃ kṛtā /
pratiyoddhumamitraghna bhrātaiva tvaṃ mamānagha //

gāndhārīṃ mātaraṃ smṛtvā dhṛtarāṣṭrakṛtena ca /
tena jīvasi rājaṃstvaṃ nihatāstvanugāstava //

maivaṃ bhūḥ śāmyatāṃ vairaṃ mā te'bhūdbuddhirīdṛśī āgantavyaṃ parāṃ caitrīmaśvamedhe nṛpasya naḥ //

ityuktvā'nuyayau pārtho hayaṃ taṃ kāmacāriṇam /
te nyavartanta gāndhārā hataśiṣṭāḥ svakaṃ puram //