Mahabharata · Chapter 14.83

sa tu vājī samudrāntāṃ paryetya vasudhāmimām /
nivṛtto'bhimukho rājanyena vāraṇasāhvayam //

anugacchaṃśca turagaṃ nivṛtto'tha kirīṭabhṛt /
yadṛcchayā samāpede puraṃ rājagṛhaṃ tadā //

tamabhyāśagataṃ dṛṣṭvā sahadevātmajaḥ prabho /
kṣatradharme sthito vīraḥ samarāyājuhāva ha //

tataḥ purātsa niṣkramya rathī dhanvī śarī talī /
meghasandhiḥ padātiṃ taṃ dhanañjayamupādravat //

āsādya ca mahātejā meghasandhirdhanañjayam /
bālabhāvānmahārāja provācedaṃ na kauśalāt //

kimayaṃ cāryate vājī sitrīmadhya iva bhārata /
hayamenaṃ hariṣyāmi prayatasva vimokṣaṇe //

adattānunayo yuddhe yadi tvaṃ pitṛbhirmama /
kariṣyāmi tavātithyaṃ prahara praharāmi ca //

ityuktaḥ pratyuvācainaṃ prahasanniva pāṇḍavaḥ /
vighnakartā mayā vārya iti me vratamāhitam //

bhrātrā jyeṣṭhena nṛpate tavāpi viditaṃ dhruvam /
praharasva yathāśakti na manyurvidyate mama //

ityuktaḥ prāharatpūrvaṃ pāṇḍavaṃ magadhesvaraḥ /
kirañśarasahasrāṇi varṣāṇīva sahasradṛk //

tato gāṇḍīvabhṛcchūro gāṇḍīvaprahitaiḥ śaraiḥ /
cakāra moghāṃstānbāṇānsayatnānbharatarṣabha //

sa moghaṃ tasya bāṇaughaṃ kṛtvā vānaraketanaḥ /
śarātmumoca jvalitāndīptāsyāniva pannagān //

dhvaje patākādaṇḍeṣu rathe yantre hayeṣu ca /
anyeṣu ca rathāṅgeṣu na śarīre na sārathau //

saṃrakṣyamāṇaḥ pārthena śarīre savyasācinā /
manyamānaḥ svavīryaṃ tanmāgadhaḥ prāhiṇoccharān //

tato gāṇḍīvadhanvā tu māgadhena bhṛśāhataḥ /
babhau vasantasamaye palāsaḥ puṣpito yathā //

avadhyamānaḥ so'bhyaghnanmāgadhaḥ pāṇḍavarṣabham /
tena tasthau sa kauravya lokavīrasya darśane //

savyasācī tu sankruddho vikṛṣya balavaddhanuḥ /
hayāṃścakāra nirjīvānsāratheśca śiro'harat //

dhanuścāsya mahaccitraṃ kṣureṇa pracakarta ha /
hastāvāpaṃ patākāṃ ca dhvajaṃ cāsyanyapātayat //

sa rājā vyathito vyaśvo vidhanurhatasārathiḥ /
gadāmādāya kaunteyamabhidradrāva vegavān //

tasyāpatata evāśu gadāṃ hemapariṣkṛtām /
śaraiścakarta bahudhā bahubhirgṛdhravājitaiḥ //

sā gadā śakalībhūtā viśīrṇimaṇibandhanā /
vyālī vimucyamānena papāta dharaṇītale //

virathaṃ vidhanuṣkaṃ ca gadayā parivarjitam /
naicchattāḍayituṃ dhīmānarjunaḥ samarāgraṇīḥ //

tata enaṃ vimanasaṃ kṣatradharme vyavasthitam // sāntvapūrvamidaṃ vākyamabravītkapiketanaḥ //

paryāptaḥ kṣatradharmo'yaṃ darśitaḥ putra gamyatām /
bahvetatsamare karma tava bālasya pārthiva //

yudhiṣṭhirasya sandeśo na hantavyā nṛpā iti /
tena jīvasi rājaṃstvamaparāddho'pi me raṇe //

iti matvā tadā'tmānaṃ pratyādiṣṭaṃ sma māgadhaḥ /
tathyamityabhigamyainaṃ prāñjaliḥ pratyapūjayat //

parijitosmi bhadraṃ te nāhaṃ yoddhumihotsahe /
yadyatkṛtyaṃ mayā te'dya tadbrūhi kṛtameva tu //

tamarjunaḥ samāśvāsya punarevedamabravīt /
āgantavyaṃ parāṃ caitrīmaśvamedhe nṛpasya naḥ //

ityuktaḥ sa tathetyuktvā pūjayamāsa taṃ hayam /
phalgunaṃ ca yudhiśreṣṭhaṃ vidivatsahadevajaḥ //

tato yatheṣṭamagamatpunareva sa kauravaḥ /
tataḥ samudratīreṇa vaṅgānpuṇḍrānsakeralān //

tatratatra ca bhūrīṇi mlecchasainyānyanekaśaḥ /
vijigye dhanuṣā rājangāṇḍīvena dhanañjayaḥ //