Mahabharata · Chapter 14.84

māgadhenārcito rājanpāṇḍavaḥ śvetavāhanaḥ /
dakṣiṇāṃ diśamāsthāya cārayāmāsa taṃ hayam //

tataḥ sa punarāvartya hayaḥ kāmacaro balī /
āsasāda purīṃ ramyāṃ cedīnāṃ śuktisāhvayām //

śarabheṇārcitastatra śiśupālasutena saḥ /
yuddhapūrvaṃ tadā tena pūjayā ca mahābalaḥ //

tato'rcito yayau rājaṃstadā sa turagottamaḥ /
kāśīnaṅgānkosalāṃśca kirātānātha taṅgaṇāt //

pūjāṃ tatra yathānyāyaṃ pratigṛhya dhanañjayaḥ /
punarāvṛttya kaunteyo daśārṇānagamattadā //

tatra citrāṅgado nāma balavānarimardanaḥ /
tena yuddhamabhūttasya vijayasyātibhairavam //

taṃ cāpi vaśamānīya kirīṭī puruṣarṣabhaḥ /
niṣādarājño viṣayamekalavyasya jagmivān //

ekalavyasutaścainaṃ yuddheni jagṛhe tadā /
tatra cakre niṣādaiḥ sa sagrāmaṃ romaharṣaṇam //

tatastamapi kaunteyaḥ samareṣvaparājitaḥ //
jigāya yudhi durdharṣo yajñavighnārthamāgatam //

sa taṃ jitvā mahārāja naiṣādiṃ pākaśāsaniḥ /
arcitaḥ prayayau bhūyo dakṣiṇaṃ salilārṇavam //

tatrāpi dravīḍairāndhrai raudrairmāhiṣakairapi /
tathā kollagireyaiśca yuddhamāsīnkirīṭinaḥ //

tāṃścāpi vijayo jitvā nātitīvreṇa karmaṇā / turaṅgamavaśenātha surāṣṭrānabhito yayau /
gokarṇamatha cāsādya prabhāsamapi jagmivān //

tato dvāravatīṃ ramyāṃ vṛṣṇivīrābhipālitām /
āsasāda hayaḥ śrīmānkururājasya yajñiyaḥ //

tamunmathya hayaśreṣṭhaṃ yādavānāṃ kumārakāḥ /
prayayustāṃstadā rājannugraseno nyavārayat //

tataḥ purādviniṣkramya vṛṣṇyandhakapatistadā /
sahito vāsudevena mātulena kirīṭinaḥ //

tau sametya kuruśreṣṭhaṃ vidhivatprītipūrvakam / parayā bhārataśreṣṭhaṃ pūjayā samavasthitau /
tatastābhyāmanujñāto yatayau yena hayo gataḥ //

tataḥ sa paścimaṃ deśaṃ samudrasya tadā hayaḥ /
krameṇi vyacaratsphītaṃ tataḥ pañcanadaṃ yayau //

tasmādapi sa kauravya gandhāraviṣayaṃ hayaḥ /
vicacāra yathākāmaṃ kaunteyānugatastadā //

tato gāndhārarājena yuddhamāsītkirīṭinaḥ /
ghoraṃ śakuniputreṇa pūrvavairānusāriṇā //