Mahabharata · Chapter 14.82

kimāgamanakṛtyaṃ te kauravyakulanandini /
maṇalūrapatermātustathaiva ca raṇājire //

kaccitkuśalakāmāsi rājño'sya bhujagātmaje /
mama vā capalāpāṅgi kaccitvaṃ śubhamicchasi //

kaccitte pṛthulaśroṇi nāpriyaṃ priyadarśane /
akārṣamahamajñānādayaṃ vā babhruvāhanaḥ //

kaccinnu rājapūtrī te sapatnī caitravāhanī /
citrāṅgadā varārohā nāparādhyati kiñcana //

tamuvācoragapaterduhitā prahasantyatha / na me tvamaparāddhosi na hi me babhruvāhanaḥ /
na janitrī tathā'syeyaṃ mama yo preṣyavatthitā //

śrūyatāṃ yadyathā cedaṃ mayā sarvaṃ viceṣṭitam /
na me kopastvayā kāryaḥ śirasā tvāṃ prasādaye //

tvatpriyārthaṃ hi kauravya kṛtametanmayā vibho /
yattacchṛṇu mahābāho nikhilena dhanañjaya //

mahābhāratayuddhe yattvayā śāntanavo nṛpaḥ /
adharmeṇa hataḥ pārtha tasyaiṣā niṣkṛtiḥ kṛtā //

na hi bhīṣmastvayā vīra yuddhyamāno hi pātitaḥ /
śikhaṇḍinā tu saṃyuktastamāśritya hatastvayā //

tasya śāntimakṛtvā tvaṃ tyajethā yadi jīvitam / karmaṇā tena pāpena patethā niraye dhruvam /
eṣā tu vihitā śāntiḥ putrādyāṃ prāptavānasi //

vasubhirvasudhāpāla gaṅgayā ca mahāmate /
purā hi śrutametatte vasubhiḥ kathitaṃ mayā //

gaṅgāyāstīramāśritya hate śāntanave nṛpa / āplutya devā vasavaḥ sametya ca mahānadīm /
idamūcurvaco ghoraṃ bhāgīrathyā mate tadā //

eṣa śāntanavo bhīṣmo nihataḥ savyasācinā /
ayuddhyamānaḥ saṅgrāme saṃsakto'nyena bhāmini //

tadanenānuṣaṅgeṇa vayamadya dhanañjayam /
śāpena yojayāmeti tathā'stviti ca sā'bravīt //

tadahaṃ piturāvedya praviśya vyathitendriyā /
abhavaṃ sa ca tacchrutvā viṣādamagamatparam //

pitā tu me vasūngatvā tvadarthe samayācata /
punaḥ punaḥ prasādyaitāṃsta enamidamabruvan //

putrastasya mahābhāga maṇalūreśvaro yuvā /
sa enaṃ raṇamadhyasthaḥ śaraiḥ pātayitā bhuvi //

evaṃ kṛte sa nāgendra muktaśāpo bhaviṣyati /
gaccheti vasubhiścokto mama cedaṃ śaśaṃsa saḥ //

tacchrutvā tvaṃ mayā tasmācchāpādasi vimokṣitaḥ /
na hi tvāṃ devarājo'pi samareṣu parājayet //

ātmā putraḥ smṛtastasmāttenehāsi parājitaḥ /
na hi doṣo mama mataḥ kathaṃ vā manyase vibho //

ityevamukto vijayaḥ prasannātmā'bravīdidam /
sarvaṃ me supriyaṃ devi yadetatkṛtavatyasi //

ityuktvā so'bravītputraṃ maṇalūrapatiṃ jayaḥ /
citrāṅgadāyāḥ śṛṇvantyāḥ kauravyaduhitustadā //

yudhiṣṭhirasyāśvamedhaḥ paricaitrīṃ bhaviṣyati /
tatrāgaccheḥ sahāmātyo mātṛbhyāṃ sahito nṛpa //

ityevamuktaḥ pārthena sa rājā babhruvāhanaḥ /
uvāca pitaraṃ dhīmānidamasrāvilekṣaṇaḥ //

upayāsyāmi dharmajña bhavataḥ sāsanādaham /
aśvamedhe mahāyajñe dvijātipariveṣakaḥ //

mama tvanugrahārthāya praviśasva puraṃ svakam /
bhāryābhyāṃ saha dharmajña mābhūtte'tra vicāraṇā //

uṣitveha niśāmekāṃ sukhaṃ svabhavane prabho /
punaraśvānugamanaṃ kartāsi jayatāṃvara //

ityuktāḥ sa tu pratreṇa tadā vānaraketanaḥ /
smayanprovāca kaunteyastadā citrāṅgadāsutam //

viditaṃ te mahābāho yathā dīkṣāṃ carāmyaham /
na sa tāvatpravekṣyāmi puraṃ te pṛthulocana //

yathākāmaṃ vrajatyeṣa yajñiyāśvo nararṣabha /
svasti te'stu gamiṣyāmi na sthānaṃ vidyate mama //
vaiśampāyana uvāca /

sa tatra vidhivattena pūjitaḥ pākaśāsaniḥ /

bhāryābhyāmabhyanujñātaḥ prāyādbharatasattamaḥ //