Mahabharata · Chapter 14.77

jitvā prasādya rājānaṃ bhagadattasutaṃ tadā / visṛjya yāte turage saindhavānprati bhārata //

saindhavairabhavagadyuddhaṃ tatastasya kirīṭinaḥ /
hataśeṣairmahārāja hatānāṃ ca sutairapi //

te'vatīrṇamupaśrutya viṣayaṃ śvetavāhanam /
pratyudyayuramṛṣyante rājānaḥ pāṇḍavarṣabham //

aśvaṃ ca taṃ parāmṛśya viṣayānte viṣopamāt /
na bhayaṃ cakrire pārthādbhīmasenādanantarāt //

te'vidūrāddhanuṣpāṇiṃ yajñiyasya hayasya ca /
bībhatsuṃ pratyapadyant padātinamavasthitam //

tataste taṃ mahāvīryā rājānaḥ paryavārayan /
jigīṣanto naravyāghraṃ pūrvaṃ vinikṛtā yudhi //

te nāmānyapi gotrāṇi karmaṇi vividhāni ca /
kīrtayantastadā pārthaṃ śaravarṣairavākiran //

te kirantaḥ śaravrātānvāraṇaprativāraṇān /
raṇe jayamabhīpsantaḥ kaunteyaṃ paryavārayan //

te samīkṣya ca taṃ kṛṣṇamugrakarmāṇamāhave /
sarve yuyudhire vīrā rathasthāstaṃ padātinam //

te tamājaghnire vīraṃ nivātakavacāntakam /
saṃśaptakanihantāraṃ hantāraṃ saindhavasya ca //

tato rathasahasreṇa gajānāmayutena ca /
***ṣṭhakīkṛtya bībhatsuṃ prahṛṣṭamanaso'bhavan //

** smaranto vadhaṃ vīrāḥ sindhurājasya cāhave /
jayadrathasya kauravya samare savyasācinā //

tataḥ parjanyavatsarve śaravṛṣṭīravāsṛjan /
taiḥ kīrṇaḥ śuśubhe pārtho ravirmeghāntare yathā //

sa śaraiḥ samavacchannaścakāśe pāṇḍavarṣabhaḥ /
pañcarāntarasañcārī śakunta iva bhārata //

tato hāhākṛtaṃ sarvaṃ kaunteya śarapīḍite /
trailokyamabhavadrājanravirāsīdrajoruṇaḥ //

tato vavau mahārāja māruto romaharṣaṇaḥ /
rāhuragrasadādityaṃ parvaṇīva viśāmpate //

ulkāśca jaghnire sūryaṃ vikīryantyaḥ samantataḥ /
vepathuścābhavadrājankailāsasya mahāgireḥ //

mumucuḥ śvāsamatyuṣṇaṃ duḥkhaśokasamanvitāḥ /
saptarṣayo jātabhayāstathā devarṣayopi ca //

śaśaṃ cāśu vinirbhidya maṇḍalaṃ śaśino'patan /
viparītā diśaścāpi sarvā dhūmākulāstathā //

rāsabhāruṇasaṅkāśā dhanuṣmantaḥ savidyutaḥ /
āvṛtya gaganaṃ meghā mumucurmāṃsaśoṇitam //

evamāsīttadā vīre śaravarṣeṇa saṃvṛte /
phalgune bharataśreṣṭha tadadbhutamivābhavat //

tasya tenāvakīrṇasya śarajālena sarvataḥ /
mohātpapāta gāṇḍīvamāvāpaśca karādapi //

tasminmohamanuprāpte śarajālaṃ mahattadā /
saindhavā mumucustūrṇaṃ gatasatve mahārathe //

tato mohaṃ samāpannaṃ jñātvā pārthaṃ dvivaukasaḥ /
sarve vitrastamanasastasya śāntikṛto'bhavan //

tato devarṣayaḥ sarve tathā saptarṣayopi ca /
brahmarṣacasca vijayaṃ jepuḥ pārthasya dhīmataḥ //

tataḥ pradīpite devaiḥ pārthatejasi pārthiva /
tasthāvacalavaddhīmānsaṅgrāme paramāstravit //

vicakarṣa dhanurdivyaṃ tataḥ kauravanandanaḥ /
yantrasyeveha śabdo'bhūnmahāṃstasya punaḥ punaḥ //

tataḥ sa śaravarṣāṇi pratyamitrānprati prabhuḥ /
vavarṣa dhanuṣā pārtho varṣāṇīva purandaraḥ //

tataste saindhavā yodhāḥ sarva eva sarājakāḥ /
nādṛśyanta śaraiḥ kīrṇāḥ śalabhairiva pādapāḥ //

tasya śabdena vitresurbhayārtāśca vidudruvuḥ /
mumucuscāśru śokārtāḥ śuśucuścāpi saindhavāḥ //

tāṃstu sarvānnaravyāghraḥ saindhavānvyacaradbalī /
alātacakravadrājañśarajālaiḥ samārpayat //

tadindrajālapratimaṃ bāṇajālamamitrahā /
visṛjya dikṣu sarvāsu mahendri iva vajrabhṛt //

meghajālanibhaṃ sainyaṃ vidārya śaravṛṣṭibhiḥ /
vibabhau kauravaśreṣṭhaḥ śaradīva divākaraḥ //