Mahabharata · Chapter 14.76

evaṃ trirātramabhavattadyuddhaṃ bharatarṣabha /
arjunasya narendreṇa vṛtreṇeva śatakratoḥ //

tataścaturthe divase yajñadatto mahābalaḥ /
jahāsa sasvanaṃ hāsaṃ vākyaṃ cedamatābravīt //

arjunārjuna tiṣṭhasva na me jīvanvimokṣyase /
tvāṃ nihatya kariṣyāmi pitustoyaṃ yathāvidhi //

tvayā vṛddho mama pitā bhagadattaḥ pituḥ sakhā /
hato vṛddho'pi bādhitvā śiśuṃ māmadya yodhaya //

ityevamuktvā sankruddho yajñadatto narādhipaḥ /
preṣayāmāsa kauravya vāraṇaṃ pāṇḍavaṃ prati //

sampreṣyamāṇo nāgendro yajñadattena dhīmatā /
utpatiṣyannivākāśamabhidudrāva pāṇḍavam //

agrahastasumuktena śīkareṇa sa nāgarāṭ /
samaukṣati guḍākeśaṃ śailaṃ nīla ivāmbudaḥ //

sa tena preṣito rājñā meghavadvinadanmuhuḥ /
mukhāḍambarasaṃhrādairabhyadravata phalgunam //

sa nṛtyanniva nāgendro yajñadattapracoditaḥ /
āsasāda drutaṃ rājankauravāṇāṃ mahāratham //

tamāyāntamathālakṣya yajñadattasya vāraṇam /
gāṇḍīvamāśritya balī na vyakampata śatruhā //

cukrodha balavaccāpi pāṇḍavastasya bhūpateḥ /
kāryavighnamanusmṛtyi pūrvavairaṃ ca bhārata //

tatastaṃ vāraṇaṃ kruddhaḥ śarajālena pāṇḍavaḥ /
nivārayāmāsa tadā veleva makarālayam //

sa nāgapravaraḥ śrīmānarjunena nivāritaḥ /
tasthau śarairvinunnāṅgaḥ śvāvicchalalito yathā //

nivāritaṃ gajaṃ dṛṣṭvā bhagadattasuto nṛpaḥ /
utsasarja śitānbāṇānarjune krodhamūrchitaḥ //

arjunastu mahābāhuḥ śarairarinighātibhiḥ /
vārayāmāsa tānbāṇāṃstadadbhutamivābhavat //

tataḥ punarabhikruddho rājā prāgjyotiṣādhipaḥ /
preṣayāmāsa nāgendraṃ balavatparvatopamam //

tamāpatantaṃ samprekṣya balavānpākaśāsaniḥ /
nārācamagnisaṅkāśaṃ prāhiṇodvāraṇaṃ prati //

sa tena vāraṇo rājanmarmasvabhihato bhṛśam /
papāta sahasā bhūmau vajrarugṇa ivācalaḥ //

sa patañśuśubhe nāgo dhanañjayaśarāhataḥ /
viśanniva mahāśailo mahīṃ vajraprapīḍitaḥ //

tasminnipatite nāge yajñadattasya pāṇḍavaḥ /
taṃ na bhetavyamityāha tato bhūmigataṃ nṛpam //

abravīddhi mahātejāḥ prasthitaṃ māṃ yudhiṣṭhiraḥ /
rājānaste na hantavyā dhanañjaya kathañcana //

sarvametannaravyāghra bhavatyetāvatā kṛtam /
yodhāścāpi na hantavyā dhanañjaya raṇe tvayā //

vaktavyāścāpi rājānaḥ sarve saha suhṛjjanaiḥ /
yudhiṣṭhirasyāśvamedho bhavadbhiranubhūyatām //

iti bhrātṛvacaḥ śrutvā na hanmi tvāṃ narādhipa /
uttiṣṭha na bhayaṃ te'sti svastimāngaccha pārthiva //

āgacchethā mahārāja parāṃ caitrīmupasthitām /
tadā'śvamedho bhavitā dharmirājasya dhīmataḥ //

evamuktaḥ sa rājā tu bhagadattātmajastadā /
tathetvevābravīdvākyaṃ pāṇḍavenābhinirjitaḥ //