મહાભારત · અધ્યાય 14.77

જિત્વા પ્રસાદ્ય રાજાનં ભગદત્તસુતં તદા । વિસૃજ્ય યાતે તુરગે સૈન્ધવાન્પ્રતિ ભારત ॥

સૈન્ધવૈરભવગદ્યુદ્ધં તતસ્તસ્ય કિરીટિનઃ ।
હતશેષૈર્મહારાજ હતાનાં ચ સુતૈરપિ ॥

તેઽવતીર્ણમુપશ્રુત્ય વિષયં શ્વેતવાહનમ્ ।
પ્રત્યુદ્યયુરમૃષ્યન્તે રાજાનઃ પાણ્ડવર્ષભમ્ ॥

અશ્વં ચ તં પરામૃશ્ય વિષયાન્તે વિષોપમાત્ ।
ન ભયં ચક્રિરે પાર્થાદ્ભીમસેનાદનન્તરાત્ ॥

તેઽવિદૂરાદ્ધનુષ્પાણિં યજ્ઞિયસ્ય હયસ્ય ચ ।
બીભત્સું પ્રત્યપદ્યન્ત્ પદાતિનમવસ્થિતમ્ ॥

તતસ્તે તં મહાવીર્યા રાજાનઃ પર્યવારયન્ ।
જિગીષન્તો નરવ્યાઘ્રં પૂર્વં વિનિકૃતા યુધિ ॥

તે નામાન્યપિ ગોત્રાણિ કર્મણિ વિવિધાનિ ચ ।
કીર્તયન્તસ્તદા પાર્થં શરવર્ષૈરવાકિરન્ ॥

તે કિરન્તઃ શરવ્રાતાન્વારણપ્રતિવારણાન્ ।
રણે જયમભીપ્સન્તઃ કૌન્તેયં પર્યવારયન્ ॥

તે સમીક્ષ્ય ચ તં કૃષ્ણમુગ્રકર્માણમાહવે ।
સર્વે યુયુધિરે વીરા રથસ્થાસ્તં પદાતિનમ્ ॥

તે તમાજઘ્નિરે વીરં નિવાતકવચાન્તકમ્ ।
સંશપ્તકનિહન્તારં હન્તારં સૈન્ધવસ્ય ચ ॥

તતો રથસહસ્રેણ ગજાનામયુતેન ચ ।
***ષ્ઠકીકૃત્ય બીભત્સું પ્રહૃષ્ટમનસોઽભવન્ ॥

** સ્મરન્તો વધં વીરાઃ સિન્ધુરાજસ્ય ચાહવે ।
જયદ્રથસ્ય કૌરવ્ય સમરે સવ્યસાચિના ॥

તતઃ પર્જન્યવત્સર્વે શરવૃષ્ટીરવાસૃજન્ ।
તૈઃ કીર્ણઃ શુશુભે પાર્થો રવિર્મેઘાન્તરે યથા ॥

સ શરૈઃ સમવચ્છન્નશ્ચકાશે પાણ્ડવર્ષભઃ ।
પઞ્ચરાન્તરસઞ્ચારી શકુન્ત ઇવ ભારત ॥

તતો હાહાકૃતં સર્વં કૌન્તેય શરપીડિતે ।
ત્રૈલોક્યમભવદ્રાજન્રવિરાસીદ્રજોરુણઃ ॥

તતો વવૌ મહારાજ મારુતો રોમહર્ષણઃ ।
રાહુરગ્રસદાદિત્યં પર્વણીવ વિશામ્પતે ॥

ઉલ્કાશ્ચ જઘ્નિરે સૂર્યં વિકીર્યન્ત્યઃ સમન્તતઃ ।
વેપથુશ્ચાભવદ્રાજન્કૈલાસસ્ય મહાગિરેઃ ॥

મુમુચુઃ શ્વાસમત્યુષ્ણં દુઃખશોકસમન્વિતાઃ ।
સપ્તર્ષયો જાતભયાસ્તથા દેવર્ષયોપિ ચ ॥

શશં ચાશુ વિનિર્ભિદ્ય મણ્ડલં શશિનોઽપતન્ ।
વિપરીતા દિશશ્ચાપિ સર્વા ધૂમાકુલાસ્તથા ॥

રાસભારુણસઙ્કાશા ધનુષ્મન્તઃ સવિદ્યુતઃ ।
આવૃત્ય ગગનં મેઘા મુમુચુર્માંસશોણિતમ્ ॥

એવમાસીત્તદા વીરે શરવર્ષેણ સંવૃતે ।
ફલ્ગુને ભરતશ્રેષ્ઠ તદદ્ભુતમિવાભવત્ ॥

તસ્ય તેનાવકીર્ણસ્ય શરજાલેન સર્વતઃ ।
મોહાત્પપાત ગાણ્ડીવમાવાપશ્ચ કરાદપિ ॥

તસ્મિન્મોહમનુપ્રાપ્તે શરજાલં મહત્તદા ।
સૈન્ધવા મુમુચુસ્તૂર્ણં ગતસત્વે મહારથે ॥

તતો મોહં સમાપન્નં જ્ઞાત્વા પાર્થં દ્વિવૌકસઃ ।
સર્વે વિત્રસ્તમનસસ્તસ્ય શાન્તિકૃતોઽભવન્ ॥

તતો દેવર્ષયઃ સર્વે તથા સપ્તર્ષયોપિ ચ ।
બ્રહ્મર્ષચસ્ચ વિજયં જેપુઃ પાર્થસ્ય ધીમતઃ ॥

તતઃ પ્રદીપિતે દેવૈઃ પાર્થતેજસિ પાર્થિવ ।
તસ્થાવચલવદ્ધીમાન્સઙ્ગ્રામે પરમાસ્ત્રવિત્ ॥

વિચકર્ષ ધનુર્દિવ્યં તતઃ કૌરવનન્દનઃ ।
યન્ત્રસ્યેવેહ શબ્દોઽભૂન્મહાંસ્તસ્ય પુનઃ પુનઃ ॥

તતઃ સ શરવર્ષાણિ પ્રત્યમિત્રાન્પ્રતિ પ્રભુઃ ।
વવર્ષ ધનુષા પાર્થો વર્ષાણીવ પુરન્દરઃ ॥

તતસ્તે સૈન્ધવા યોધાઃ સર્વ એવ સરાજકાઃ ।
નાદૃશ્યન્ત શરૈઃ કીર્ણાઃ શલભૈરિવ પાદપાઃ ॥

તસ્ય શબ્દેન વિત્રેસુર્ભયાર્તાશ્ચ વિદુદ્રુવુઃ ।
મુમુચુસ્ચાશ્રુ શોકાર્તાઃ શુશુચુશ્ચાપિ સૈન્ધવાઃ ॥

તાંસ્તુ સર્વાન્નરવ્યાઘ્રઃ સૈન્ધવાન્વ્યચરદ્બલી ।
અલાતચક્રવદ્રાજઞ્શરજાલૈઃ સમાર્પયત્ ॥

તદિન્દ્રજાલપ્રતિમં બાણજાલમમિત્રહા ।
વિસૃજ્ય દિક્ષુ સર્વાસુ મહેન્દ્રિ ઇવ વજ્રભૃત્ ॥

મેઘજાલનિભં સૈન્યં વિદાર્ય શરવૃષ્ટિભિઃ ।
વિબભૌ કૌરવશ્રેષ્ઠઃ શરદીવ દિવાકરઃ ॥