Mahabharata · Chapter 14.75

prāgjyotiṣamathābhyetya vyacaratsa hayottamaḥ /
bhagadattātmajastatra niryayau raṇakarkaśaḥ //

sahayaṃ pāṇḍuputraṃ tu viṣayāntamupāgatam /
yuyudhe bharataśreṣṭha yajñadatto mahīpatiḥ //

sobhiniryāya nagarādbhagadattasuto nṛpaḥ /
aśvamāyāntamunmathya nagarābhimukho yayau //

tamālakṣya mahābāhuḥ kurūṇāmṛṣabhastadā /
gāṇḍīvaṃ vikṣipaṃstūrṇaṃ sahasā samupādravat //

tato gāṇḍīvanirmuktairiṣubhirmohito nṛpaḥ /
hayamutsṛjya taṃ vīrastataḥ pārthamupādravat //

punaḥ praviśya nagaraṃ daṃśitaḥ sa nṛpottamaḥ /
āruhya nāgapravaraṃ niryayau yuddhakāṅkṣayā //

pāṇḍureṇātapatreṇa dhriyamāṇena mūrdhani /
dodhūyatā cāmareṇa śvetena ca mahārathaḥ //

tataḥ pārthaṃ samāsādya pāṇḍavānāṃ mahāratham /
āhvayāmāsa bībhatsuṃ bālyānmohācca saṃyuge //

sa vāraṇaṃ nagaprakhyaṃ prabhinnakaraṭāmukham /
preṣayāmāsa sankruddhaḥ śvetāśvaṃ prati pārthivaḥ //

vikṣarantaṃ mahāmeghaṃ paravāraṇavāraṇam /
śastravatkalpitaṃ saṅkhye vivaśaṃ yuddhadurmadam //

pracodyamānaḥ sa gajastena rājñā mahābalaḥ /
tadā'ṅkaśena vibabhāvutpatiṣyannivāmbaram //

tamāpatantaṃ samprekṣya kruddho rājandhanañjayaḥ /
bhūmiṣṭho vāraṇagataṃ yodhayāmāsa bhārata //

yajñadattastataḥ kruddho mumocāśu dhanañjaye /
tomarānagnisaṅkāśāñśalabhāniva vegitān //

arjunastānasamprāptāngāṇḍīvaprabhavaiḥ śaraiḥ /
dvidhā tridhā ca ciccheda khagamānkhagamaistadā //

sa tāndṛṣṭvā tathā chinnāṃstomarānbhagadattajaḥ /
iṣūnasaktāṃstvaritaḥ prāhiṇotpāṇḍavaṃ prati //

tato'rjunastūrṇataraṃ rukmapuṅkhānajihmagān /
preṣayāmāsa sankruddho bhagadattātmajaṃ prati //

sa tairviddho mahātejā yajñadatto mahāmṛdhe /
bhṛśāhataḥ papātorvyāṃ na tvenamajahātsmṛtiḥ //

tataḥ sa punarāruhya vāraṇapravaraṃ raṇe /
avyagraḥ preṣayāmāsa jayārthī vijayaṃ prati //

tasmai bāṇāṃstato jiṣṇurnirmuktāśīviṣopamān /
preṣayāmāsa sankruddho jvalitajvalanopamān //

sa tairviddho mahānāgo visravanrudhiraṃ babhau /
himavāniva śailendro bahuprasravaṇastadā //