Mahabharata · Chapter 14.74

trigartairabhavadyuddhaṃ kṛtavairaiḥ kirīṭinaḥ /
mahārathasamājñātairhatānāṃ putranaptṛbhiḥ //

te samājñāya samprāptaṃ yajñiyaṃ turagottama***** viṣayāntaṃ tato vīrā daṃśitāḥ paryavārayan //

rathino baddhatūṇīrāḥ sadaśvaiḥ samalaṅkṛtaiḥ /
parivārya hayaṃ rājangrahītuṃ sampracakramuḥ //

tataḥ kirīṭī sañcintya teṣāṃ tatra cikīrṣitam /
vārayāmāsa tānvīrānsāntvapūrvamarindamaḥ //

tadanādṛtya te sarve śarairabhyahanaṃstadā /
tamorajobhyāṃ sañchannāṃstānkirīṭī nyavārayat //

tānavravīttato jiṣṇuḥ prahasanniva bhārata /
nivartadhvamadharmajñāḥ śreyo jīvitameva ca //

sa hi vīraḥ prayāsyanvai dharmarājena vāritaḥ /
hatabāndhavā na te pārta hantavyāḥ pārthivā iti //

sa tadā tadvacaḥ śrutvā dharmarājasya dhīmataḥ /
tānnivartadhvamityāha na nyavartanti cāpi te //

tatastrigartarājānaṃ sūryavarmāṇamāhave /
vinadya śarajāleni prajahāsa dhanañjayaḥ //

tataste rathaghopeṇa rathanemisvanena ca /
pūrayanto diśaḥ sarvā dhanañjayamupādravan //

sūryavarmā tataḥ pārte śarāṇāṃ nataparvaṇām /
śatānyamuñcadrājendra laghvastramabhidarśayan //

tathaivānye maheṣvāsā ye ca tasyānuyāyinaḥ /
mumucuḥ śaravarṣāṇi dhanañjayavadhaiṣiṇaḥ //

sa tāñjyāmukhanirmuktairbahubhiḥ subahūñśarān /
ciccheda pāṇḍavo rājaṃste bhūmau nyapataṃstadā //

ketuvarmā tu tejasvī tasyaivāvarajo yuvā /
yuyudhe bhrāturarthāya pāṇḍavena yaśasvinā //

tamāpatantaṃ samprekṣya ketuvarmāṇamāhave /
abhyaghnanniśitairbāṇairbībhatsuḥ paravīrahā //

ketuvarmaṇyabhihate dhṛtavarmā mahārathaḥ /
rathenāśu samutpatya śarairjiṣṇumavākirat //

tasya tāṃ śīghratāmīkṣya tutoṣātīva vīryavān /
guḍākeśo mahādejā bālasya dhṛtavarmaṇaḥ //

na sandadhānaṃ dadṛśe nādadānaṃ ca taṃ tadā /
kirantamevaṃ sa śarāndadṛśe pākaśāsaniḥ //

sa tu taṃ pūjayāmāsa dhṛtavarmāṇamāhave /
manasā tu muhūrtaṃ vai raṇe samabhiharṣayan //

na vivyādha raṇe kruddhaḥ kuntīputro hasanniva /
saubhadrasyeva tatkarma dṛṣṭvā bālasya vismitaḥ //

taṃ pannagamiva kruddhaṃ kuruvīraḥ smayanniva /
prītipūrvaṃ mahābāhuḥ prāṇairna vyaparopayat //

sa tathā rakṣyamāṇo vai pārthenāmitatejasā /
dhṛtavarmā śaraṃ dīptaṃ mumoca vijaye tadā //

sa tena vijayastūrṇamāsīdviddhaḥ kare bhṛśam /
mumoca gāṇḍivaṃ mohāttatpapātātha bhūtale //

dhanuṣaḥ patatastasya savyasācikarādvibho /
babhūva sadṛśaṃ rūpaṃ śakracāpasya bhārata //

tasminnipatite divye mahādhanuṣi pārthivaḥ /
cakāra sasvanaṃ hāsaṃ dhṛtavarmā mahāhave //

tato roṣārdito jiṣṇuḥ pramṛjya rudhiraṃ karāt /
dhanurādatta taddivyaṃ śaravarṣairvavarṣa ca //

tato halahalāśabdo divaspṛgabhavattadā /
nānāvidhānāṃ bhūtānāṃ tatkarmāṇi praśaṃsatām //

tataḥ samprekṣya sankruddhaṃ kālāntakayamopamam /
jiṣṇuṃ traigartakā yodhāḥ parītāḥ paryavārayan //

abhisṛtya parīpsārthaṃ tataste dhṛtavarmaṇaḥ /
parivavrurguḍākeśaṃ tatrākruddhyaddhanañjayaḥ //

tato yodhāñjaghānāśu teṣāṃ sa daśa cāṣṭa ca /
mahendravajrapratimairāyasairbahubhiḥ śaraiḥ //

tānsamprabhagnānsamprekṣya tvaramāṇo dhanañjayaḥ /
śarairāśīviṣākārairjaghāna svanavaddhasan //

te bhagnamanasaḥ sarve traigartakamahārathāḥ /
diśo'bhidudruvū rājandhanañjayaśarārditāḥ //

hatāvaśiṣṭā hi parāḥ pārthaṃ dṛṣṭaparākramāḥ / tamūcuḥ puruṣavyāghraṃ saṃśaptakaniṣūdanam //

tavāsma kinkarāḥ sarve sarve vai vaśagāstava / ājñāpayasvaḥ naḥ pārtha prahvānpreṣyānavasthitān /
kariṣyāmaḥ priyaṃ sarvaṃ tava kauravanandana //

etadājñāya vacanaṃ sarvāṃstānabravīttadā /
jīvitaṃ rakṣata nṛpāḥ śāsanaṃ pratigṛhyatām //