મહાભારત · અધ્યાય 14.75

પ્રાગ્જ્યોતિષમથાભ્યેત્ય વ્યચરત્સ હયોત્તમઃ ।
ભગદત્તાત્મજસ્તત્ર નિર્યયૌ રણકર્કશઃ ॥

સહયં પાણ્ડુપુત્રં તુ વિષયાન્તમુપાગતમ્ ।
યુયુધે ભરતશ્રેષ્ઠ યજ્ઞદત્તો મહીપતિઃ ॥

સોભિનિર્યાય નગરાદ્ભગદત્તસુતો નૃપઃ ।
અશ્વમાયાન્તમુન્મથ્ય નગરાભિમુખો યયૌ ॥

તમાલક્ષ્ય મહાબાહુઃ કુરૂણામૃષભસ્તદા ।
ગાણ્ડીવં વિક્ષિપંસ્તૂર્ણં સહસા સમુપાદ્રવત્ ॥

તતો ગાણ્ડીવનિર્મુક્તૈરિષુભિર્મોહિતો નૃપઃ ।
હયમુત્સૃજ્ય તં વીરસ્તતઃ પાર્થમુપાદ્રવત્ ॥

પુનઃ પ્રવિશ્ય નગરં દંશિતઃ સ નૃપોત્તમઃ ।
આરુહ્ય નાગપ્રવરં નિર્યયૌ યુદ્ધકાઙ્ક્ષયા ॥

પાણ્ડુરેણાતપત્રેણ ધ્રિયમાણેન મૂર્ધનિ ।
દોધૂયતા ચામરેણ શ્વેતેન ચ મહારથઃ ॥

તતઃ પાર્થં સમાસાદ્ય પાણ્ડવાનાં મહારથમ્ ।
આહ્વયામાસ બીભત્સું બાલ્યાન્મોહાચ્ચ સંયુગે ॥

સ વારણં નગપ્રખ્યં પ્રભિન્નકરટામુખમ્ ।
પ્રેષયામાસ સન્ક્રુદ્ધઃ શ્વેતાશ્વં પ્રતિ પાર્થિવઃ ॥

વિક્ષરન્તં મહામેઘં પરવારણવારણમ્ ।
શસ્ત્રવત્કલ્પિતં સઙ્ખ્યે વિવશં યુદ્ધદુર્મદમ્ ॥

પ્રચોદ્યમાનઃ સ ગજસ્તેન રાજ્ઞા મહાબલઃ ।
તદાઽઙ્કશેન વિબભાવુત્પતિષ્યન્નિવામ્બરમ્ ॥

તમાપતન્તં સમ્પ્રેક્ષ્ય ક્રુદ્ધો રાજન્ધનઞ્જયઃ ।
ભૂમિષ્ઠો વારણગતં યોધયામાસ ભારત ॥

યજ્ઞદત્તસ્તતઃ ક્રુદ્ધો મુમોચાશુ ધનઞ્જયે ।
તોમરાનગ્નિસઙ્કાશાઞ્શલભાનિવ વેગિતાન્ ॥

અર્જુનસ્તાનસમ્પ્રાપ્તાન્ગાણ્ડીવપ્રભવૈઃ શરૈઃ ।
દ્વિધા ત્રિધા ચ ચિચ્છેદ ખગમાન્ખગમૈસ્તદા ॥

સ તાન્દૃષ્ટ્વા તથા છિન્નાંસ્તોમરાન્ભગદત્તજઃ ।
ઇષૂનસક્તાંસ્ત્વરિતઃ પ્રાહિણોત્પાણ્ડવં પ્રતિ ॥

તતોઽર્જુનસ્તૂર્ણતરં રુક્મપુઙ્ખાનજિહ્મગાન્ ।
પ્રેષયામાસ સન્ક્રુદ્ધો ભગદત્તાત્મજં પ્રતિ ॥

સ તૈર્વિદ્ધો મહાતેજા યજ્ઞદત્તો મહામૃધે ।
ભૃશાહતઃ પપાતોર્વ્યાં ન ત્વેનમજહાત્સ્મૃતિઃ ॥

તતઃ સ પુનરારુહ્ય વારણપ્રવરં રણે ।
અવ્યગ્રઃ પ્રેષયામાસ જયાર્થી વિજયં પ્રતિ ॥

તસ્મૈ બાણાંસ્તતો જિષ્ણુર્નિર્મુક્તાશીવિષોપમાન્ ।
પ્રેષયામાસ સન્ક્રુદ્ધો જ્વલિતજ્વલનોપમાન્ ॥

સ તૈર્વિદ્ધો મહાનાગો વિસ્રવન્રુધિરં બભૌ ।
હિમવાનિવ શૈલેન્દ્રો બહુપ્રસ્રવણસ્તદા ॥