Mahabharata · Chapter 14.71

tānsamīpagatāñśrutvā pāṇḍavāñśatrukarśanaḥ / vāsudevaḥ sahāmātyaḥ prayayau sasuhṛdgaṇaḥ /
te sametya yathānyāyaṃ pratyudyātā didṛkṣayā //

te sametya tathādharmaṃ pāṇḍavā vṛṣṇibhiḥ saha /
viviśuḥ sahitā rājanpuraṃ vāraṇasāhvayam //

viśatastasya sainyasya khuranemisvanena ha /
dyāvāpṛthivyau khaṃ caiva sarvamāsītsamāvṛtam //

te kośānagrataḥ kṛtvā viviśuḥ svaṃ puraṃ tadā /
pāṇḍavāḥ prītamanasaḥ sāmātyāḥ sasuhṛdgaṇāḥ //

te sametya yathānyāyaṃ dhṛtarāṣṭraṃ janādhipam /
kīrtayantaḥ svanāmāni tasya pādau vavandire //

dhṛtarāṣṭrābhyanujñātā gāndhārīṃ subalātmajām /
kuntīṃ ca rājaśārdūla tadā bharatasattama //

viduraṃ yūjayitvā ca vaiśyāputraṃ sametya ca /
pūjyamānāḥ sma te vīrā vyarocanta viśāmpate //

tatastatparamāścaryaṃ vicitraṃ mahadadbhutam /
śuśruvuste tadā vīrāḥ pituste janma bhārata //

tadupaśrutya tatkarma vāsudevasya dhīmataḥ /
pūjārhaṃ pūjayāmāsuḥ kṛṣṇaṃ devakīnandanam //

tataḥ katipayāhasya vyāsaḥ satyavatīsutaḥ /
ājagāma mahātejā nagaraṃ nāgasāhvayam //

tasya sarve yathānyāyaṃ pūjā cakruḥ kurūdvahāḥ /
saha vṛṣṇyandhakavyāghrairupāsāñcakrire tadā //

tatra nānāvidhākārāḥ kathāḥ samabhikīrtya vai /
yudhiṣṭhiro dharmasuto vyāsaṃ vacanamabravīt //

bhavatprasādādbhagavanyadidaṃ ratnamāhṛtam /
upayoktuṃ tadicchāmi vājimedhe mahākratau //

tamanujñātumicchāmi bhavatā munisattama /
tvadadhīnā vayaṃ sarve kṛṣṇasya ca mahātmanaḥ //
vyāsa uvāca /

anujānāmi rājaṃstvāṃ kriyatāṃ yadanantaram /
yajasva vājimedhena vidhivaddakṣiṇāvatā //

aśvamedho hi rājendra pāvanaḥ sarvapāpmanām /
teneṣṭvā tvaṃ vipātmā vai bhavitā nātra saṃśayaḥ //

ityuktaḥ sa tu dharmātmā kururājo yudhiṣṭhiraḥ /
aśvamedhasya kauravya cakārāharaṇe matim //

samanujñāpya tatsarvaṃ kṛṣmadvaipāyanaṃ nṛpaḥ /
vāsudevamathābhyetya vāgmī vacanamabravīt //

devakī suprajā devī tvayā puruṣasattama /
yadbrūyāṃ tvāṃ mahābāho tatkṛthāstvamihācyuta //

tvatprabhāvārjitānbhogānaśnīma yadunandana /
parākrameṇa buddhyā ca tvayeyaṃ nirjitā mahī //

dīkṣayasva tvamātmānaṃ tvaṃ hi naḥ paramo guruḥ /
tvayīṣṭavati dāśārha vipāpmā bhavitā hyaham //

tvaṃ hi yajño guruśca tvaṃ dharmajñastvaṃ prajāpatiḥ /
tvaṃ gatiḥ sarvabhūtānāmiti me niścitā matiḥ //
vāsudeva uvāca /

tvamevaitanmahābāho kartumarhasyarindama /
tvaṃ gatiḥ sarvabhūtānāmiti me niścitā matiḥ //

tvaṃ cādyi kuruvīrāṇāṃ dharmeṇa hi virājase / guṇībhūtāḥ sma te rājaṃstvaṃ no rājangururmataḥ /
yajasva madanujñātaḥ prāpya eṣa kratustvayā //

yunaktu no bhavānkārye yatra vāñchasi bhārata /
satyaṃ te pratijānāmi sarvaṃ kartāsmi te'nagha //

bhīmasenārjunau caiva tathā mādravatīsutau /
iṣṭavanto bhaviṣyanti tvayīṣṭavati pārthive //