Mahabharata · Chapter 14.70

brahmāstraṃ tu yadā rājankṛṣṇena pratisaṃhṛtam /
tadā tadveśma te pitrā tejasā'bhividīpitam //

tato rakṣāṃsi sarvāṇi neśustyaktvā gṛhaṃ tu tat /
antarikṣe ca vāgāsītsādhu keśava sādhviti //

tadastraṃ jvalitaṃ cāpi pitāmahamagāttadā /
tataḥ prāṇānpunarlebhe pitā tava nareśvara //

vyaceṣṭata ca bālosau yathotsāhaṃ yatābalam /
babhūvurmuditā rājaṃstatastā bharatastriyaḥ //

brāhmaṇā vācayāmāsurgovindasyaiva śāsanāt /
tatastā muditāḥ sarvāḥ praśaśaṃsurjanārdanam //

striyo bharatasiṃhānāṃ nāvaṃ labdhveva pāragāḥ / kuntī drupadaputrī ca subhadrā cottarā tathā /
striyaścānyā nṛsiṃhānāṃ babhūvurhṛṣṭamānasāḥ //

tatra mallā naṭāścaiva granthikāḥ saukhyaśāyikāḥ /
sūtamāgadhasaṅghāścāpyastuvaṃstaṃ janārdanam //

kuruvaṃśastavākhyābhirāśīrbhirbharatarṣabha / sabhājayata saṃhṛṣṭo mahārāja mahājanaḥ //

utthāya tu yathākālamuttarā yadunandanam /
abhyavādayata prītā saha putreṇa bhārata //

tatastasyai dadau prīto bahuratnaṃ viśeṣataḥ / tathaiva vṛṣṇiśārdūlo nāma cāsyākarotprabhuḥ /
pitustava mahārāja satyasandho janārdanaḥ //

parikṣīṇe kule yasmājjāto'yamabhimanyujaḥ /
parikṣiditi nāmāsya bhavatvityabravīttadā //

so'vardhata yathākālaṃ pitā tava janādhipa /
manaḥprahlādanaścāsītsarvalokasya bhārata //

māsajātastu te vīra pitā bhavati bhārata /
athājagmuḥ subahulaṃ ratnamādāya pāṇḍavāḥ //

merukūṭanibhānbhāṇḍānkalaśānbhājanāni ca /
kṛtākṛtaṃ mahadbhīmamādāya puruṣottamāḥ //

bhāratairvāhanaistatra gorute gorute pathi /
nivasanto yayurdevaṃ smarantaḥ parameṣṭhinaḥ //

nāsīttatra nṛpaḥ kaścidabhārārto nṛpaṃ vinā / bhīmādayo'pi yajñārthaṃ vahante kiṃ punarjanāḥ //

tānsamīpagatāñśrutvā niryayurvṛṣṇipuṅgavāḥ /
alañcakruśca mālyaughairnagaraṃ nāgasāhvayam //

patākābhirvicitrābhirdhvajaiśca vividhairapi /
veśmāni samalañcakruḥ paurāścāpi janeśvaraḥ //

devatāyatanānāṃ ca pūjāḥ suvividhāstathā /
sandideśātha viduraḥ pāṇḍuputrapriyepsayā //

rājamārgāśca tatrāsansumanobhiralaṅkṛtāḥ /
śuśubhe tatpuraṃ cāpi samudraughanibhasvanam //

nartakaiścāpi nṛtyadbhirgāyakānāṃ ca niḥsvanaiḥ /
āsīdvaiśravaṇasyeva nivāsastatpuraṃ tadā //

bandibhiśca narai rājanstrīsahāyaiśca sarvaśaḥ /
tatratatra vivikteṣu samantādupaśobhitam //

patākā dhūyamānāśca samantānmātariśvanā /
adarśayanniva tadā kurūnvai dakṣiṇottarān //

aghoṣayaṃstadā cāpa puruṣā rājamārgataḥ /
sarvarātravihāro'dya ratnābharaṇalakṣaṇaḥ //