Mahabharata · Chapter 14.72

evamuktastu kṛṣṇena dharmaputro yudhiṣṭhiraḥ /
vyāsamāmantry medhāvī tato vācanamabravīt //

yadā kālaṃ bhavānvetti hayamedhasya tattvataḥ /
dīkṣayasva tadā māṃ tvaṃ tvayyāyatto hi me krutuḥ //
vyāsa uvāca /

ayaṃ pailotha kaunteya yājñavalkyastathaiva ca /
vidhānaṃ yadyathā kālaṃ tatkartārau na saṃśayaḥ //

caitryāṃ hi paurṇamāsyāṃ tu tava dīkṣā bhaviṣyati /
sambhārāḥ sambhriyantāṃ ca yajñārthaṃ puruṣarṣabha //

aśvavidyāvidaścaiva sūtā viprāśca tadvidaḥ /
medhyamaśvaṃ parīkṣantāṃ tava yajñārthasiddhaye //

tamutsṛja yathāśāstraṃ pṛthivīṃ sāgarāmbarām /
saparyetu yaśo nāmnā tava pārthiva vardhayan //

ityuktaḥ sa tathetyuktvā pāṇḍavaḥ pṛthivīpatiḥ /
cakāra sarvaṃ rājendra yathoktaṃ brahmavādinā //

sambhāraścaiva rājendra sarve saṅkalpitāstatā //

sa sambhārānsamāhṛtya nṛpo dharmasutastadā /
nyavedayadameyātmā kṛṣṇadvaipāyanāya vai //

tato'bravīnmahātejā vyāso dharmātmajaṃ nṛpam /
yathākālaṃ yathāyogaṃ sajjāḥ sma tava dīkṣaṇe //

sphyaśca kūrcaśca sauvarṇo yaccānyadapi kaurava /
yattu yogyaṃ bhavetkiñcidraukmaṃ tatkriyatāmiti //

aśvaścotsṛjyatāmadya pṛthvyāmatha yathākramam /
suguptaṃ caratāṃ cāpi yathāśāstraṃ yathāvidhi //
yudhiṣṭhira uvāca /

ayamaśvo yatā brahmannutsṛṣṭaḥ pṛthivīmimām /
cariṣyati yathākāmaṃ tatra vai saṃvidīyatām //

pṛthivīṃ paryaṭantaṃ hi turagaṃ kāmacāriṇam /
kaḥ pālayediti mune tadbhavānvaktumarhati //

ityuktaḥ sa tu rājendra kṛṣṇadvaipāyano'bravīt / bhīmasenādavarajaḥ śreṣṭhaḥ sarvadhanuṣmatām /
jiṣṇuḥ sahiṣṇurdhṛṣṇusca sa enaṃ pālayiṣyati //

śaktaḥ sa hi mahīṃ jetuṃ nivātakavacāntakaḥ / tasminhyastrāṇi divyāni divyaṃ saṃhananaṃ tathā /
divyaṃ dhanaśceṣudhī ca sa enamanuyāsyati //

sa hi dharmārthakuśalaḥ sarvavidyāviśāradaḥ /
yathāśāstraṃ nṛpaśreṣṭha cārayiṣyati te hayam //

rājaputro mahābāhuḥ śyāmo rājīvalocanaḥ /
abhimanyoḥ pitā vīraḥ sa enamanuyāsyati //

bhīmasenopi tejasvī kaunteyo'mitavikramaḥ /
samartho rakṣituṃ rāṣṭraṃ nakulaśca viśāmpate //

sahadevastu kauravya samāyāsyati buddhimān /
kuṭumbatantraṃ vidhivatsarvameva mahāyaśāḥ //

sa tu sarvaṃ yathānyāyamukta kurukulodvahaḥ /
cakāra phalgunaṃ cāpi sandideśa hayaṃ prati //
yudhiṣṭhira uvāca /

ehyarjuna tvayā vīra hayo'yaṃ paripālyatām /
tvamarho rakṣituṃ hyenaṃ nānyaḥ kaścana mānavaḥ //

ye cāpi tvāṃ mahābāho pratyudyānti narādhipāḥ /
tairvigraho yathā na syāttathā kāryaṃ tvayā'nagha //

ākhyātavyaśca bhatā yajño'yaṃ mama sarvaśaḥ /
pārthivebhyo mahābāho samaye gamyatāmiti //
vaiśampāyana uvāca /

evamuktvā sa dharmātmā bhrātaraṃ savyasācinam /
bhīmaṃ ca nakulaṃ caiva puraguptau samādadhat //

kuṭumbatantre ca tadā sahadevaṃ yudhāmpatim /
anumānya mahīpālaṃ dhṛtarāṣṭraṃ yudhiṣṭhiraḥ //