Mahabharata · Chapter 14.7

kathamasmi tvayā jñātaḥ kena vā kathitosmi te /
etadācakṣva me tattvamicchase cenmama priyam //

satyaṃ te bruvataḥ sarve sampatsyante manorathāḥ /
mithyā ca bruvato mūrdhā śatadhā te sphuṭiṣyati //
marutta uvāca /

nāradena bhavānmahyamākhyāto hyaṭatā pathi /
guruputro mameti tvaṃ tato me prītiruttamā //
saṃvarta uvāca /

satyametadbhavānāha sa māṃ jānāti satriṇam /
kathayasva tadetanme kvanu samprati nāradaḥ //
maruta uvāca /

bhavantaṃ kathayitvā tu mama devarṣisattamaḥ /
tato māmabhyanujñāya praviṣṭo havyavāhanam //
vyāsa uvāca /

śrutvā tu pārthivasyaitsaṃvartaḥ pramudaṃ gataḥ /
etāvadahamapyevaṃ śaknuyāmiti so'bravīt //

tato maruttamunmatto vācā nirbhartsayanniva /
rūkṣayā brāhmaṇi rājanpunaḥ punarathābravīt //

vātapradhānena mayā svacittavaśavartinā /
evaṃ vikṛtarūpeṇa kathaṃ yājitumicchasi //

bhrātā mama samarthaśca vāsavena ca saṅgataḥ /
vartate yājane caiva tena karmāṇi kāraya //

gārhasthyaṃ caiva yājyāśca sarvā gṛhyāśca devatāḥ /
pūrvajena mamākṣiptaṃ śarīraṃ varjitaṃ tvidam //

nāhaṃ tenānanujñātastvāmāvikṣita karhicit /
yājayeyaṃ kathañcidvai sa hi pūjyatamo mama //

sa tvaṃ bṛhaspatiṃ gacca tamanujñāpya cāvraja /
tato'haṃ yājayiṣye tvāṃ yadi yaṣṭumihecchasi //
marutta uvāca /

bṛhaspatiṃ gataḥ pūrvamahaṃ saṃvarte tacchṛṇu /
na māṃ kāmayate yājyaṃ munirvāsavavāritaḥ //

amaraṃ yājyamāsādya yājayiṣye na mānuṣam /
śakreṇa pratiṣiddho'haṃ maruttaṃ mā sma yājaye //

spardhate hi mayā vipra sadā hi sa tu pārthivaḥ /
evamastviti cāpyukto bhrātrā te balasūdanaḥ //

sa māmadhigataṃ premṇā yājyatve na bubhūṣati /
devarājaṃ samāśritya tadviddhi munipuṅgava //

sohamicchāmi bhavatā sarvasvenāpi yājitum /
kāmaye samatikrāntuṃ vāsavaṃ tvatkṛtairguṇaiḥ //

na hi me vartate buddhirgantuṃ brahmanbṛhaspatim /
pratyākhyāto hi tenāsmi tathā'napakṛte sati //
saṃvarta uvāca /

cikīrṣasi yathākāmaṃ sarvametattvayi dhruvam /
yadi sarvānabhiprāyānkartāsi mama pārthiva //

yājyamānaṃ mayā hi tvāṃ bṛhaspatipuṃradarau /
dviṣetāṃ samabhikruddhāvetadekaṃ samarthaye //

sthairyamatra kathaṃ me syātsa tvaṃ niḥsaṃśayaṃ kuru /
kupitastvāṃ na hīdānīṃ bhasma kuryā savāndhavam //
marutta uvāca /

yāvattapetsahasrāṃśustiṣṭheraṃścāpi parvatāḥ /
tāvallokānna labheyaṃ tyajeyaṃ saṅgataṃ yadi //

mā cāpi śubhabuddhitvaṃ labheyamiha karhicit /
viṣayaiḥ saṅgataṃ cāstu tyajeyaṃ saṅgataṃ yadi //
saṃvarta uvāca /

āvikṣita śubhā buddhirvartatāṃ tava karmasu /
yājanaṃ hi mamāpyeva vartate hṛdi pārthiva //

abhidhāste ca te rājannakṣayaṃ dravyamuttamam /
yena devānsagdharvāñśakraṃ cābhibhaviṣyasi //

na tu me vartate buddhirdhane yājyeṣu vā punaḥ /
vipriyaṃ tu kariṣyāmi bhrātuścendrasya cobhayo //

gamayiṣyāmi śakreṇa samatāmapi te dhruvam /
priyaṃ ca te kariṣyāmi satyametadbravīmi te //