Mahabharata · Chapter 14.8

girerhimavataḥ pṛṣṭhe muñjavānnāma parvataḥ /
tapyate yatra bhagavāṃstapo nityamupāpatiḥ //

vanaspatīnāṃ mūleṣu śṛṅgeṣu viṣameṣu ca /
guhāsu śailarājasya yathākāmaṃ yathāsukham //

umāsahāyo bhagavānyatra nityaṃ maheśvaraḥ /
āste śūlī mahātejā nānābhūtagaṇāvṛtaḥ //

tatra rudrāśca sādhyāśca viśve'tha vasavastathā /
yamaśca varuṇaścaiva kuberaśca sahānugaḥ //

bhūtāni ca piśācāśca nāsatyāvapi cāśvinau /
gandhaṟvāpsarasaścaiva yakṣā devarṣayastathā //

ādityā marutaścaiva yātudhānāśca sarvaśaḥ /
upāsante mahātmānaṃ bahurūpamupāpatim //

ramate bhagavāṃstatra kuberānucaraiḥ saha /
vikṛtairvikṛtākāraiḥ krīḍadbhiḥ pṛthivīpate //

śriyā jvalandṛśyate vai bālādityasamadyutiḥ / na rūpaṃ śakyate tasya saṃsthānaṃ vā kadācana /
nirdeṣṭuṃ prāṇibhiḥ kaiścitprākṛtairmāṃsalocanaiḥ //

noṣṇaṃ na śiśiraṃ tatra na vāyurna ca bhāskaraḥ /
na jārā kṣutpipāse vā na mṛtyurna bhayaṃ nṛpa //

tasya śailasya pārśveṣu sarveṣu jayatāṃvara /
dhātavo jātarūpasya raśmayaḥ savituryathā //

rakṣyante te kuberasya sahāyairudyatāyudhaiḥ /
cikīrṣadbhiḥ priyaṃ rājankuberasya mahātmanaḥ //

tatra gatvā samanvāsya mahāyogeśvaraṃ śivam / kuru praṇāmaṃ rājarṣe bhaktyā paramayā yatuḥ //

tasmai bhagavate kṛtvā namaḥ śarvāya vedhase / ebhistaṃ nāmabhirdevaṃ sarvavidyādharaṃ stuhi //

rudrāya śitikaṇṭhāya surūpāya suvarcase /
kapardine karālāya haryakṣṇe varadāya ca //

tryakṣṇe pūṣṇo dantabhide vāmanāya śivāya ca /
yāmyāyāvyaktarūpāya sadvṛtte śaṅkarāya ca //

kṣemyāya harikeśāya sthāṇave puruṣāya ca /
harinetrāya muṇḍāya kruddhāyottaraṇāya ca //

bhāsvarāya sutīrthāya devadevāya raṃhase /
uṣṇīṣiṇe suvaktrāya sahasrākṣāya mīḍhuṣe //

giriśāya prāśāntāya yataye cīravāsase /
bilvadaṇḍāya siddhāya sarvadaṇḍadharāya ca //

mṛgavyādhāya mahate dhanvine'tha bhavāya ca /
varāya somavaktrāya siddhamantrāya cakṣuṣe //

hiraṇyabāhave rājannugrāya pataye diśām /
lelihānāya goṣṭhāya siddhamantrāya vṛṣṇaye //

paśūnāṃ pataye caiva bhūtānāṃ pataye namaḥ /
vṛṣāya mātṛbhaktāya senānye madhyamāya ca //

abhivaktrāya pataye sarvadevamayāya ca / sruvahastāya pataye dhanvine bhārgavāya ca /
ajāya kṛṣṇanetrāya virūpākṣāya caiva ha //

tīkṣṇadaṃṣṭrāya tīkṣṇāya vaiśvānaramukhāya ca /
mahātmane cānaṅgāya sarvāya pataye viśām //

tathā rudrāya pataye pṛthave kṛttivāsase / vilohitāya dīptāya dīptākṣāya mahaujase /
vasuretaḥsuvapuṣe pṛthave kṛttivāsase //

kapālamāline caiva suvarṇamukuṭāya ca /
mahādevāya kṛṣṇāya tryambakāyānaghāya ca //

krodhanāyānṛśaṃsāya mṛdave bāhuśāline /
daṇḍine taptatapase tathaivākrūrakarmaṇe //

sahasraśirase caiva sahasracaraṇāya ca /
namaḥ svadhāsvarūpāya bahurūpāya daṃṣṭriṇe //

pinākinaṃ mahādevaṃ mahābhoginamavyayam /
triśūlahastaṃ varadaṃ tryambakaṃ bhuvaneśvaram //

tripuraghnaṃ trinayanaṃ trilokeśaṃ mahaujasam /
prabhavaṃ sarvabhūtānāṃ dātāraṃ dharaṇīdharam //

īśānaṃ śaṅkaraṃ sarvaṃ śivaṃ viśveśvaraṃ bhavam /
umāpatiṃ paśupatiṃ viśvarūpaṃ maheśvaram //

virūpākṣaṃ daśabhujaṃ viṣyandaṃ govṛṣadhvajam /
ugraṃ sthāṇuṃ śivaṃ raudraṃ śarvaṃ gaurīśamīśvaram //

śitikaṇṭhamajaṃ śukraṃ pṛthuṃ pṛthuharaṃ varam /
viśvarūpaṃ virūpākṣaṃ bahurūpamupāpatim //

praṇamya śirasā devamanaṅgāṅgaharaṃ haram /
śaraṇyaṃ śaraṇaṃ yāhi mahādevaṃ caturmukham //

virocamānaṃ vapuṣā divyābharaṇabhūṣitam /
anādyantamajaṃ śambhuṃ sarvavyāpinamīśvaram //

nistraiguṇyaṃ nirudvegaṃ nirmalaṃ nidhimojasām /
praṇamya prāñjaliḥ śarvaṃ prayāmi śaraṇaṃ haram //

sammānyaṃ niścalaṃ nityamakāruṇyamalepanam /
adhyātmavedamāsādya prayāmi śaraṇaṃ muhuḥ //

yasya nityaṃ viduḥ sthānaṃ mokṣamadhyātmacintakāḥ /
yogīśaṃ tatvamārgasthāḥ kaivalyaṃ padamakṣaram //

yaṃ viduḥ saṅginaṃ muktāḥ sāmānyaṃ samadarśinaḥ /
taṃ prapadye jagadyonimayoniṃ nirguṇātmakam //

asṛjadyastu bhūtādīnsapta lokānsanātanān /
sthitaḥ satyopari sthāṇustaṃ prapadye sanātanam //

bhaktānāṃ sulabhaṃ taṃ hi durlabhaṃ dūrapātinām /
adūrasthamamuṃ devaṃ prakṛteḥ parataḥ sthitam //

namāmi sarvalokasthaṃ vrajāmi śaraṇaṃ śivam / evaṃ kṛtvā namastasmai mahādevāya raṃhase /
mahātmane kṣitipate tatsuvarṇamavāpsyasi //

labhante gāṇapatyaṃ ca tadekāgrā hi mānavāḥ /
kiṃ punaḥ svarṇibhāṇḍāni tasmāttvaṃ gaccha mā ciraṃ //

mahattaraṃ hi te lābhaṃ hastyaśvoṣṭrādibhiḥ saha / suvarṇamāhariṣyantastatra gacchantu te narāḥ //
vyāsa uvāca /

ityuktaḥ sa vacastasya cakre kārandhamātmajaḥ /
gaṅgādharaṃ namaskṛtya labdhavāndhanamuttamam //

kubera iva tatprāpya mahādevaprasādataḥ / tato'timānuṣaṃ sarvaṃ cakre yajñasya saṃvidhim //

sauvarṇāni ca bhāṇḍāni sañcakrustatra śilpinaḥ / śālāśca sarvasambhārāṃstatra saṃvartaśāsanāt //

bṛhaspatistu tāṃ śrutvā maruttasya mahīpateḥ /
samṛddhimati devebhyaḥ santāpamakarodbhṛśam //

santapyamāno vaivarṇyaṃ kṛśatvaṃ cāgamatparam /
bhaviṣyati hi me śatruḥ saṃvarto vasumāniti //

taṃ śrutvā bhṛśasantaptaṃ devarājo bṛhaspatim /
abhigamyāmaravṛtaḥ provācedaṃ vacastadā //