Mahabharata · Chapter 14.69

saivaṃ vilapya karuṇaṃ sonmādeva tapasvinī /
uttarā nyapatadbhūmau kṛpaṇā putragṛddhinī //

tāṃ tu dṛṣṭvā nipatitāṃ hataputraparicchadām /
cukrośa kuntī duḥkhārtā sarvāśca bharatāstriyaḥ //

muhūrtamiva rājendra pāṇḍavānāṃ niveśanam /
aprekṣaṇīyamabhavadārtasvanavināditam //

sā muhūrtaṃ ca rājendra putraśokābhipīḍitā /
kaśmalābhihatā vīra vairāṭī tvabhavattadā //

pratilabhya tu sā sañjñāmuttarā bharatarṣabha /
aṅkamāropya taṃ putramidaṃ vacanamabravīt //

dharmajñasya sutaḥ saṃstvaṃ na dharmamavabudhyase /
yastvaṃ vṛṣṇipravīrasya kuruṣe nābhivādanam //

putra gatvā mama vaco brūyāstvaṃ pitaraṃ tvidam /
durmaraṃ prāṇināṃ vīra kāle prāpte kathañcana //

yā'haṃ tvayā vinā'dyeha patyā putreṇa caiva ha /
maraṇaṃ nābhigacchāmi hatasvastirakiñcanā //

athavā dharmarājñā'hamanujñātā mahābhujaḥ /
bhakṣayiṣye viṣaṃ ghoraṃ pravekṣye vā hutāśanam //

athavā durbharaṃ tāta yadidaṃ me sahasradhā /
patiputravihīnāyā hṛdayaṃ na vidīryate //

uttiṣṭha putra pasyemāṃ duḥkhitāṃ prapitāmahīm /
ārtāmupaplutāṃ dīnāṃ nimagnāṃ śokasāgare //

āryāṃ ca paśya pāñcālīṃ sātvatīṃ ca tapasvinīm /
māṃ ca paśya suduḥkhārtāṃ vyādhaviddhāṃ mṛgīmiva //

uttiṣṭha paśya vadanaṃ lokanāthasya dhīmataḥ /
puṇḍarīkapalāśākṣaṃ pureva capalekṣaṇaḥ //

evaṃ vipralapantīṃ tu dṛṣṭvā nipatitāṃ punaḥ /
uttarāṃ tāṃ striyaḥ sarvāḥ punarutthāpayantyuta //

utthāya ca punardhairyāttadā matsyapateḥ sutā /
prāñjaliḥ puṇḍarīkākṣaṃ bhūmāvevābhyavādayat //

śrutvā sa tasyā vipulaṃ vilāpaṃ puruṣarṣabhaḥ /
upaspṛśya tataḥ kṛṣṇo brahmāstraṃ pratyasaṃharat //

pratijajñe ca dāśārhastasya jīvitamacyutaḥ /
abravīcca viśuddhātmā sarvaṃ viśrāvayajjagat //

na bravīmyuttare mithyā satyametadbhaviṣyati /
eṣa sañjīvayāmyenaṃ paśyatāṃ sarvadehinām //

noktapūrvaṃ mayā mithyā svaireṣvapi kadācana /
na ca yuddhātparāvṛttastathā sañjīvatāmayam //

yathā me dayito dharmo brāhmaṇaśca viśeṣataḥ /
abhimanyoḥ suto jāto mṛto jīvatvayaṃ tathā //

yathā'haṃ nābhijānāmi vijaye tu kadācana /
virodhaṃ tena satyena mṛto jīvatvayaṃ śiśuḥ //

yathā satyaṃ ca dharmaśca mayi nityaṃ pratiṣṭhitau /
tathā mṛtaḥ śiśurayaṃ jīvatādabhimanyujaḥ //

yathā kaṃsaśca keśī ca dharmeṇa nihatau mayā /
tena satyena bālo'yaṃ punaḥ sañjīvatāmiha //

ityuktvā vāsudevo'tha taṃ bālaṃ bharatarṣabha / pādena kamalābhena brahmarudrārcitena ca /
pasparśa puṇḍarīkākṣa āpādatalamastakam //

spṛṣṭamātrastu kṛṣṇena sa bālo bharatarṣabha / śanaiḥśanairmahārāja prāpadyata sa cetanām //

śanaiḥśanairmahārāja prāspandata sacetanaḥ //