Mahabharata · Chapter 14.68

evamuktastu rājendra keśihā duḥkhamurcchitaḥ /
tatheti vyājahāroccairhlādayanniva taṃ janam //

vākyenaitena hi tadā taṃ janaṃ puruṣarṣabhaḥ /
hlādayāmāsa sa vibhurgharmārtaṃ salilairiva //

tataḥ sa prāviśattūrṇaṃ janmaveśma pitustava /
arcitaṃ puruṣavyāghra sitairmālyairyathāvidhi //

apāṃ kumbhaiḥ supūrṇaiśca vinyastaiḥ sarvatodiśam /
ghṛtena tindukālātaiḥ sarṣapaiśca mahābhuja //

astraiśca vimalairnyastaiḥ pāvakaiśca samantataḥ / vṛddhābhiścāpi rāmābhiḥ parivārārthamāvṛtaḥ /
dakṣaiśca parito dhīra bhiṣagbhiḥ kuśalaistathā //

dadarśa ca sa tejasvī rakṣoghrānyapi sarvaśaḥ /
dravyāṇi sthāpitāni sma vidhivatkuśalairjanaiḥ //

tathāyuktaṃ ca taddṛṣṭvā janmaveśma pitustava /
hṛṣṭo'bhavaddhṛṣīkeśaḥ sādhusādhviti cābravīt //

tathā bruvati vārṣṇeye prahṛṣṭavadane tadā /
draupadī tvaritā gatvā vairāṭīṃ vākyamabravīt //

ayamāyāti te bharturmātulo madhusūdanaḥ /
purāṇarṣiracintyātmā samīpamaparājitaḥ //

sā'pi bāṣpakalāṃ vācaṃ nigṛhyāśrūpi caiva ha /
asaṃvītā'bhavaddevī devavatkṛṣṇamīyuṣī //

sā tathā dūyamānena hṛdayena tapasvinī /
dṛṣṭvā govindamāyāntaṃ kṛpaṇaṃ paryadevayat //

puṇḍarīkākṣa paśyāvāṃ bālena hi vinākṛtau /
abhimanyuṃ ca māṃ caiva haṭhāttulyaṃ janārdana //

vārṣṇeyamadhuhanvīra śirasā tvāṃ prasādaye /
droṇaputrāstranirdagdhaṃ jīvayainaṃ mamātmajam //

yadi sma dharmarājñā vā bhīmasenena vā punaḥ /
tvayā vā puṇḍarīkākṣa vākyamuktamidaṃ bhavet //

ajānatīmiṣīkeyaṃ janitrīṃ hantviti prabho /
ahameva vinaṣṭā syāṃ nāyamevaṃ gato bhavet //

garbhasthasyāsya bālasya brahmāstreṇa nipātanam /
kṛtvā nṛśaṃsaṃ durbuddhirdrauṇiḥ kiṃ phalamaśnute //

sā tvāṃ prasādya śirasā yāce śatrunibarhaṇa /
prāṇāṃstyakṣyāmi govinda nāyaṃ sañjīvate yadi //

asminhi bahavaḥ sādho ye mamāsanmanorathāḥ /
te droṇaputreṇa hatāḥ kinnu jīvāmi keśava //

āsīnmama matiḥ kṛṣṇa pūrṇotsaṅgā janārdana /
abhivādayiṣye hṛṣṭeti tadidaṃ vitathīkṛtam //

capalākṣasya dāyāde mṛte'sminpuruṣarṣabha /
viphalā me kṛtāḥ kṛṣṇa hṛdi sarve manorathāḥ //

capalākṣaḥ kilātīva priyaste madhusūdana /
sutaṃ paśya tvamasyainaṃ brahmāstreṇa nipātitam //

kṛtaghno'yaṃ nṛśaṃso'yaṃ yathā'sya janakastathā /
yaḥ pāṇḍavīṃ śriyaṃ tyaktvā gato'dya yamasādanaṃ //

mayā caitatpratijñātaṃ raṇamūrdhani keśava /
abhimanyau hate vīra tvāmeṣyāmyacirāditi //

tacca nākaravaṃ kṛṣṇa nṛśaṃsā jīvitapriyā /
idānīṃ māṃ gatāṃ tatra kinnu vakṣyati phālguniḥ //