Mahabharata · Chapter 14.67

utthitāyāṃ pṛthāyāṃ tu subhadrā bhrātaraṃ tadā /
dṛṣṭvā cukrośa duḥkhārtā vacanaṃ cedamabravīt //

puṇḍarīkākṣa paśya tvaṃ pautraṃ pārthasya dhīmataḥ /
parikṣīṇeṣu kuruṣu parikṣīṇāṃ gatāyuṣam //

iṣīkā droṇaputreṇi bhīmasenārthamudyatā /
sottarāyāṃ nipatitā vijaye mayi caiva ha //

seyaṃ jvalantī hṛdaye mayi tiṣṭati keśava /
yanna paśyāmi durdharṣa sahaputraṃ tu taṃ prabho //

kinnu vakṣyati dharmātmā dharmarājo yudhiṣṭhiraḥ /
bhīmasenārjunau cāpi mādravatyāḥ sutau ca tau //

śrutvā'bhimanyostanayaṃ jātaṃ ca mṛtameva ca /
muṣitā iva vārṣṇeya droṇaputreṇa pāṇḍavāḥ //

abhimanyuḥ priyaḥ kṛṣṇa pitṝṇāṃ nātra saṃśayaḥ /
te śrutvā kinnu vakṣyanti droṇaputrāstranirjitāḥ //

bhavitā naḥ paraṃ duḥkhaṃ kinnu manye janārdana /
abhimanyoḥ sutaṃ kṛṣṇa mṛtaṃ jātamarindama //

sā'haṃ prasādaye kṛṣṇa tvāmadya śirasā natā /
pṛtheyaṃ draupadī caiva tāḥ paśya puruṣottama //

yadā droṇasuto garbhānpāṇḍūnāṃ hanti mādhava /
tadā kila tvayā drauṇiḥ kruddhenokto'rimardana //

akāmaṃ tvāṃ kariṣyāmi brahmabandho narādhama /
ahaṃ sañjīvayiṣyāmi kirīṭitanayātmajam //

ityedvacanaṃ śrutvā jānānā'haṃ balaṃ tava /
prasādaye tvāṃ durdharṣa jīvatāmabhimanyujaḥ //

yadyetattvaṃ pratiśrutya na karoṣi vaca śubham /
sakalaṃ vṛṣṇiśārdūla mṛtāṃ māmavadhāraya //

abhimanyoḥ suto vīra na sañjīvati yadyayam /
jīvati tvayi durdharṣa kiṃ kariṣyāmyahaṃ tvayā //

sañjīvayainaṃ durdharṣa mṛtaṃ tvamabhimanyujam /
sadṛśākṣasutaṃ vīra sasyaṃ varṣannivāmmbudaḥ //

tvaṃ hi keśava dharmātmā satyavānsatyavikramaḥ /
sa tāṃ vācamṛtāṃ kartumarhasi tvamarindama //

icchannapi hi lokāṃstrīñjīvayethā mṛtānimān /
kiṃ punardayitaṃ jātaṃ svasrīyasyātmajaṃ mṛtam //

prabhāvajñā'smi te kṛṣṇa tasmāttvāṃ yācayāmyaham /
kuruṣva pāṇḍuputrāṇāmimaṃ paramanugraham //

svaseti vā mahābāho hataputreti vā punaḥ /
prapannā māmiyaṃ ceti dayāṃ kartumihārhasi //