Mahabharata · Chapter 14.65

kriyatāmupahāro'dya tryambakasya mahātmanaḥ /
dattvopahāraṃ nṛpate tataḥ svārthaṃ yatāmahe //
vaiśampāyana uvāca /

śrutvā tu vacanaṃ teṣāṃ brāhmaṇānāṃ yudhiṣṭhiraḥ /
girīśasya yathānyāyamupahāramupāharat //

ājyena tarpayitvā'gniṃ vidhivatsaṃskṛtena ca /
mantrasiddhaṃ caruṃ kṛtvā purodhāḥ sa yayai tadā //

sa gṛhītvā sumanaso mantrapūtā janādhipa /
modakaiḥ pāyasenātha māṃsaiścopāharadbalimm //

sumanobhiśca citrābhirlājairuccāvacairapi / sarvaṃ sviṣṭakṛtaṃ hutvā vidhivadvedapāragaḥ /
kinkarāṇāṃ tataḥ paścāccakāra balimuttamam //

yakṣendrāya kuberāya māṇibhadrāya caiva ha /
tathā'nyeṣāṃ ca yakṣāṇāṃ bhūtānāṃ patayaśca ye //

kṛsareṇa ca māṃsena nivāpaistilasaṃyutaiḥ /
odanaṃ kumbhaśaḥ kṛtvā purodhāḥ samupāharat //

brāhmaṇebhyaḥ sahasrāṇi gavāṃ datvā tu bhūmipaḥ /
naktañcarāṇāṃ bhūtānāṃ vyādideśa bali tadā //

dhūpagandhaniruddhaṃ tatsumanobhiśca saṃvṛtam /
śuśubhe sthānamatyarthaṃ devadevasya pārthivaḥ //

kṛtvā pūjāṃ tu rudrasya gaṇānāṃ caiva sarvaśaḥ /
yayau vyāsaṃ puraskṛtya nṛpo ratnanidhiṃ prati //

pūjayitvā dhanādhvakṣaṃ praṇipatyābhivādya ca /
sumanobhirvicitrābhirapūpaiḥ kṛsareṇa ca //

śaṅkhādīṃśca nidhīnsarvānnidhipālāṃśca sarvaśaḥ / arcayitvā dvijāgryā svasti vācya ca vīryavān

teṣāṃ puṇyāhaghoṣeṇa tejasā samavasthitaḥ /
prītimānsa kuruśreṣṭhaḥ khānayāmāsaṃ taṃ nidhim //

tataḥ pātrī sakarakā bahurūpā manoramāḥ /
bhṛṅgārāṇi kaṭāhāni kalaśānvardhamānakān //

bahūni ca vicitrāṇi bhājanāni sahasraśaḥ /
uddhārayāmāsa tadā dharmarājo yudhiṣṭhiraḥ //

teṣāṃ rakṣaṇamapyāsīnmahānkarapuṭastathā /
naddhaṃ ca bhājanaṃ rājaṃstulārdhamabhavannṛpa //

vāhanaṃ pāṇḍuputrasya tatrāsīttu viśāmpate /
ṣaṣṭiruṣṭrasahasrāṇi śatāni dviguṇā hayāḥ //

vāraṇāśca mahārāja sahasraśatasammitāḥ / śakaṭāni rathāścaiva tāvadeva kareṇavaḥ /
svarāṇāṃ puruṣāṇāṃ ca parisaṅkhyā na vidyate //

etadvittaṃ tadabhavadyaduddadhre yudhiṣṭhiraḥ /
ṣoḍaśāṣṭau caturviṃśatsahasraṃ bhāralakṣaṇam //

eteṣvādāya taddravyaṃ punarabhyarcya pāṇḍavaḥ /
mahādevaṃ prati yayau puraṃ nāgāhayaṃ prati //

dvaipāyanābhyanujñātaḥ puraskṛtya purohitam /
gorute gorute caiva nyavasatpuruṣarṣabhaḥ //

sā purā'bhimukhā rājannuvāha mahatī camūḥ /
kṛcchrāddraviṇabhārārtā harṣayantī kurūdvahān //