Mahabharata · Chapter 14.64

tataste prayayurhṛṣṭāḥ prahṛṣṭanaravāhanāḥ /
rathaghoṣeṇa mahatā pūrayanto vasundharām //

saṃstūyamānāḥ stutibhiḥ sūtamāgadhabandibhiḥ /
svena sainyena saṃvītā yathā'dityāḥ svaraśmibhiḥ //

pāṇḍureṇātapatreṇa dhriyamāṇena mūrdhani /
babhau yudhiṣṭirastatra paurṇamāsyāmivoḍurāṭ //

jayāśiṣaḥ prahṛṣṭānāṃ narāṇāṃ pathi pāṇḍavaḥ /
pratyagṛhṇādyathānyāyaṃ yathāvatpuruṣarṣabhaḥ //

tathaiva sainikā rājanrājānamanuyānti ye /
teṣāṃ halahalāśabdo divaṃ stabdhvā vyatiṣṭhata //

sarāṃsi saritaścaiva vanānyupavanāni ca /
atyakrāmanmahārājo giriṃ cāpyanvapadyata //

smindeśe ca rājendra yatra taddravyamuttamam / cakre niveśanaṃ rājā pāṇḍavaḥ sahasainikaiḥ /
śive deśe same caiva tadā bharatasattama //

agrato brāhmaṇānkṛtvā tapovidyādamānvitān /
purohitaṃ ca kauravya vedavedāṅgapāragam //

āgniveśyaṃ ca rājāno brāhmaṇāḥ sapurodhasaḥ /
kṛtvā śāntiṃ yathānyāyaṃ sarvaśaḥ paryavārayan //

kṛtvā tu madhye rājānamamātyāṃśca yathāvidhi /
ṣaṭpadaṃ navasaṅkhyānaṃ niveśaṃ cakrire janāḥ //

mattānāṃ vāraṇendrāṇāṃ niveśaṃ ca yathāvidhi /
kārayitvā sa rājendro brāhmaṇānidamabravīt //

asminkārye dvijaśreṣṭhā nakṣatre divase śubhe /
yathā bhavanto manyante kartumarhanti tattathā //

na naḥ kālātyayo vai syādihaiva parilambatām /
iti niścitya viprendrāḥ kriyatāṃ yadanantaram //

śrutvaitadva********* brāhmaṇāḥ sapurodhasaḥ /
idamūcurvaco hṛṣṭā dharmarājapriyepsavaḥ //

adyaiva nakṣatrimahaśca puṇyaṃ yatāmahe śreṣṭhatamakriyāsu /
tapobhiradyeha vasāma rāja- nnupoṣyatāṃ cāpi bhavadbhiradya //

śrutvā tu teṣāṃ dvijasattamānāṃ kṛtopavāsā rajanīṃ narendrāḥ /

ūṣuḥ pratītāḥ kuśasaṃstareṣu yathā'dhvare prajvalitā hutāśāḥ //

tato niśā sā vyagamanmahātmanāṃ saṃśṛṇvatāṃ viprasamīritā giraḥ /
tataḥ prabhāte vimale dvijarṣabhā vaco'bruvandharmasutaṃ narādhipam //